Read Lengua Sur 1 Samuel 4 Bible Online

1 Samuel 4 - Lengua Sur bible

1 Samuel 4

¹tén axta apkeltennáseykekxoho Samuel ma'a apyókxoho énxet'ák nak Israel. Apchaqnákxeyk axta han filisteos yaqwayam elnapakpok ma'a Israel, yetlókok axta han apkelánteyapma israelitas yaqwayam elenmexek ma'a filisteos, apkelpakxenwokmek axta han ma'a ekpayho nak Eben-ézer. Keñe axta filisteos apkelpakxenwa'a m'a Afec,

²apkelánegkokxeyk axta aptamhágkaxa yaqwayam ektamagkok ma'a israelitas, keñe axta apkelnápekpo, apmenxenchek axta filisteos ma'a israelitas, apkelnáhakkassek axta cuatro mil énxet'ák apagkok ma'a émpakháxchexa axta.

³Xama axta apkelwákxo makham sẽlpextétamo israelitas ma'a apkelpakxeneykegkaxa axta, aptáhak axta apkeláneya apkelámha apmonye'e Israel se'e: “¿Yaqsa ektáha apcha'awo nak Wesse' egegkok segmenxena negko'o sakhem ma'a filisteos? ¡Agwakxak sa' Wesse' egegkok yántéseksek apagkok ma'a ekyetnama nak Siló, yaqwayam sa' exog negyeseksa negko'o m'a Wesse' egegkok, tén han hegmenxenchesek neyseksa apmáheyo hẽlmok nélenmexma!”

⁴Apkeláphássek axta han nápakha sẽlpextétamo israelitas ma'a Siló, apsánteyk axta Wesse' egegkok ekha nak apyennaqte yántéseksek apagkok, ekyetnama nak aptaháno neyseksa m'a apkeláneykha ekha nak apxempenák. Apkelyetlántamok axta han Dios yántéseksek apagkok ma'a apqánet apketchek axta Elí, cham'a Hofní tén han Finees.

⁵Xama axta ekwa'a Wesse' egegkok yántéseksek apagkok ma'a apkelpakxeneykegkaxa nak israelitas, apkelwónchessek axta yetlo élpayheykekxa agko' apkelwáxok, apyawhéssek axta xapop.

⁶Xama axta apkelleg'a filisteos xa kélwónchesso nak, aptáhak axta aptegyáncha'a amya'a: “¿Yaqsa ektáha ekyennama agko' nak exma m'a apkelpakxeneykegkaxa nak hebreos?” Xama axta apkelya'ásegwokmo ekwa'a Wesse' egegkok yántéseksek apagkok ma'a apkelpakxeneykegkaxa nak,

⁷yetlókok axta apkelaye, keñe aptáha apkelpaqmeta s'e: “¡Dios hek apwa'ak ma'a apkelpakxeneykegkaxa nak! ¡Negko'o la'aye, hakte magweték chá'a negko'o katnehek xa ektáhakxa nak!

⁸¡Negko'o la'aye! ¿Yaqsa sa' hẽlmallahanchesek negko'o hegaksek hẽlmok xa Dios apyennaqte apagko' nak? ¡Axta apmassésseyam egipcios ma'a yókxexma meykexa nak énxet, apchahaya chá'a mók ektémakxa aqsok élmasagcha'a!

⁹¡Kólyennaqteyásekxoho sa' kélwáxok, sẽlpextétamo nak filisteos, kólyennákxoho sa' kólnapaxche', yaqwayam enxoho mehentéhek apkelásenneykha naqsa m'a hebreos, kélteméssessama nak kéxegke kéltéma kélásenneykha!”

¹⁰Tén axta apketámegko filisteos, apmenxenákpek axta m'a israelitas, apkenyahágkek axta apkelmeyákxo m'a apkelpakxeneykegkaxa nak. Asagkók agko' axta han aptáhakxa apkelnapma m'a, treinta mil israelitas axta aptekyawak, apkelxega nak chá'a náxop.

¹¹Apmeyk axta han Dios yántéseksek apagkok, apkelnapchek axta han ma'a apqánet apketchek axta Elí, cham'a Hofní tén han Finees.

¹²Xama sẽlpextétamo axta eyke han apxeganakmok ma'a émpakháxchexa axta, apkeñama axta nepyeseksa Benjamín énxet'ák apagkok, apkenyeyk axta ekweykekxoho Siló xa ekhem nak. Apkelyeptékpek axta aptaxno, xapop ánek axta han ma'a apqátek.

¹³Apheyk axta aqsa han néten aptaháno Elí m'a nekha átog nak apwákxo, apkenmexo m'a ámay, hakte yetnakhásawók axta apwáxok ma'a Dios nak yántéseksek apagkok. Aptaxneyk axta tegma apwányam xa énxet nak, apkeltennáha axta ektáhakxa'; yetlókok axta han élpayheykha apatña'ák apyókxoho énxet'ák apkelleg'a xa amya'a nak.

¹⁴Xama axta apleg'a Elí xa ekyennama exma nak, aptáhak axta aptegyáncha'a amya'a s'e: —¿Yaqsa ektáha ekyennama exma'? Appekhésawók axta han apkeltennásseykekxa amya'a Elí xa énxet nak,

¹⁵noventa y ocho apyeyam apagkok axta eyke temék ma'a Elí, meyke apaqta'ák axta temék.

¹⁶Aptáhak axta apcháneya: —Kaxwo' ko'o ekwa'akták séñama m'a émpakháxchexa nak. Sakhem ko'o sekxeganakmo m'a émpakháxchexa'. —¿Yaqsa ektáha? —axta aptáhak apkelmaxneyáncha'a Elí.

¹⁷—Apkenyahágkek apmonye'e israelitas ma'a filisteos —axta aptáhak apchátegmowágko m'a ektáha axta apseykekxésso amya'a—. Asagkek ektáhakxa aptekyawa énxet'ák, apkeletsekkek han ma'a apqánet apketchek nak, cham'a Hofní tén han Finees, apmeyk han filisteos ma'a Dios yántéseksek apagkok.

¹⁸Xama axta apkeltennasa apxéna Dios yántéseksek apagkok ma'a apseykekxésso nak amya'a, apsekhákxeyk axta Elí aphakxa m'a nekha nak átog, kentawok axta han nápenyétek, hakte apwányamók axta, apmel'ak axta han, apketsekkek axta. Cuarenta apyeyam axta han apteme apkemha apmonye' m'a Israel.

¹⁹Keñe m'a aptánegken, Finees axta aptáwa', lósók axta m'a, ketók ektémakxa naqláwa, yetlókok axta han ekmáske awáxok ekleg'a ekmáxko m'a Dios yántéseksek apagkok, tén han apketsapa m'a yepyáta', keñe han atáwa'; pexyawáha axta han eklegágkoho ekmáske ektáha naqláwa.

²⁰Xama axta ekwet'a ekmako katsapok ma'a ektáha axta éláneykha, entáhak axta eyáneya s'e: “Nágkatneykha awáxok, wet'ak xeye' étche apkenna.” Axta eyke kátegmowágkok, axta han kahaxnawo';

²¹Icabod axta han temessásak apwesey m'a sakcha'a nak, hakte axta entáhak se'e: “Massegwokmek apcheymákpoho Israel, hakte máxcheyk ma'a Dios yántéseksek apagkok.” Axta eyke xénak ma'a ekmomaxche axta yántéseksek, keñe han apketsapma axta m'a yepyáta' tén han atáwa'.