Read Lengua Sur 1 Samuel 5 Bible Online

1 Samuel 5 - Lengua Sur bible

1 Samuel 5

¹Xama axta ekmomaxko Dios yántéseksek apagkok, apseykekxeyk axta filisteos eñama m'a Eben-ézer, apya'áseykekxo m'a Asdod;

²keñe axta apchaqxegkessama m'a tegma kélpeykessamókxa axta chá'a aqsok kéláyókxa Dagón, appekkenchek axta han nekha m'a kéleykmássesso nak.

³Keñe axta mók ekhem, apkelwákxo axta m'a apkeleñama nak Asdod, apkelwetágweykxeyk axta ekyaqnena náxop ma'a Dagón, ekpayhókxa axta ekyetnamakxa m'a Wesse' egegkok yántéseksek apagkok. Tén axta apkempásekxo makham néten ma'a Dagón, apkenegkásekxeyk axta makham ma'a énmeykegkaxa axta.

⁴Keñe axta makham mók ekhem, apkelwákxo makham ma'a apkeleñama nak Asdod, apkelwetágweykxeyk axta makham ekyaqnena náxop ma'a Dagón, ekpayhókxa axta ekyetnamakxa m'a Wesse' egegkok yántéseksek apagkok. Kenteyk axta apqátek, tén han ánet amék, hagwokmek axta m'a ekpayho nak átog. Ekyókxa' axta aqsa kéméxche'.

⁵Cháxa keñamak apkelántaxnegwákxo enxoho chá'a apkelmaxnéssesso nak dios Dagón énxet'ák agkok ma'a tegma kélpeykessamókxa nak chá'a, apyetnama nak ma'a Asdod, melteyammek chá'a elántexek ma'a nentaxnamakxa nak, ekwokmoho makham se'e kaxwo' nak.

⁶Keñe axta apkellegassásegkoho Wesse' egegkok ekmaso agko' ma'a énxet'ák nak Asdod, apkelyegwakkásawók apagko' axta, ekweykekxoho m'a apheykha nak nepyáwa', apcha'ak axta tasqapma.

⁷Xama axta apkelwet'a ektáhakxa m'a apheykha nak Asdod, aptáhak axta apkelpaqmeta s'e: “Megkapayhawok keytek negyeseksa negko'o m'a Dios Israel nak yántéseksek apagkok, hakte ẽllegassásegkok negko'o ekmaso agko' xa aqsok kéláyókxa nak, háwe ekwánxa agkok negko'o, wákxók han ma'a Dagón, negáyókxa nak.”

⁸Keñe axta kéltennássekxo apyókxoho apkelámha apmonye'e nak filisteos, apkeláneyáncha'a yaqnekxohok xamo' xa énxet'ák nak, axta kéltáhak kélmaxneyáncha'a s'e: —¿Háxko sa' anteméssesek Dios Israel nak yántéseksek apagkok? —Kólye'és sa' ma'a tegma apwányam nak Gat —axta aptáhak apkelátegmowágko xa énxet'ák nak. Apsókek axta han filisteos ma'a.

⁹Apkelyegwakkassek axta han Wesse' egegkok énxet'ák ma'a tegma apwányam, natámen kélsó axta m'a, apcha'a tasqapma m'a apheykha nak, élántepa axta apyempe'ék ma'a apkelwányam nak tén han ma'a ketcheyetse nak.

¹⁰Tén axta filisteos apya'ásekxo Dios yántéseksek apagkok ma'a Ecrón; xama axta ekwokmo yántéseksek ma'a, aptáhak axta apkelyennaqtésawo apkelpeywa apheykha nak Ecrón se'e: “¡Ẽlsókasakmek Dios Israel yántéseksek apagkok, yaqwayam hẽlnápok negyókxoho!”

¹¹Kéláneyaha axta apyókxoho apkelámha apmonye'e filisteos, axta ñókxa eksawheykxoho élmeneymáxche agko' ma'a tegma apwányam, eñama ekmaso agko' axta apchehe apkellegassáseykegkoho m'a Dios, axta kéltáhak kéláneya s'e: “Kólsakxa makham Dios Israel yántéseksek apagkok. Kólyensakxa m'a éñamakxa axta, yaqwayam enxoho mehẽlnápek negyókxoho.”

¹²Weykekxók axta élpayheykha apatña'ák énxet'ák ma'a néten, hakte sawheykekxók axta apyempe'ék tasqapma m'a meletsapma axta.