Read Lezgi New Testament – ЦӀийи Икьрар МатӀай 1 Bible Online

МатӀай 1 - Lezgi New Testament – ЦӀийи Икьрар bible

МатӀай 1

¹Ингье, Иса Месигьдин тухумдин тарих: Иса Месигь Давуд пачагьдин тухумдикай, Давуд пачагьни Ибрагьиман тухумдикай тир.

²Гьа икӀ Ибрагьималай Исакь хьана. Исакьалай Якьуб хьана. Якьубалай Ягьуд ва адан стхаяр хьана.

³Ягьудалай ПерецӀни Зерагь хьана, абурун диде Тамар тир. ПерецӀалай Гьесран хьана, Гьесраналай Арам хьана.

⁴Арамалай Аминадаб хьана, Аминадабалай Нагьшун хьана. Нагьшуналай Салман хьана.

⁵Салманалай Багьас хьана, Багьасан диде Рагьаб тир. Багьасалай Абид хьана, Абидан дидени Рут тир. Абидалай Ишай хьана.

⁶Ишаялай Давуд пачагь хьана. Давуд пачагьдилай Сулейман пачагь хьана. Сулейман пачагьдин дидени сифте Уьруьдик квай паб тир.

⁷Сулейман пачагьдилай Регьабам хьана. Регьабамалай Аби хьана. Абидилай Асеф хьана.

⁸Асефалай Яшафат хьана. Яшафаталай Ярам хьана. Ярамалай Узи хьана.

⁹Узидилай Ятам хьана, Ятамалай Ахаз хьана. Ахазалай Гьизкьи хьана.

¹⁰Гьизкьидилай Манаше хьана, Манашедилай Аман хьана. Аманалай Яши хьана.

¹¹Яшидилай Ягьиагьакин ва адан стхаяр хьана. (Им чувудар Бабилда есирвиле гьатдалди хьайи вахт тир.)

¹²Бабилдиз куьч хьайидалай кьулухъ Ягьиагьакиналай Шалатил хьана. Шалатилалай Зарубабел хьана.

¹³Зарубабелалай Абигьуд хьана, Абигьудалай Элиаким хьана, Элиакималай Азур хьана.

¹⁴Азуралай Садикь хьана. Садикьалай Ахим хьана, Ахималай Элигьуд хьана.

¹⁵Элигьудалай Элазар хьана. Элазаралай МатӀан хьана, МатӀаналай Якьуб хьана.

¹⁶Якьубалай Майраман гъуьл Юсуф хьана. Майрам Месигь лугьудай Исадин диде тир.

¹⁷Гьа икӀ Ибрагьималай Давуд пачагьдал къведалди цӀукьуд несил авай. Давуд пачагьдин девирдилай та чувудар Бабилдиз есирвиле тухудалди цӀукьуд несил авай; чувудар Бабилдиз тухвай девирдилай та Месигьдал къведалдини цӀукьуд несил авай.

¹⁸Иса Месигь икӀ дидедиз хьана: Адан диде Майрамак Юсуфа лишан кутунвай. Абурун мехъер хьанвачиртӀани, Майрам Пак Руьгьдикай руфунал залан хьанвайди малум хьана.

¹⁹Майраман чам Юсуф гьахъ-михьи кас тир, адаз Майрам беябур тавуна, ам чинеба элкъуьр хъийиз кӀан хьана.

²⁰И фикирар ийизвайла, ахварай адан патав Реббидин малаик атана. — Давуд пачагьдин эвлед Юсуф! — лагьана малаикди. — Ваз Майрам пабвиле къачуз кичӀе жемир, Адан руфуна авайди Пак Руьгьдилай хьанвайди я.

²¹Майрама Хва хада, тӀварни Адал Иса эцига: Ада Вичин халкь гунагьрикай хиласда.

²²Ибур вири пайгъамбарди Реббидин мецелай лагьай ихьтин гафар кьилиз акъатун патал хьайи крар я:

²³«Яб це! Рушвал гумайди кӀвачел залан жеда, ада Хва хада, Адазни Имануэл, яни чахъ Аллагь гала, лагьана тӀвар гуда».

²⁴Ахварай аватайла, Юсуфа Реббидин малаикди лагьайвал авуна. Ада Майрам пабвиле къачуна.

²⁵Амма папа Хва хадалди, Юсуф адав агатнач. Майрамаз Хва хьайила, Юсуфа Адаз Иса тӀвар гана.