Read Lezgi New Testament – ЦӀийи Икьрар МатӀай 11 Bible Online

МатӀай 11 - Lezgi New Testament – ЦӀийи Икьрар bible

МатӀай 11

¹Исади Вичин цӀикьвед тилмиздиз чирвилер гана куьтягьайла, Ам анай экъечӀна къунши шегьерриз чирвилер гуз ва вязер ийиз фена.

²Къазаматда авай Ягьядиз Месигьдин крарикай ван хьайила, вичин тилмизрикай бязибур Исадин патав ракъурна.

³— Атана кӀанзавай Месигь Вун яни, я тахьайтӀа чна масад вилив хуьдани? — хабар кьуна абуру Исадивай.

⁴— Ягьядин патав хъфена, квез акурдакайни ван хьайидакай лагь, — жаваб гана Исади, —

⁵буьркьуьбуруз цӀийи кьилелай аквазва, кьецӀибур кӀвачел ахкьалтзава, жузам квайбур михьи хъжезва, бишибуруз ван хквезва, кьейибурал чан ахкьалтзава, саилризни Шад Хабардин ван къвезва.

⁶Зал шак тегъизвай кас бахтавар я.

⁷Ягьядин тилмизар хъфейла, Иса Ягьядикай халкьдиз ихтилатар ийиз эгечӀна: — Куьн кьурумдиз куьз тамашиз фенвай? Гару юзурзавай нацӀариз килигиз фейиди яз тахьуй гьа?

⁸ГьакӀ туштӀа, бес куьн куьз килигиз фенвай? Багьа пекер алукӀнавай инсандиз килигиз фенвайни? ЧӀагай пекер алукӀна кеф чӀугваз уьмуьр тухузвайбур пачагьдин утагъра жеда.

⁹АкӀ хьайила, куьн куьз килигиз фенвайбур тир? Пайгъамбардиз? Эхь, лугьузва за квез. Ам пайгъамбардилайни вине авайди я.

¹⁰Адакай Каламда икӀ кхьенва: «Килиг! Валай вилик За Зи чархачи ракъурзава, ада Ви вилик Ви рехъ гьазурда».

¹¹За квез рикӀивай лугьузва: папа ханвайбурун арада Ягья пайгъамбардилай зурбади авач, амма Цаварин Пачагьлугъда авай виридалайни агъади гьа Ягья пайгъамбардилайни вине жеда.

¹²Ягья пайгъамбарди инсанриз цик акахьун къачу лагьай йикъарилай эгечӀна къенин йикъал къведалди инсанри Цаварин Пачагьлугъдихъ галаз акси дяве тухузва, ам кьаз кӀанзава [2]

¹³Мусади вичин Къанунда ва пайгъамбарри Ягья къведалди пайгъамбарвилин гафар лугьузвай.

¹⁴Квез абурун гафарин чӀалахъ жез кӀанзаватӀа, квез чир хьухь хьи, Ягья Месигьдилай вилик атана кӀанзавай гьа Ильяс я!

¹⁵Нихъ япар аватӀа, гьадаз ван атурай!

¹⁶Чи девирдин инсанар За нив гекъигда? Абур аялриз ухшар я. Аялри, базардин майдандал къугъвадайла, сада садаз лугьуда:

¹⁷— Чна квез кфилдай макьамар ягъайла, куьне кьуьлерначир; чна кьейибурухъ лугьунар авурла, куьн шехьначир. И девирдин инсанар гьакӀ я.

¹⁸Гила Ягья атанва, ада я фу незвач, я чехир хъвазвач, амма инсанри: «Адак чӀуру жин ква», — лугьузва.

¹⁹Инсандин Хва атанва — Ада ненни ийизва, хъунни. Ам акур инсанрини лугьузва: «ХупӀ тӀуьнрални хъунрал рикӀ алай кас тушни, Вични харж кӀватӀдайбурунни гунагькаррин тай-туьш хьанва!» Аллагьдин Камалди ийизвай вири крар Вич гьахъ-михьиди яз къалурзава.

²⁰Исади гзаф шегьерра Вичин аламатар къалурнайтӀани, шегьерра авай агьалияр Аллагьдин рекьел къвезвачир. Гьавиляй Исади абуруз туьгьметар ийиз хьана.

²¹— Ваз жедайди гуж я, Харазин шегьер! — лагьана Ада. — Вазни жедайди гуж я, Бетсаид шегьер! Куьна хьайи хьтин аламатар Туьрс ва Сидун шегьерра хьанайтӀа, а шегьеррин агьалияр, шихин пекер алукӀна, кьилелай руьхъ алахна, Аллагьдин рекьел къведай.

²²ГьакӀ хьайила, за квез лугьузва: Къияматдин юкъуз квез гудай жазадилай Туьрсдизни Сидундиз гайи Аллагьдин жаза кьезилди жеда.

²³Вазни, Кефернагьум, вун цавариз хкаждайди хьиз авани? Ваъ, вун ирид чилерин кӀаник вегьида! За ваз авур аламатар Садумда авунайтӀа, а шегьер къенин йикъалди амукьдай.

²⁴ГьакӀ хьайила, За ваз лугьузва хьи, Къияматдин юкъуз Садумдиз валай хъсан жеда!

²⁵Гьа чӀавуз, Вичин ихтилат давамарна, Исади лагьана: — Ваз шукур хьурай, Буба, цаваринни чилин Ребби, Вуна акьулни къанажагъ авайбурукай чуьнуьхнавай сир гъвечӀи аялриз ахъайна.

²⁶Эхь, Буба, ам Ви регьим галай къаст тир.

²⁷Зи Бубади Заз вири ганва. Хва вуж ятӀа Бубадилай гъейри садазни чидач; Буба вуж ятӀа Хцелай гъейри садазни чидач. Хцизни Ам низ чириз кӀан хьайитӀа, гьадазни чир жеда.

²⁸Залан парцикай галатнавайбур ва куьцӀенвайбур вири Зи патав ша, За куьн секинарда.

²⁹Заз табийвал ая ва Зи несигьатар яхъ. Зун милайим я ва Зи рикӀни умун я. Куь рикӀерни архайин жеда.

³⁰Заз табий хьун регьят я ва За квел эцигай парни кьезилди жеда.