Read Lezgi New Testament – ЦӀийи Икьрар МатӀай 19 Bible Online

МатӀай 19 - Lezgi New Testament – ЦӀийи Икьрар bible

МатӀай 19

¹Ийизвай ихтилатар куьтягьайдалай кьулухъ, Иса Галилейдай экъечӀна, Ярдан вацӀун муькуь патай яна Ягьудатдиз фена.

²Адан гуьгъуьна аваз гзаф халкь атана, Ада абур гьана сагъар хъувуна.

³Адан патав фарисеяр атана, Ам синагъ авун патал, хабар кьуна: — Акатай гьар са кардиз килигна гъуьлуь паб рахкурун дуьз кар яни?

⁴— Квез чизвачни кьван, Халикьди сифтени-сифте итимни паб арадал гъана, — жаваб гана Ада

⁵ва давамар хъувуна: — Гьавиляй, дидени буба туна, итимдикайни папакай сад жеда. Абур кьве чан ваъ, са чан жеда. Гьа икӀ, Аллагьди сад авурбур инсанди чара авун лазим туш.

⁷Абуру хабар кьуна: — Бес вучиз Мусади «тӀалакьар вахганва лагьай чар кхьена чара хьухь» лагьана ихтияр ганай?

⁸— Ада, куь туькьуьл рикӀер акурла, папахъ галаз чара жедай ихтияр гана, амма сифтедай акӀ тушир, — жаваб гана Исади. —

⁹За квез лугьузва хьи, гьи касди, явавал ийизвачир вичин папахъ галаз чара хьана, масад гъайитӀа, ада зинавал ийизва.

¹⁰Тилмизри Адаз лагьана: — Папан вилик гъуьлуьн хиве авай буржар гьахьтинбур ятӀа, паб тагъана амукьайтӀа хъсан я.

¹¹— Нивай хьайитӀани а кар кьабулиз жедач, ам анжах Аллагьди низ ганватӀа, гьада кьабулда, — лагьана Ада. —

¹²Дидеди хайи чӀавалай чеб худумар тир ва гьавиляй паб гъиз тежезвай итимар ава; хеси авунвай итимар ава; гьакӀни Цаварин Пачагьлугъдин хатурдай паб гъиз кӀанзавачир итимарни ава. Нивай и гафар кьабулиз жедатӀа, гьада абур кьабулрай.

¹³Гьа чӀавуз Исадин патав, Ада кап алтадна хийир-дуьа авун патал, аялар гъана, амма тилмизри абуруз туьгьметар ийизвай.

¹⁴И кар акур Исади лагьана: — Аялар секиндиз тур, аялриз Зи патав атуниз манийвал гумир, вучиз лагьайтӀа Цаварин Пачагьлугъ гьахьтинбурунди я.

¹⁵Ада абурал кап алтадна, ахпа Ам анай хъфена.

¹⁶Са касди атана Исадивай хабар кьуна: — Я Муаллим, эбеди уьмуьр хьун патал, за гьихьтин хъсан крар авун лазим я?

¹⁷— Вуна Завай хъсанди вуч я лагьана вучиз хабар кьазва? — лагьана Исади — Хъсанди анжах са Аллагь я. Ваз эбеди уьмуьр кӀанзаватӀа, Аллагьдин тагькимар кьилиз акъуд.

¹⁸— Гьи тагькимар? — мад хабар кьуна а касди. — «Ягъна рекьимир, зинавал ийимир, чуьнуьхмир, тапан шагьидвал ийимир, — лагьана Исади. —

¹⁹Жуван диде-бубадин хатур-гьуьрмет хуьх». «Жув хьиз жуван мукьув гвайдини кӀан хьухь».

²⁰— Абур вири за кьилиз акъудзава, заз вуч кимизва? — лагьана жегьил гадади.

²¹— Ваз камал авай инсан жез кӀанзаватӀа, алад, фена вахъ вуч аватӀа, гьабур маса гана, кесибриз пая, гьа чӀавуз вахъ цавара хазинаяр жеда. ГьакӀ авурла, захъ галаз ша, — жаваб гана Исади.

²²И гафар ван хьайила, жегьил пашмандаказ хъфена, вучиз лагьайтӀа, адахъ зурба девлет авай.

²³Исадини Вичин тилмизриз лагьана: — За квез рикӀивай лугьузва: девлет авайбуруз Цаварин Пачагьлугъдиз гьахьиз гзаф четин я хьи!

²⁴Мадни За квез лугьуда: девлет авайдаз Цаварин Пачагьлугъдиз гьахьунилай деведиз рапунин хъуькъуьмдай экъечӀун регьят я.

²⁵И гафар ван хьайила, Адан тилмизри, гзаф мягьтел хьанва, хабар кьуна: — АкӀ хьайила, бес нивай вич хилас ийиз жеда?

²⁶Абуруз килигна, Исади лагьана: — Инсанрилай а кар алакьдач, амма Аллагьдилай алакьдачир затӀни авач.

²⁷Адаз жаваб яз Петруди лагьана: — Ингье, вири туна, чун ви гуьгъуьна аваз атана; бес икӀ авунай чаз вуч гуда?

²⁸— За квез рикӀивай лугьузва: цӀийи дуьньяда Инсандин Хцикай тахтуна нурни баркалла алай пачагь хьайила, куьн Исраилдин цӀикьвед тайифадин гьахъ-дуван ийиз цӀикьвед тахтуна ацукьда, — лагьана Исади. —

²⁹Зи хатурдай вичин кӀвалерилай, стхайрилай, вахарилай, бубадилай, дидедилай, аялрилай, мулкарилай гъил къачурбурукай вишра артух гьа мал-девлет гьалт тийидай садни амукьдач, абур эбеди уьмуьрдин иесияр жеда.

³⁰Исятда вилик квай гзафбур кьулухъ жеда, кьулухъ галайбур — вилик.