Read Lezgi New Testament – ЦӀийи Икьрар МатӀай 14 Bible Online

МатӀай 14 - Lezgi New Testament – ЦӀийи Икьрар bible

МатӀай 14

¹Гьа чӀавуз Галилейдин пачагь Гьирудал Исадикай хабарар агакьна.

²Ада Исадикай вичин къуллугъдарриз лагьана: — Ам Ягья пайгъамбар я, ам кьейидалай кьулухъ чан хтайди я, гьакӀ хьайила, адалай аламатарни алакьзава.

³Гьа и Гьируда вичин стха ФилипӀан паб Гьирудат къахчурла, Ягья кьуна къазаматда тун эмирнай,

⁴куьз лагьайтӀа, Ягьяди адаз лугьуз хьанай: — Ам къахчун гьарам я.

⁵Гьирудаз ам рекьиз кӀанзавай, амма халкьди Ягья пайгъамбар яз кьуниз килигна, адаз халкьдихъай кичӀе тир.

⁶Гьирудан хайи югъ къейддай чӀавуз, Гьирудатан руша кӀватӀ хьанвайбурун вилик кьуьлзавай. Гьирудаз адан кьуьл рикӀиз чими хьанай.

⁷Ада рушаз вуч кӀан хьайитӀани кьилиз акъудда лагьана кьин кьунай.

⁸Руша вичин дидедин гафариз килигна лагьанай: — Заз гьа исятда вуна Ягья пайгъамбардин кьил синида аваз гъана кӀанзава.

⁹Гьируд пачагь гзаф пашман хьанай, амма вичи мугьманрин вилик гайи кьин кьилиз акъудун патал, ада а кар авун эмирнай.

¹⁰Ада, гьасятда аскер ракъурна, Ягьядин кьил атӀун эмирнай.

¹¹Инсанри, фена, къазаматда авай Ягьядин кьил атӀанай, синидал алаз гъанай, рушав вуганай. Рушани кьил вичин дидедин патав тухванай.

¹²Адалай кьулухъ Ягьядин тилмизар атана, адан мейит къахчуна тухвана кучукнай. Ахпа фена хьайидакай Исадиз ихтилатнай.

¹³Исадал а хабар агакьайла, ам анай луьткведа акьахна, амукьун патал са хелвет чкадиз текдиз фена. Амма халкьдиз а кардикай хабар хьайила, абур кӀвачи-кӀвачи чпин шегьеррай атана, Адан гуьгъуьна гьатна.

¹⁴Луьткведай эвичӀна килигайла, Исадиз гзаф халкь кӀватӀ хьанваз акуна. Адаз абурун язух атана ва Ада азарри кьунвайбур сагъарна.

¹⁵Югъ няни хьайила, тилмизар Адав агатна: — Вахтни геж я, инагни хелвет чка я, — лагьана абуру. — Вуна абур ахъая. Абуру фена патарив гвай хуьрерай чпиз недай затӀар къачурай.

¹⁶— Халкь фин герек туш, куьне абуруз тӀуьн це, — лагьана Исади.

¹⁷— Чахъ ина авайди вад фуни гьуьлуьн кьве гъед я, — лагьана абуру.

¹⁸— Абур зи патав гъваш, — лагьана Исади.

¹⁹Халкьдиз векьел ацукь лагьана, Ада вад фуни кьве гъед къачуна, цавуз килигна, хийир-дуьа галаз, фу кӀар-кӀар авуна, Вичин тилмизрив инсанриз паюн патал вугана.

²⁰ТӀуьна вири тух хьана; амукьай фан кӀусарай цӀикьвед зимбил ахцӀурна.

²¹Папарни аялар квачиз фу тӀуьрбур вад агъзур кас кьван авай.

²²Ахпа Исади, Вичи инсанар ахъай тавунмаз, тилмизриз луьткведа акьах лагьана ва абур Галилейдин а патаз Вичелай вилик ракъурна.

²³Инсанар ахъайна, Ам Вич дуьаяр ийиз пелел хкаж хьана. Нянизни Ам ана ялгъуз амукьна.

²⁴Тилмизар авай луьткве къерехдивай яргъаз акъатнавай. Луьткве лепейри гатазвай, гарни луьткведиз аксиди тир.

²⁵Экв жедай кьиляй Иса вирелай тӀуз абур галай патахъ фена.

²⁶Вирелай тӀуз къвезвай Иса акурла, чпиз и кар карагзавайди хьиз хьана, тилмизрай кичӀела гьарай акъатна.

²⁷— КӀевиз акъваз, — лагьана абуруз гьасятда Исади, — Ам Зун я, кичӀе жемир.

²⁸— Я Агъа! — жаваб гана Петруди. — Ам Вун ятӀа, заз Ви патав целай къведай эмир це!

²⁹— Ша, — лагьана Исади. Петру луьткведай эвичӀна Исадин патав целай тӀуз фена.

³⁰Амма къати гар хьуниз килигна, Петрудиз кичӀе хьана. Вич цик акатиз акурла, ада гьарайна: — Я Агъа! Зун хилас ая!

³¹Исади гьасятда гъил вегьена, ам кьуна лагьана: — Иманда зайифди! Вуна шак вучиз ийида?

³²Абур луьткведа акьахайла, гар секин хьана.

³³Луьткведа авай тилмизар, Адав агатна ва икрам авуна: — Вун рикӀивайни Аллагьдин Хва я, — лагьана абуру.

³⁴Абур вирелай тӀуз фена Генисаратдин чилерал атана.

³⁵Чкадин агьалийриз Иса чир хьайила, абуру кьуд патаз Ам атанвайдакай хабарна. Инсанри азарар квай чпинбур Адан патав гъиз хьана.

³⁶Вирида Вичин пекерин ценцин цӀирхиник азарри кьунвайбурув са тӀуб кьванни кягъиз тур лугьуз, Адаз минетзавай. Адак гъил хкӀурбур дири хъжезвай.