Read Lezgi New Testament – ЦӀийи Икьрар МатӀай 13 Bible Online

МатӀай 13 - Lezgi New Testament – ЦӀийи Икьрар bible

МатӀай 13

¹Гьа юкъуз кӀваляй экъечӀна, фена, Иса вирин къерехда ацукьна.

²Адан патав атана гзаф халкь кӀватӀ хьана, гьаниз килигна Ам фена луьткведа акьахна, халкь вирин къерехдал кӀватӀ хьана акъвазна.

³Ада халкьдиз, кьисаяр мисал гъиз, гзаф крарикай ихтилатар ийизвай. Ада лагьана: — Лежбер никӀиз тум цаз фена.

⁴Ада тум вегьидайла, са бязи тварар рекьин къерехрал аватна, алтӀушай къушари абур кӀуфар ягъиз тӀуьна.

⁵Са бязи тварар къван квай чкадиз аватна. И тварар фад экъечӀна, вучиз лагьайтӀа абур накьв тӀимил квай чкадиз аватна.

⁶Рагъ экъечӀайла, цӀирер шуьткьвена, дувулар галачирбур хьиз, кьурана.

⁷Са бязи тварар къалгъанриз аватна. Къалгъанар чӀехи хьана, абуру акьалтзавай къацар пӀуьрчӀуькьарна.

⁸Амай тварар мублагь чилел аватна ва абуру майваярни гъана — сада виш твар, муькуьда пудкъад, амайбуруни — къанницӀуд.

⁹Нихъ япар аватӀа, гьадаз ван атурай!

¹⁰Исадин тилмизри Адан патав атана хабар кьуна: — Вун инсанрихъ галаз кьисайралди вучиз рахазва?

¹¹Абуруз жаваб яз Ада лагьана: — Квез Цаварин Пачагьлугъдин сирер кьатӀудай чирвилер ганва, амма абуруз ганвач.

¹²Авайдаз авайдалайни гзаф гуда, авайди адахъ мадни артух жеда. Авачирди вичихъ авай гьа тӀимилдакайни магьрум жеда.

¹³Абур килигзаватӀани, абуруз затӀни аквазвач, абуру яб гузватӀани, абуруз ван къвезвач, я абур гъавурда гьатзавач. ГьакӀ хьайила Зун абурухъ галаз кьисайралди рахазва.

¹⁴Гьа икӀ, Яшай пайгъамбарди лагьай ихьтин гафар абурун кьилел къвезва: «Япариз ван хьайитӀани, куьн гъавурда гьатдач, вилералди килигайтӀани — аквадач.

¹⁵А инсанрин рикӀер къван хьанва, ва япаризни заландиз къвезва ван, вилерни мичӀнава; абурун вилеризни аквадач, я япаризни ван къведач, рикӀерини кьатӀудач, чеб сагъар хъувун патални Захъ элкъведач» .

¹⁶Аквазвай куь вилерни, ван къвезвай куь япар бахтавар я.

¹⁷За квез рикӀивай лугьузва хьи, гзаф пайгъамбарризни гьахъ-михьи инсанриз квез аквазвай крар чпизни акуна кӀанзавай, амма акунач; квез ван къвезвайбурукай чпизни ван атана кӀанзавай, амма атанач.

¹⁸Тум вегьизвайдакай кьисадин метлебдиз фикир це:

¹⁹Цаварин Пачагьлугъдилай гаф ван жез гъавурда такьазвайди рекьин къерехдиз аватай тум хьиз я: шийирди атана адан рикӀе цанвай гаф чуьнуьхда.

²⁰Гьа и жуьреда къван квай чкадиз аватнавай тумни — ван хьанмазни гьасятда гаф шадвилелди кьабулдай инсанар я лагьай чӀал я.

²¹Амма чпихъ мягькем дувулар тахьуниз килигна, абур яргъалди амукьдач. Чеб а гаф кьуна лугьуз хурук кутурла, чпин кьил баладик акатайла, абур гьасятда рекьелай алатда.

²²Къалгъанриз вегьенвай тум — гафунин ван къвезвайбур я лагьай чӀал я. Амма гьар йикъан къайгъуйри, девлетдихъ вил ичӀи хьуни ахьтинбурун рикӀера гьатнавай гаф пӀуьрчӀуькьарда, ам бегьер тагуз жеда.

²³Миян чилиз аватнавай тварар — гафуниз яб гана адан гъавурда акьазвайбур я. Гьа ксари вичин бегьерни гъида — сада вишра, пудкъадра, са бязибуру къанницӀудра артух бегьер гъида.

²⁴Исади абуруз мад са кьиса ахъайна: — Цаварин Пачагьлугъ никӀиз хъсан тум вегьей инсандив гекъигиз жеда.

²⁵Йифиз вири ксанвайла, душман атана, къуьл цанвай чкадиз чӀуру хъчарин тум вегьена хъфена.

²⁶Къаз акьалтна къуьлуьн кьилерихъ галаз чӀуру хъчарни экъечӀна.

²⁷ЛукӀари атана чилин иесидиз лагьана: «Агъа! Вуна ви никӀиз хъсан тум вегьейди туширни кьван? Ана экъечӀнавай чӀуру хъчар гьинай атайбур я?»

²⁸«Ам душмандин кар я», — лагьана ада. «Ваз чна фена а хъчар хкяна кӀаняй акъудна кӀанзавани?» — жузуна лукӀари.

²⁹«Ваъ, — жаваб гана ада, — фимир, куьне абурухъ галаз къазни кӀаняй акъудда.

³⁰Къуй гьабурни, муькуьбурни санал экъечӀрай. Гуьдай вахт хьайила, гвен гуьзвайбуруз за лугьуда: сифте чӀуру хъчар кӀватӀна цуьлер авуна, куг, ахпа къуьл зи хармандал кӀватӀа».

³¹ГьакӀ лугьуз, Исади абуруз маса кьиса теклифна: — Цаварин Пачагьлугъ — инсанди къачуна вичин никӀиз вегьей финдин тварциз ухшар я.

³²Тумарикай ам виридалайни куьлуь ятӀани, амма экъечӀайла, салан набататрикай виридалайни чӀехи хьана, адакай тар жеда. Къушар къвез гьахьтин таран хилерал мукар ийиз жеда.

³³Исади абуруз мад са кьиса ахъайна: — Цаварин Пачагьлугъ — папа лап гзаф кьадар гъуьруьк кутур гъварциз ухшар я, ам кутунмазни тини атана.

³⁴Гьа ибур вири Исади халкьдиз кьисайралди лагьана, кьиса квачиз Ада халкьдиз ихтилат ийидачир.

³⁵Гьа икӀ, Пайгъамбардин мецелди лагьай ихьтин гафар кьилиз акъатна: «Зун абурухъ галаз кьисайралди рахада. За абуруз дуьнья халкь хьайидалай инихъ сир яз амай кардикай ихтилатда».

³⁶Ахпа халкь ахъайна, Ам кӀвализ гьахьна. Адан патав атай тилмизри Адаз лагьана: — Чун никӀяй экъечӀай чӀуру хъчарикай кьисадин гъавурда тур.

³⁷Исади жаваб яз лагьана: — Хъсан тум вегьизвайди Инсандин Хва я;

³⁸ник дуьнья я; хъсан тварар — Пачагьлугъдин веледар я, чӀуру хъчар — шийирдин веледар.

³⁹Абур вегьей душман иблис я. Гвен эхирзаман я, гвен гуьзвайбур — малаикар.

⁴⁰ЧӀуру хъчар кӀватӀна цӀал гьикӀ кудатӀа, эхирзаман атайлани гьакӀ жеда.

⁴¹Инсандин Хци Вичин малаикар ракъурда. Абуру Аллагьдин Пачагьлугъда инсанрив гунагьар ийиз тазвайбур ва чӀуру крар ийизвайбур кӀватӀна, абур цӀуз вегьида; ана жедайди шел-хвал ва сарар регъуьнар я.

⁴²

⁴³Гьахъ-михьибуру чпин Бубадин Пачагьлугъда ракъини хьиз нурар чукӀурда. Нихъ япар аватӀа, гьадаз ван атурай!

⁴⁴Цаварин Пачагьлугъ чилик кутунвай хазинадиз ухшар я. Инсандиз ам жагъана, ада ам мад чинеба чилик кухтун хъувуна. Ам акьван бахтлу тир хьи, вичихъ авай-авачир вири маса гана, фена ада гьа ник къачуна.

⁴⁵Цаварин Пачагьлугъ мадни хъсан гевгьеррихъ къекъвезвай савдагардизни ухшар я.

⁴⁶Адаз багьа са гевгьер жагъайла, фена вичихъ авай-авачирди маса гана, ада ам вичиз къачуна.

⁴⁷Мадни Цаварин Пачагьлугъ — гьуьлуьз вегьей чилиниз ухшар я. Чил гьуьлуьн гьар жуьредин гъетерай ацӀайла, гъетягъри ам къерехдиз чӀугуна. Ацукьна абуру хъсан гъетер къапариз вегьена, писбур гадарна.

⁴⁸

⁴⁹Эхирзаман атайлани гьакӀ жеда: малаикри атана гьахъ-михьи туширбурни гьахъ-михьибур чара авуна, писбур цӀуз вегьида. Ана жедайди шел-хвал ва сарар регъуьнар я.

⁵⁰

⁵¹Исади Вичин тилмизривай хабар кьуна: — Ибурун виридан гъавурда куьн гьатзавани? Абуру «Эхь» лагьана жаваб гана.

⁵²— ГьакӀ хьайила, Цаварин Пачагьлугъдихъ иман авур гьар са тавратдар вичин хазинадай цӀуру ва цӀийи затӀар винел акъудзавай сагьибдиз ухшар я, — лагьана Ада.

⁵³Исади Вичин кьисаяр ахъайна куьтягьайдалай кьулухъ, Ам хъфена.

⁵⁴Ам Вичин ватандиз хтана. Ана Ада синагугда чирвилер гуз хьана. Адан ван хьайи вири мягьтел жезвай: — Адаз ихьтин камал ва аламатар къалурдай къуват гьинай атана? — хабар кьазвай абуру.

⁵⁵— Ам харат устӀардин хва тушни? Адан дидедин тӀвар Майрам тушни? Адан стхаяр Якьуб, Юсуф, Симун ва Ягьуд тушни?

⁵⁶Адан вахарни ина, чи арада, авачни мегер? А алакьунар Адаз гьинай атана?

⁵⁷Абуруз Ам квазни кьаз кӀан хьанач. Исади абуруз лагьана: — Пайгъамбар виринра гъилерал жеда, анжах вичин ватанда, вичин хизандин арада адаз гьуьрмет жедач.

⁵⁸Адаз шегьерда авай инсанри Вичихъ иман тийидайди чизвай. Гьавиляй Ада Вичивай жедай гзаф аламатар къалурнач.