Read Lezgi New Testament – ЦӀийи Икьрар МатӀай 20 Bible Online

МатӀай 20 - Lezgi New Testament – ЦӀийи Икьрар bible

МатӀай 20

¹Цаварин Пачагьлугъ экуьнин кьиляй вичин ципицӀбагъда кӀвалахдай ксар кьаз фейи са касдиз ухшар я.

²КӀвалахайбуруз йикъа са динар гудай меслят хьана, ада абур вичин ципицӀбагъдиз ракъурна.

³Экуьнин сятдин кӀуьдриз хьиз ам базардин майдандилай тӀуз фидайла, адаз ана са карни тийиз акъвазнавай са шумуд кас акуна.

⁴Ада абуруз лагьана: «Куьнни зи ципицӀбагъдиз алад, квез къведай гьакъи за гуда».

⁵Абур фена. Нисинрихъ хьиз ам мад анал фена, гьа виликдай авурвал авуна, ахпа сятдин пудриз хьиз мад хъфена. Адал мадни гьахьтин инсанар гьалтна.

⁶Сятдин вадриз хьиз ам мад анал хтана, анал акъвазнавай маса инсанар акурла, ада хабар кьуна: «Куьн са карни тийиз югъди инал вучиз акъвазнава?»

⁷«Чаз садани кӀвалах ганач», — жаваб гана абуру. «Куьнни зи ципицӀбагъдиз алад», — лагьана ада.

⁸Югъ няни хьайила, ципицӀбагъдин иесиди вичин гъилибандиз эверна лагьана: «КӀвалахайбуруз эверна, эхирдай кьурбурулай эгечӀна эвелдай кьурбурал къведалди виридаз чпин зегьметдин гьакъи це».

⁹Сятдин вадаз кьур гьар садаз са динар гана.

¹⁰Сифте кьурбуру чпиз гзаф гуда лагьана фикирнай, амма абурузни гайиди са динар хьана.

¹¹Гьакъи къачурдалай кьулухъ абуру наразивилелди иесидиз лугьуз хьана:

¹²«И инсанри кӀвалахайди анжах са сят я, амма вуна абур чахъ галаз сад авуна. Кьилин кӀукӀ кузвай ракъиник кӀвалахар авурбур чун ятӀани, вуна гьакъи виридаз сад хьиз гана».

¹³«Дуст, за ви хатурдик хкӀурзавач; чун са динардал икьрар хьайибур туширни?» — абурукай садаз жаваб яз лагьана ада. —

¹⁴«Жуваз къвезвай гьакъини къахчуна жуван рехъди ахлад; ваз кьванди и эхирдай атайдазни гуз кӀанзава заз.

¹⁵Заз жуван кӀвале жуваз кӀандайвал ийидай ихтияр авачни мегер? Я тахьайтӀа зи гъилин ахъавал акваз ви вил къаних хьанвани?»

¹⁶Гьа икӀ исятда кьулухъ галайбур вилик жеда, вилик квайбур — кьулухъ.

¹⁷Ярусалимдиз фидай рекье Исади Вичин цӀикьвед тилмиздиз са къерехдиз эверна, лагьана:

¹⁸— Ингье, чун Ярусалимдиз физва, Инсандин Хва хаинвилелди чӀехи хахамринни тавратдаррин гъиле твада, абуруни Ам кьиникьиз акъудда.

¹⁹Ам римвийрин гъиле твада. Абуру, ягьанатар авуна, гатана, Ам хашуниз яда. Пуд лагьай юкъуз Адал чан хкведа.

²⁰Гьа арада Исадин патав вичин рухваярни галаз Зебедеян паб атана, Адавай са вуч ятӀани тӀалабиз кӀанз, Адаз икрам авуна.

²¹Исади адавай хабар кьуна: — Ваз вуч кӀанзава? — Ви Пачагьвал алукьайла, къуй и зи кьве хцикай сад Ви эрчӀи патавай, муькуьдини чапла патавай ацукьрай, — лагьана Ада.

²²Амма Исади лагьана: — Куьне тӀалабзавайдакай квез хабар авач. За чӀугвазвай азаб квевай чӀугваз жедани? — Жеда, — жаваб гана абуру.

²³— Зи гъам-пияла куьнени хъвада, амма Зи эрчӀи ва чапла патаривай ацукьун — ам Завай ихтияр гуз жедай кӀвалах туш — лагьана Исади. — А чкаяр Зи Бубади низ тайинарнаватӀа, гьабурунбур я.

²⁴И гафарин ван хьайила, амай цӀуд илчидиз кьве стхадикай гзаф хъел атана.

²⁵Исади абур кӀватӀна лагьана: — Вири халкьарихъ гуждалди агъавал ийизвай вилик-кьилик квай инсанар ава, вири халкьарал чӀехи ксари гьакимвал ийизва. Квез и кар чида.

²⁶Амма куь арада акӀ тахьурай: куь арадай низ вилик-кьилик жез кӀанзаватӀа, къуй ам куь кьилел-кӀвачел элкъуьрай.

²⁷Куь арада низ сад лагьай чкадал жез кӀанзаватӀа, гьам квез лукӀ хьун лазим я.

²⁸Гьа икӀ Инсандин Хвани Вичиз масадбуру къуллугъ авун патал ваъ, Вич масадбуруз къуллугъ ийиз атанвайди я. Ам, гзафбурун гунагьрилай гъил къахчун патал, Вичин чан эцигиз атанвайди я.

²⁹Исани тилмизар Еригьандай хъфизвайла, абурун гуьгъуьна аваз гзаф халкь къвезвай.

³⁰Ингье, рекьин къерехдив ацукьнавай кьве буьркьуьда, Иса чпин виликай физвайдакай ван хьайила, гьарайиз хьана: — Чаз регьим ая, Агъа, Давуд пачагьдин Хва!

³¹Гзафбуру абуруз лал хьухь лагьана, амма абуру амайдалайни кӀевиз гьараярна: — Чаз регьим ая, Агъа, Давуд пачагьдин Хва!

³²Исади, акъваз хьана, абуруз Вичин патав эверна. — Квез Завай вуч кӀанзава? — хабар кьуна Ада.

³³— Я Агъа, чаз Вуна чи вилер сагъар хъувуна кӀанзава, — лагьана абуру.

³⁴Исади, абурун язух атана, абурун вилерик гъил кяна. Гьасятда абурун вилериз экв хтана. Абур Исадин гуьгъуьна гьатна фена.