Read Lengua Sur 1 Samuel 26 Bible Online

1 Samuel 26 - Lengua Sur bible

1 Samuel 26

¹Apkelmahágkek axta Guibeá m'a apheykha nak Zif apya'aweykxo Saúl, aptáhak axta apcháneya s'e: “Apyexánegweykmok David ma'a egkexe nak Haquilá, nekha nak meykexa énxet.”

²Tén axta apxega Saúl, yetlo apkelxegexma'a tres mil sẽlpextétamo israelitas apkelyennaqte nak, apkelmahágkek axta m'a meykexa énxet nak Zif apketama m'a David.

³Apkelpakxenwokmek axta m'a egkexe nak Haquilá, émha nak nekha ámay, nekha nak meykexa énxet. Apyekpelcheyk axta eyke David apkemhágko Saúl ma'a apheykenxa axta meykexa nak énxet,

⁴apkeláphássek axta han apkelányo yókxexma, yaqwayam ey'asagkohok apwa'akxa m'a Saúl.

⁵Tén axta apmahágko m'a apha'akxa axta appakxenwa'a Saúl, apkelyaháha axta han ekpayhókxa aptenakxa m'a Saúl tén han Abner, Ner axta apketche, apteme axta apkemha apmonye' sẽlpextétamo apagkok ma'a Saúl. Apwet'ak axta aptena kañe' appakxanma m'a Saúl, apwakha'ak axta m'a apkelxegexma'a.

⁶Tén axta David appaqhetchesa m'a Ahimélec, apteme axta hitita, tén han Abisai, Seruiá axta étche, Joab axta apyáxeg, aptáhak axta apkelmaxneyáncha'a s'e: —¿Yaqsa ekmako hétlók ko'o yaqwayam ólmahagkok ma'a appakxanma nak Saúl? —Ko'o sa' eytlók —axta aptáhak Abisai.

⁷Cháxa axta'a nak apkelmahágkaxa axta David yetlo Abisai ma'a apkelpakxeneykegkaxa nak énxet'ák. Aptenchek axta Saúl ma'a kañe' appakxanma, apkenegkessek axta han sawhéwa apagkok ekpayhókxa apqátek. Apyetneyk axta Abner yetlo sẽlpextétamo m'a nepyáwa nak.

⁸Keñe axta Abisai aptáha apcháneya David se'e: —Dios apmeyásak kaxwók yaqwayam emok apkenmexma. Heyho sa' ko'o kaxwo' waqhek, amallanchessamhok sa' sawhéwa apagkok ayaqxák xapop. Xama sélyetxaqxo sa' atnehek waqhek.

⁹Tén axta David aptáha apchátegmowágko: —Nágyaqha aqsa, hakte megkatnehek megkóllegassáseykegkoho apmáheyo nak yaqhek wesse' apwányam, apkelyéseykha nak ma'a Wesse' egegkok.

¹⁰Naqsók eyke ko'o sekxéna yetlo sekxeyenma Wesse' egegkok apwesey, peya yaqhek ma'a Wesse' egegkok, ekwokmo enxoho ekhem apketsapmakxa, essenhan apketsapma nak kempakhakma.

¹¹Megyohok sa' ko'o waqhek Wesse' egegkok ma'a wesse' apwányam apkelyéseykha nak. Ema aqsa xa sawhéwa apagkok apkenegkesa nak ekpayhókxa apqátek, tén han egheykok ekyawe apagkok apyeta nak chá'a yegmen, keñe sa' óltaqhoho'.

¹²Cháxa ektáhakxa axta David apma m'a sawhéwa tén han egheykok ekyawe kélyeta nak yegmen, ekhágko axta ekpayhókxa apqátek ma'a Saúl, keñe apkeltaqháwo. Méko axta ekwet'a, méko han ekleg'a apkelókáseykha; méko axta han ekxatakha'a, hakte apnaqtenchek axta apyókxoho, Wesse' egegkok axta apnaqtenchesso ekyentaxno agko'.

¹³Keñe axta David apyeykhákxo m'a mók nekha ekyapwátegweykenxa nak xapop, apkenegwákxeyk axta néten egkexe étseksek yámmakhawo'. Awanhek axta eyke exma m'a neyseksa nak.

¹⁴Tén axta David apyennaqtésa appeywa apwóneyncha'a m'a Abner, tén han ma'a sẽlpextétamo nak: —¡Abner, apleg'aya sekwóneykha! Apchátegmowágkek axta Abner: —¿Yaqsa exchep appaqhetchesa nak ekyennaqte wesse' apwányam?

¹⁵Aptáhak axta apcháneya David se'e: —¿Háweya exchep sẽlpextétamo apyennaqte meyke nak ekhémo m'a Israel? ¡Memyáwak wesse' apwányam apagkok! Xama énxet xeyk apya'awak apmako yaqhek wesse' apagkok.

¹⁶Asagkek aptáhakxa melhaxneyncha'a. Naqsók ko'o ektemessásak yetlo sekxeyenma Wesse' egegkok apwesey, payhawók kéxegke kóltekyók, hakte megkólleyxcháseyha m'a wesse' kélagkok, wesse' apwányam apkelyéseykha axta m'a Wesse' egegkok. ¡Ektamsakxa wesse' apwányam sawhéwa apagkok, tén han egheykok ekyawe apyeta nak chá'a yegmen, ekhágko exchek ma'a apqátek nak, elwetekxak sa' kexaha!

¹⁷Xama axta apyekpelchawo Saúl appeywa m'a David, axta aptáhak se'e: —¡Xép neykel'a sepaqhetchesa nak David, épháyem! Keñe axta aptáha David apchátegmowágko: —Éhay, wesse', ko'o s'e.

¹⁸¿Yaqsa ektéma seyaqmáseykencha'a nak wesse', ko'o sektáha nak xép apkeláneykha? ¿Yaqsa aqsok séláneya? ¿Yaqsa aqsok ekmaso séláneya ko'o?

¹⁹Éltamhók ko'o yeyxhok sekpeywa, wesse', sektáha nak apkeláneykha: Wesse' egegkok sa' agkok sénmexcháseykekxa ko'o exchep, wesse', emok sa' takha' aqsok apmésso naqsa; énxet sa' agkok ma'a, Wesse' egegkok sa' eltaqnaweygkok. Hakte etekkessegkek ko'o s'e yókxexma nak, ektáha nak apagkok ma'a Wesse' egegkok, eyáteyeykegkok alpeykeshok ma'a mók aqsok kéláyókxa nak.

²⁰Mómenyék ko'o amátog makhawók mexnakxa nak Wesse' egegkok, ¡apxegeykmek eyke exchep wesse' apketamsama máleg askok, eyaqmáseykha m'a neyseksa egkexe nak, máxa sénhek etnéssessók!

²¹Keñe axta Saúl aptáha s'e: —¡David, épháyem, ekya'ásegwokmek ko'o séláneya may'assáxma! ¡Máxa seyeyháxma ektemék, awanhók agko' magwaqhémo! Hey'óta sa' makham, matnéssessamók sa' eyke exma ekmaso kaxwo', hakte meheyaqhak ko'o exchep se'e sakhem nak.

²²Apchátegmowágkek axta David: —Keso sawhéwa apagkok se'e wesse'. Yána sa' exegmak xama apchásenneykha ewata',

²³egkéshok chá'a ekyánmaga Wesse' egegkok ektémakxa aqsok apkelane m'a énxet ekpéwomo nak aptémakxa, tén han meyenyaweykha nak chá'a. Egkéssek eykhe ko'o Wesse' egegkok yaqwayam waqhek xép se'e sakhem nak, makke ko'o amakók atnéssessamhok exma ekmaso xép wesse' apwányam, aptáha nak apkelyéseykha Wesse' egegkok.

²⁴Apkeltamhók ko'o Wesse' egegkok hetnéssesek yának aweynchamha makham, sekteméssesakxa nak xép sakhem sey'awo makham eweynchamha, wesse', tén han hemallahanchesek ekyókxoho ekyentaxnamo sekha.

²⁵Keñe axta Saúl aptáha s'e: —¡Wesse' egegkok sa' epasmok xép David, épháyem! ¡Etekkesek sa' xép aqsok apkelane, tásek sa' katnehek ekteyapma ekyókxoho aqsok apkelanakxa enxoho! Aptaqháwok axta apxagkok Saúl natámen xa, keñe David apxegákxo makham.