Read Lezgi New Testament – ЦӀийи Икьрар МатӀай 22 Bible Online

МатӀай 22 - Lezgi New Testament – ЦӀийи Икьрар bible

МатӀай 22

¹Исади чӀехи хахамризни фарисейриз мад са кьиса ахъайна:

²— Цаварин Пачагьлугъ вичин хциз мехъер ийиз гьазур хьанвай са пачагьдив гекъигиз жеда.

³Ада вичин лукӀар мугьманриз мехъерик эвериз ракъурна. Амма ша лагьайбуруз къвез кӀан хьанач.

⁴Ада мад вичин маса лукӀар ракъурна лагьана: «За теклифнавайбуруз фена лагь: „тӀуьн-хъун за гьазурнава, хвенвай данаярни жунгавар тукӀунва, вири гьазур я. Ша мехъерин межлисдиз“».

⁵Ша лагьайбуру мад адан теклиф япа кьун тавуна, гьар сад санихъ фена: садбур чпин никӀерал фена, садбур чпин алвердин гуьгъуьна гьатна;

⁶амайбуру адан лукӀар кьуна, абур гатана, яна кьена.

⁷А крарикай ван хьайи пачагьдиз хъел атана. Ада вичин кьушунар ракъурна абур телефна ва абурун шегьерни кана.

⁸Ахпа ада вичин лукӀариз лагьана: «Мехъерин межлис гьазур я, амма межлисдиз теклифнавайбур лайихбур хьанач.

⁹ГьакӀ хьайила алад куьчейрай тӀуз, гьалтай-гьалтайдаз зи межлисдиз теклифа».

¹⁰Абуру фена чпел гьалтай кьван хъсан ва пис инсанар кӀватӀна, межлис абуралди ацӀурна.

¹¹Ахпа пачагь вичин мугьманриз килигиз атана, абурун арада адаз мехъерихъ галаз кьан тийизвай парталар алай са кас акуна.

¹²«Ихьтин пекер алаз вун иниз гьикӀ атанва, дуст кас?» — лагьана адаз пачагьди. Ада жаваб ганач.

¹³Инал пачагьди вичин кьилел-кӀвачел элкъвезвайбуруз лагьана: «Адан гъилерни кӀвачер кутӀунна, къачуна ам мичӀи къецел гадара, ана жедайди шел-хвални сарар регъуьнар я».

¹⁴Ша лагьанвайбур гзаф жеда, амма абурукай хкянавайбур — тӀимил.

¹⁵Гьадалай кьулухъ фарисеяр анай экъечӀна, Иса гафунал гьикӀ кьаз жедатӀа лугьуз, меслятар ийиз хьана.

¹⁶Абуру Адан патав Гьируд пачагьдин терефдарарни галаз чпин тилмизар ракъурна. — Я Муаллим! — лагьана тилмизри. — Вун гьакъикъи я, Вуна, садазни гардан кӀирвал тавуна, Аллагьдин рекьер дуьздаказ къалурзава. Вун масадаз чин чуьхуьдай гафар талгьудай инсан тирди чаз чизва.

¹⁷ГьакӀ хьайила Вуна чаз лагь: Римдин пачагьдиз харж гун дуьз кар жезвани, жезвачни?

¹⁸Амма Исади, абурун чӀуру фикирар чиз, лагьана: — Кьве чин алайбур! Куьне вучиз Зун кӀеве твазва?

¹⁹Харжунай гана кӀанзавай пул куьне Заз къалура. Абуру динар гъана.

²⁰— Идал алай шикил ва кхьенвай тӀвар нинди я? — хабар кьуна Исади.

²¹— Пачагьдинди я, — жаваб гана абуру. — Гьавиляй пачагьдин пай пачагьдиз це, Аллагьдин пай — Аллагьдиз, — лагьана Исади.

²²И гафарин ван хьайила, абур мягьтел хьана. Ам анал туна, абур хъфена.

²³Гьа юкъуз Исадин патав кьейидалай кьулухъ инсандал чан хкведач лугьудай сакъаяр атана,

²⁴Адавай хабар кьуна: — Муаллим! Мусади лагьанай: «Стхайрикай сад аялар тахьана кьейитӀа, къуй муькуь стхади адан паб къахчуна вичин стхадин тухум кухтурай».

²⁵Чи арада ирид стха хьана. Сад лагьайда паб гъана, амма вич кьена. Адахъ аялар тахьуниз килигна, адан паб кьвед лагьай стхадиз хкана.

²⁶Гьам хьиз кьвед лагьайдини, пуд лагьайдини, гьатта ирид лагьай стхани кьена.

²⁷Эхирдай гьа пабни кьена.

²⁸Ам вири стхайрик гъуьлуьк хьуниз килигна, абурал чан хтайдалай кьулухъ а паб ирид стхадикай гьи стхадин паб жеда?

²⁹— Квез я Калам, я Аллагьдин къуват течидайвиляй куьн гъалатӀ жезва, — жаваб гана Исади. —

³⁰Чан хтайла инсанрин арада я папар гъунар, я гъуьлуьз финар хъжедач. Абур цавараллай малаикар хьиз жеда.

³¹Кьейибурал чан хтуникай рахайтӀа, квез и кардикай Аллагьди вуч лагьанватӀа куьне кӀелначни?

³²Ада лагьанай: «Зун Ибрагьиманни, Исакьанни, Якьубан Аллагь я». Ам кьейибурун ваъ, чан алайбурун Аллагь я.

³³И гафарин ван хьайи халкь Адан гафарал мягьтел хьана.

³⁴Исади Вичин жавабралди сакъаяр кӀеве туна лагьай ван галукьай фарисеяр санал кӀватӀ хьана.

³⁵Абурукай са тавратдарди, Иса кӀеве тваз кӀанз, хабар кьуна:

³⁶— Я Муаллим! Аллагьдин вири тагькимрикай важибди гьим я?

³⁷Исади лагьана: — «Жуван Ребби Аллагь рикӀин вири сидкьидай, жуван вири руьгьдалди, жуван вири кьатӀунралди кӀан хьухь».

³⁸Им сифтегьан ва лап важиб авай тагьким я.

³⁹Гьадаз ухшар тир кьвед лагьай тагькимни ава: «Жув хьиз жуван мукьув гвайдини кӀан хьухь».

⁴⁰Къанун ва пайгъамбаррин ктабар и кьве тагькимдал акъваз хьанва.

⁴¹Ахпа санал кӀватӀ хьайи фарисейриз Исади суал гана:

⁴²— Месигьдикай куьне вуч фикирзава? Ам нин хва я? — Давуд пачагьдин Хва я, — жаваб гана абуру.

⁴³— Бес Руьгь акатай Давуд пачагьди вучиз Месигьдиз Агъа лугьузвай? — хабар кьуна Исади. — Давуда лагьана:

⁴⁴«Реббиди зи Агъадиз лагьанай: „Ви душманар За Ви кӀвачерик вегьидалди Зи эрчӀи гъилихъай ацукь“».

⁴⁵Давуд пачагьди Месигьдиз Агъа лугьуз хьайила, Ам адан хва гьикӀ жезвайди я?

⁴⁶Садавайни са жавабни гуз хьанач ва гьа йикъалай эгечӀна мад Адавай са куьникайни хабар кьадай жуьрэт абуру хъувунач.