Read Lengua Sur 1 Samuel 28 Bible Online

1 Samuel 28 - Lengua Sur bible

1 Samuel 28

¹Apchánchesákxeyk axta sẽlpextétamo apagkok filisteos natámen xa, yaqwayam elnapakpok ma'a énxet'ák Israel, axta aptáhak Aquís apcháneya David se'e: —Ey'asagkoho sa' xép, tén han apkelxegexma'a, hẽlyetlók sa' yaqwayam ómpakha'.

²Apchátegmowágkek axta David: —Táse'. Sa' eyke apya'ásegwokmo wesse', sekmowána ko'o alának aqsok, sektáha nak apkeláneykha. —Xép nak sa' atnéssesek apkemha apmonye' setaqmelchesso meyke néxa' —axta aptáhak apchátegmowágko Aquís ma'a David.

³ Apketsepmeyk axta m'a Samuel, apkellekxagweykha axta apyókxoho énxet'ák Israel eñama apketsapma, keñe axta kélátawanyama m'a Ramá, aptéyeykemxa axta. Keñe axta Saúl, nanók axta apkelántekkesso apchókxa m'a apkelpaqhetchásamákpoho nak chá'a kélhagák, tén han ma'a apkelwóneykha axta chá'a apkeletsapma.

⁴Apchaqnákxeyk axta filisteos keñe apkelxega apkelpakxenwokmo m'a yókxexma nak Sunem, tén axta Saúl apchánchesákxo apyókxoho énxet'ák Israel, keñe apkelpakxenwokmo m'a yókxexma nak Guilboa.

⁵Xama axta apwet'a filisteo apkelpakxenéyak, apyegwakkek axta, pexyennegkek axta apwáxok apkeye.

⁶Yetlókok axta han apkelmaxneyeykha Wesse' egegkok, axta eyke yátegmowágkok, axta han ét'ak ma'a apwanmagko enxoho, axta han kaxekmowásak ma'a Urim, axta han eltennásak ma'a apkellegasso nak Dios appeywa.

⁷Axta keñamak aptáha apkeláneya m'a apkeláneykha nak: —Kóltegyaha sa' xama kelán'a élpaqhetchásamáxkoho nak apkeletsapma, yaqwayam sa' ko'o ay'ammok almaxneyha. Keñe axta apkeláneykha aptáha apkelátegmowágko: —Heyk xama kelán'a m'a yókxexma Endor élpaqhetchásamáxkoho nak chá'a apkeletsapma.

⁸Apkelántaxneykxeyk axta pók apkelnaqta m'a Saúl apcheykmásencha'a pók énxet, axta'a axta han apxegak yetlo apkelxegexma'a apqánet énxet, apyo'ókmo m'a kelán'a nak. Keñe axta aptáha apcháneya m'a: —Éltamhók eykhe ko'o héltennaksek yaqwánxa hetnehek, kána sa' kaxegmak ma'a kélhagák séltamhókxa enxoho ko'o.

⁹Axta táhak eyátegmowágko kelán'a: —Apya'ásegkok xép aqsok apkelane axta Saúl, apkelántekkessama axta apchókxa m'a apkelpaqhetchásamákpoho nak chá'a kélhagák, tén han ma'a apkelwóneykha nak chá'a apkeletsapma. ¿Yaqsa ektáha apkeltamho nak hesexnenak hemok kelhanma yaqwayam amátog?

¹⁰Naqsók axta eyke aptemessásak Saúl yetlo apxeyenma Wesse' egegkok apwesey, aptáha apcháneya s'e: —Naqsók ko'o ektemessásak yetlo sekxeyenma Wesse' egegkok apwesey, megkatnégwomok sa' exma ekmaso eñama ekteme xa.

¹¹—¿Yaqsa apkeltamho wánéssesha exchep? —axta entáhak eyáneya kelán'a. —Heyánéssesha ko'o Samuel —axta aptáhak Saúl.

¹²Xama axta ekwet'a Samuel ma'a kelán'a, payheyha axta átog; tén axta ektáha eyáneya Saúl se'e: —¿Yaqsa ektáha sélyexanchásencha'a nak? ¡Saúl neykekhe exchep!

¹³Tén axta wesse' apwányam aptáha apcháneya: —Nágké' aqsa. ¿Yaqsa ekwet'a? —Ekwet'ak ko'o xama kélhagák ekxegakmo ektepa kañe' xapop —axta entáhak eyátegmowágko kelán'a.

¹⁴—¿Háxko ekteme? —axta aptáhak apkelmaxneyáncha'a Saúl. —Máxa énxet apwányamók la'a, apchaqlamap aptaxno apwenaqte —axta entáhak eyátegmowágko kelán'a. Yohok axta han apya'ásegkoho Saúl aptáha m'a Samuel, apháxahánteyk axta ekwokmoho aptekxekwa'akto nápat xapop.

¹⁵Keñe axta Samuel aptáha apcháneya s'e: —¿Yaqsa ektáha sélya'asa nak exma seyáneyancha'a amyenták se'e? Aptáhak axta Saúl apchátegmowágko: —Awanhók agko' ko'o ekyentaxno ewáxok, ektamokmek ma'a filisteos, eyenyókek han ma'a Dios. Massegkek seyátegmowéyak, massegkek han apkelásenneykekxa héltennaksek ma'a apkellegasso nak appeywa, mehexekmóssók han ma'a sekwanmagko. Cháxa keñamak seyáneyáncha'a nak xép, yaqwayam hexekmósek eyeyméxchexa alána'.

¹⁶Apchátegmowágkek axta Samuel: —¿Yaqsa eyke ektáha sélmaxneyáncha'a nak ko'o? Apyamasmeyk xép Wesse' egegkok, apkenmexma aptamheykekxa'.

¹⁷Apteméssessegkek xép Wesse' egegkok ma'a apkeltennassama axta etnéssesek, seyásenneykekxo axta ko'o. Apyementamákxeyk xép ma'a aptémakxa nak wesse' apwányam, apmeyásekxeyk ma'a David apxegexma nak,

¹⁸hakte melyeheykekxak xép ma'a apchánamakxa nak antéhek Wesse' egegkok, melanék han ma'a apkeltémókxa axta etnehek emasséssók ma'a amalecitas. Cháxa keñamak apteméssesa nak kaxwók Wesse' egegkok xa ektáhakxa nak.

¹⁹Egkések sa' Wesse' egegkok yaqwayam elmok filisteos ma'a israelitas, tén han xépxa, exek sa' ko'o xamo' xép saka ekweykekxoho apketchek. Yának sa' han elmok Wesse' egegkok filisteos ma'a sẽlpextétamo israelitas nak.

²⁰Yetlókok axta han apyaqnenma Saúl, appéwok axta aqsa apyetna. Apyegwakkók apagko' axta apleg'a m'a Samuel appeywa, chapchek axta. Axta eyke han etáwak apto xama ekhem ekweykekxoho axta'a.

²¹Xama axta ekwet'a kelán'a apyegwaya m'a Saúl, yepetchegwokmók axta, keñe ektáha eyáneya s'e: —Élanak ko'o aqsok sélmaxneyeykha, ko'o sektáha nak apkeláneykha. Magwakak sétsapma sélyahákxoho apkeltamhókxa atnehek.

²²Kaxwo', hélyahakxoho sa' ko'óxa': agkések sa' apto, yaqwayam sa' énnákxoho, tén sa' exñekxak makham.

²³Axta eyke emakók etwok apto m'a Saúl, apkelenxánegkessek axta eyke m'a apkeláneykha, tén han ma'a kelán'a nak, tén axta apkelyahákxoho aqsa. Apchampákxeyk axta néten aphakxa axta náxop, aphakmek axta néten kélyetnamakxa.

²⁴Yetlókok axta han eyaqhe weyke étkok ekmele m'a kelán'a, ekyáqto axta m'a axagkok, yélaqtéssek axta han hótáhap yaqwayam kalának pán meyke kempáseyak.

²⁵Keñe axta élsákxésa Saúl xa aqsok nak, tén han ma'a apkeláneykha. Xama axta appenchásegko aptéyak, apkeltaqháwok axta makham xa axta'a nak.