Read Lezgi New Testament – ЦӀийи Икьрар МатӀай 10 Bible Online

МатӀай 10 - Lezgi New Testament – ЦӀийи Икьрар bible

МатӀай 10

¹Исади Вичин цӀикьвед тилмиздиз эверна, абуруз чӀуру жинерар хкуддай ихтияр ва гьар жуьредин тӀаларни азарар сагъар хъийидай къуват гана.

²ЦӀикьвед илчидин тӀварар ибур я: сад лагьайди, вичиз гьакӀни Симун лугьузвай, Петру, адан стха Эндирей, Зебедеян рухваяр тир Якьуб ва Ягья,

³ФилипӀ ва БартӀаламай, ТӀумай ва харж кӀватӀдайди тир МатӀай, Гьалфеян хва Якьуб ва Тадас,

⁴Симун Миллетбаз ва Иса маса гайи Искарият Ягьуд.

⁵Исади и цӀикьведни ракъурдайла, абуруз эмир авуна: — Чувудар туширбурун вилаятриз фимир, самариятвийрин шегьердизни гьахьмир.

⁶Сифтени-сифте куьн, хипер хьиз, телеф хьанвай Исраилдин халкьдин патав алад.

⁷Вач, абуруз Цаварин Пачагьлугъдин вахт хьанвайдакай хабар це.

⁸Азарри кьунвайбур сагъар хъия, жузам квайбур михьи ая, кьейибурал чан хкваш, жинерар хкуда; квез гьавайда гьатайди гьавайда хгунни ая.

⁹Фидайла, жувахъ галаз я къизил, я гимиш, я къара пул къачумир,

¹⁰рекьиз я гьебе, я кьве къат пекер, я кӀвачин къапар, я аса тухумир, зегьметкешдив вичин тӀуьн агакьда.

¹¹Гьи шегьердиз ва я хуьруьз куьн фейитӀа, ана лайих авай инсан вуж ятӀа жузуз; хъфидалди гьана акъваз.

¹²КӀвализ гьахьдайла, иесидиз «хийирар хьуй» лагь.

¹³КӀвал лайих авайди хьайитӀа, куьне а кӀвализ гъидай хийир ана амукьда; лайих авайди тахьайтӀа, куь хийир квел хкведа.

¹⁴Куьн са кӀвале, я са шегьерда кьабул тавуртӀа ва куь гафариз яб тагайтӀа, анай экъечӀна хъфидайла, кӀвачерал алай ругни кӀвах хъия. Идалди куьне абуруз Аллагьди чпиз жаза гудайди къалурда.

¹⁵За квез рикӀивай лугьузва: Къияматдин юкъуз гьа шегьердиз Садумдилайни Гамурдилай пис жеда.

¹⁶За ракъурнавай куьн жанавуррин арада хипер хьиз жеда: гъуьлягъар хьиз акьул авайбур, лифер хьиз дугърибур хьухь.

¹⁷Инсанрикай мукъаят хьухь: абуру куьн дувандин гъиле твада ва чпин синагуграни куьн гатада,

¹⁸Ахпа Зун себеб яз куьн, Зи илчияр, гьакимринни пачагьрин патав тухуда. Куьне абурун ва халкьарин вилик Зи илчияр я лугьуз шагьидвалда.

¹⁹Куьн дувандиз гъайила, вуч ва гьикӀ лугьудатӀа лугьуз къайгъудик жемир, куьне лагьана кӀанзавай гафар квел гьасятда агакьда.

²⁰Куьн ваъ, куь мецелай куь Бубадин Руьгь рахада.

²¹Стхади стха ам кьин патал маса гуда, бубади — велед; веледарни диде-бубайриз акси экъечӀда ва абур рекьида.

²²Зи тилмизар хьуниз килигна, куьн виридаз такӀан жеда; эхирдал кьван эхайди хилас жеда.

²³Са шегьерда куьн хурук кутаз хьайитӀа, маса шегьердиз кат. За квез рикӀивай лугьузва: куьн Исраилдин шегьеррилай элкъвена агакьдалди Инсандин Хва атана акъатда.

²⁴Тилмиз вичин муаллимдилай артух туширвал, нуькерни вичин иесидилай артух туш.

²⁵Вичин муаллим хьтинди хьайи тилмиз и кардал рази хьун лазим я. Вичин агъа хьтинди хьайи вач-хъша и кардал рази хьун лазим я. Хизандин кьилевайдал Багьал-Зевул лагьай тӀвар акьалтнаватӀа, ништа, адан кӀвалинбуруз вуч лугьузватӀа!

²⁶Квез душманрихъай кичӀе жемир, ашкара тежедай гьич са затӀни ва малум тежедай чинебан гьич са карни авайди туш.

²⁷За квез буьркьвеба вуч лугьузватӀа, куьне ам эквеба лагь, За куь япал вуч лагьанатӀа, гьадакай кӀвалин чӀередилай хабар це.

²⁸Беден яна рекьизвайбурухъай кичӀе жемир, абурувай руьгь рекьиз жедач. Гзафни гзаф чанни беден жегьеннемдин цӀа санал тергдай къуват Авайдахъай кичӀе хьухь.

²⁹Са къара пулунихъ кьве нуькӀ къачуз жедачни мегер? Амма гьикьван абур гъвечӀи ятӀани, абурукай садни куь Бубадин ихтияр авачиз чилел аватдач.

³⁰Куь кьилелни гьикьван чӀарар алатӀа гьисабнава.

³¹КичӀе жемир: гзаф нуькӀерилай куьн артух я.

³²Гьар ни инсанрин вилик Зун ихтибардалди кьабулзаватӀа, Зани цавараллай Зи Бубадин вилик ам гьакӀ кьабулда.

³³Инсанрин вилик ни Закай кьил къакъудайтӀа, Зани цавараллай Зи Бубадин вилик а касдикай кьил къакъудда.

³⁴Куьне фикирмир хьи, Зун и дуьньядиз ислягьвал гваз атанва; Зун ислягьвал ваъ, тур гваз атанва.

³⁵Зун хва вичин бубадихъ галаз, руш вичин дидедихъ галаз, свас вичин къаридихъ галаз чара авун патал атанва.

³⁶Инсандиз вичин кӀвалевайбурукай душманар хкатда.

³⁷Низ вичин дидени буба Залай гзаф кӀандатӀа, ам Заз лайих туш; низ вичин хвани руш Залай гзаф кӀандатӀа, ам Заз лайих туш.

³⁸Вуж вичин хаш кӀулаз яна, Захъ галаз къвезвачтӀа, ам Заз лайих туш.

³⁹Вичин чан хуьз алахъдайдавай ам къакъатда; Зун патал вичин чан гайида ам хуьда.

⁴⁰Куьн кьабулзавайда Зун кьабулзава, Зун кьабулзавайда Зун Ракъурайди кьабулзава.

⁴¹Ни пайгъамбар ам пайгъамбар я лагьана кьабулзаватӀа, адав пайгъамбардив агакьдай хьтин суваб агакьда; ни гьахъ-михьи кас хъсан кас я лагьана кьабулзаватӀа, адав гьа гьахъ-михьи касдив агакьай хьтин суваб агакьда.

⁴²Ни са сукӀрада авай къайи яд зи лап гъвечӀи са тилмиздиз, ам Зи тилмиз я лагьана гайитӀа, За квез рикӀивай лугьузва, гьадавни вичин савкьват агакьда.