Read Lezgi New Testament – ЦӀийи Икьрар МатӀай 12 Bible Online

МатӀай 12 - Lezgi New Testament – ЦӀийи Икьрар bible

МатӀай 12

¹Гьа чӀавуз, са Киш юкъуз, Иса къуьлер цанвай никӀяй тӀуз физвай. Адан тилмизриз гишин хьанвай; абуру фидай рекье кьилер атӀуз, къуьлуьн тварар нез хьана.

²И кар фарисейриз акурла, абуру Исадиз лагьана: — Килиг, Ви тилмизри Киш юкъуз къадагъа кар ийизва.

³— Давуд пачагьдиз ва адахъ галайбуруз гишин хьанвайла, абуру вуч авунатӀа, куьне Каламдай кӀелначни мегер? — лагьана Исади. —

⁴Давуда, Аллагьдин КӀвализ гьахьна, Реббидин вилик жедай фар къачуна вичини тӀуьна, галайбурузни гана. А фар хахамрилай гъейри садазни недай ихтияр авачир.

⁵Я тахьайтӀа хахамри Киш юкъуз Аллагьдин КӀвале кӀвалах авуналди Киш чӀурзавайди куьне кӀелначни мегер? Амма абурук тахсир квач.

⁶Амма За квез лугьузва: инал куь вилик Квайди Аллагьдин КӀвалелайни вине я.

⁷Куьн «Заз квевай кӀанзавайди къурбанд ваъ, регьим я» гафарин гъавурда акьазвайтӀа, куьне тахсир квачирбурук тахсир кутадачир.

⁸Инсандин Хва Киш йикъанни Иеси я.

⁹Гьанай Иса синагугдиз фена.

¹⁰Ана члахъ гъил галай са инсан авай. Исадик тахсир кутаз кӀанз, фарисейри Адавай хабар кьуна: — Киш юкъуз инсанар сагъар хъувун Къанундихъ галаз кьазвани?

¹¹— Авай-авачир са хеб Киш юкъуз фуруз аватайтӀа, квекай ни ам акъуд тавуна гьана тада? — жаваб гана Исади. —

¹²Амма инсан хипелай артух я! ГьакӀ хьайила Мусадин Къанунди Киш юкъузни хийирдин крар ийидай ихтияр гузва!

¹³Ахпа Ада члахъдаз лагьана: — Ви гъил инихъ ая. Ада гъил яргъи авуна. Гьасятда адан гъил, муькуь гъил хьиз, сагъ хъхьана.

¹⁴Анай экъечӀайла, фарисейри, Иса рекьидай рекьер жагъурун патал, чпи чпихъ галаз меслятар ийиз хьана.

¹⁵Амма Исадиз и кар чизвай, Ам анай экъечӀна хъфена. Адан гуьгъуьна аваз гзаф инсанар фена; Ада, вири сагъариз,

¹⁶абуруз Вич вуж ятӀа лугьумир лугьуз хьана.

¹⁷Гьа икӀ, Яшай пайгъамбардин мецелай лагьай ихьтин гафар кьилиз акъатна:

¹⁸«Ингье За хкянавай Зи ЛукӀ, Адал Зи рикӀ ала, Зи шадвал Гьадалди я. Адаз За Зи Руьгь гуда. Ада халкьариз гьахъ дуван малумарда.

¹⁹Ада гафунал гаф эцигдач, гьарай-эвер твадач, куьчейра гьарай ацалтна ихтилатар ийидач.

²⁰Гьахъ дуван гъалиб тавунмаз, Ада я алгъанвай [3] нацӀ хадач, я хкахьиз гьазур хьанвай чирагъ туьхуьрдач.

²¹Вири халкьари чпин умудар Гьадак кутада» .

²²Гьа чӀавуз Исадин патав жинерар квай буьркьуь ва лал са кас гъанай; Исади ам сагъарнай. А кас рахаз эгечӀнай ва адан вилерни ачух хъхьанай.

²³Халкь мягьтел хьана: — Белки и кас Давуд пачагьдин Хва ятӀа? — лугьуз хьана абуру.

²⁴И гафар ван хьайи фарисейри лагьана: — Жинерар хкуддай къуват Ада жинеррин кьилевайди тир Багьал-Зевулавай къачузва.

²⁵Амма абурун фикиррин гъавурда авай Исади лагьана: — Са пачагьлугъ сад садаз акси кьве патахъ пай хьайитӀа, а пачагьлугъ яргъалди амукьдач. Шегьер ва я хизан кьве патахъ пай хьайитӀа, а шегьер ва я кӀвал чӀур жеда.

²⁶Иблисди вичи жин чукурзаватӀа, ам вич вичиз акси экъечӀзава. А чӀавуз адан пачагьлугъ сагъ амукьун мумкин яни?

²⁷За а къуват Багьал-Зевулавай къачузватӀа, куь терефдарри ахьтин къуват нивай къачузва? Куь дуван ийидайбур гьабур хьурай!

²⁸Куьне За жинерар хкуддай къуват Аллагьдин Руьгьдивай къачузва лагьайтӀа — им квехъ Аллагьдин Пачагьлугъ агакьна лагьай чӀал жеда.

²⁹Низ гуж авай касдин кӀвал атӀуз кӀанзаватӀа, ада эвелни-эвел къуват авайдан гъилер-кӀвачер кутӀунна кӀанда, идалай кьулухъ кӀвал тарашиз жеда.

³⁰Вуж Захъ галаз туштӀа, ам Заз акси я; ни Зун галачиз вуч кӀватӀнатӀа, гьам вара-зара ийида.

³¹ГьакӀ хьайила За квез лугьузва: инсанрин гунагьрилайни, абуру ийизвай аси ихтилатрилайни гъил къахчуда, амма вуж Руьгьдикай чӀурукӀа рахаз хьайитӀа, адалай гьич садрани гъил къахчудач.

³²Ни Инсандин Хцикай чӀуру гаф лугьузватӀа, адалай гъил къахчуда, вуж Пак Руьгьдикай чӀурукӀа рахаз хьайитӀа, адалай я и девирда, я къведай цӀийи девирда гъил къахчудач.

³³Квез чизва, тар хъсанди ятӀа, адан майваярни хъсанбур жеда, тар писди ятӀа, адан майваярни писбур жеда. Тар писди яни, хъсанди яни, адан майвайрилай чир жеда.

³⁴Гъуьлягъдин къеняй акъатайбур! Куьн ихьтин писбур яз хьайила, куьне хъсан гафар гьикӀ хьана лугьузвайди я? РикӀ ацӀайла, инсанди вичин рикӀе авайди лугьузвайди я.

³⁵Хъсан инсанди хъсанвал вичин рикӀин хазинадай къачуна ийида, пис инсанди — писвал вичин пис рикӀяй.

³⁶Амма За квез лугьузва хьи, нагьакьан гафар лагьай инсанри Къияматдин юкъуз а гафарай жаваб гана кӀанда.

³⁷Ви гафариз килигна, вун гьахъ-михьивилиз акъудунни мумкин я, жаза гунни.

³⁸Гьа чӀавуз тавратдаррикайни фарисейрикай са бязибуру Адавай хабар кьуна: — Муаллим! Чаз са керемат-ишара къалура ман.

³⁹Амма Ада абуруз жаваб яз лагьана: — Къенин несил гьикьван чӀур ва чалкечир хьанва! И несилди керемат-ишара тӀалабзава, амма адаз Юнусан керемат-ишарадилай гъейри, маса керемат-ишара аквадач.

⁴⁰Юнус пуд юкъузни пуд йифиз гьуьлуьн чӀехи гъетрен руфуна гьикӀ хьанатӀа, гьакӀ Инсандин Хвани чилин рикӀе пуд йифизни пуд юкъуз жеда.

⁴¹Къияматдин юкъуз Ниневдин агьалийри и несилдиз кар атӀуда. Юнусан несигьатриз яб гайи Ниневдин агьалийри туба авунай ва несилдиз Юнусалайни ЧӀехидан несигьатрин ван къвезва.

⁴²Кьибле патан пачагь-ханум чилин лап а кьиляй Сулейман пачагьдин камал квай гафариз яб гуз атанай. И несилдиз Сулейман пачагьдилайни ЧӀехидан гафарин ван къвезва. Гьавиляй Къияматдин юкъуз кьибле патан пачагь-ханумди и несилдиз кар атӀуда.

⁴³Жин инсандай экъечӀайла, яд авачир кьурумра вичиз секин са чка жагъун тавурла, къекъвез гьатна, ада лугьуда:

⁴⁴— Жуван кӀвализ хъфин кван! Элкъвена аниз хтайла, адаз анаг ичӀи яз ва къакъажнаваз жагъида.

⁴⁵Гьанлай ам фена, вичелайни бетер ирид маса жинни къачуна вич кваз хьайи инсандиз гьахь хъийида ва архайин жеда. А жинерар акатай инсандиз авайдалайни пис жеда. И чӀуру несилдизни гьакӀ жеда.

⁴⁶Исади и ихтилат ийизвай чӀавуз Адан дидени стхаяр атана. Абуруз Адахъ галаз рахаз кӀанзавай. Амма абур кӀвализ гьахьнач.

⁴⁷Са ни ятӀани Исадиз лагьана: — Ви дидени стхаяр Вав рахаз кӀанз къецел акъвазнава.

⁴⁸— Дидени стхаяр Зун патал вужар я кьван? — жаваб гана Ада.

⁴⁹Вичин тилмизар гъилив къалурна, Ада лагьана: — Ингье Зи диде ва Зи стхаяр-вахар!

⁵⁰Цавараллай Зи Бубадин къаст ни кьилиз акъудзаватӀа, гьам Зи стхани я, вахни я, дидени!