Read Lezgi New Testament – ЦӀийи Икьрар МатӀай 27 Bible Online

МатӀай 27 - Lezgi New Testament – ЦӀийи Икьрар bible

МатӀай 27

¹Пакагьан экуьнахъ вири чӀехи хахамарни агъсакъалар, Иса гьикӀ рекьидатӀа лугьуз меслятар ийиз, кӀватӀ хьана.

²Ам кутӀунна, тухвана Римдин сердер ПилатӀан гъиле туна.

³Исадиз кьиникьин жаза ганвайди Ам маса гайи Ягьудаз чир хьайила, Ягьуд авур кардал пашман хьана. Ада, фена, чӀехи хахамривни агъсакъалрив къанни цӀуд гимиш вахгана,

⁴лагьана: — Тахсир квачир инсан маса гана, за гунагь авуна. — Чаз вуч ава? — лагьана абуру. — Абур ви къайгъуяр я!

⁵Вичив гвай гимишар Аллагьдин КӀвализ гадарна, Ягьуда фена вичи вич куьрсарна.

⁶ЧӀехи хахамри гимишар кӀватӀ хъувуна, лагьана: — Абур Аллагьдин КӀвалин хазинадик кутуна виже къведач, абур ивидихъ ганвай гьакъи я.

⁷Меслят авуна, а гимишрихъ абуру «ГетӀехъандин чил» лугьудай чка, къурабаяр кучукун патал, маса къачуна.

⁸Гьаниз килигна къенин йикъал къведалди а чилиз «Ивидин чил» лугьузва.

⁹Гьа икӀ, Ермиягь пайгъамбарди лагьай ихьтин гафар кьилиз акъатна: «Исраилдин рухвайри Адан къимет къанницӀуд гимиш тайинарна.

¹⁰Абуру а пулунихъ, Реббиди эмир авурвал, „ГетӀехъандин чил“ къачуна».

¹¹Иса сердердин вилик акъвазна. Ада Исадивай хабар кьуна: — Вун чувудрин Пачагь яни? — Вуна гьа икӀ я лугьузва, — жаваб гана Исади.

¹²ЧӀехи хахамрини агъсакъалри Адак тахсирар кутадайла, Ада гьич жавабни ганачир.

¹³Гьанлай ПилатӀа Адаз лагьана: — Вак кутазвай кьван тахсирар ваз аквазвачни?

¹⁴Амма Вичик кутазвай са тахсирдизни Исади яб тагуз акурла, сердер пара мягьтел хьана.

¹⁵Гьар Песагь суварин юкъуз сердерди халкьди тӀвар эцигай са кас къазаматдай азад хъийидай адет хьанвай.

¹⁶Гьа чӀавуз Бараб тӀвар алай машгьур са тахсиркар къазаматда авай.

¹⁷Вири кӀватӀ хьайила, ПилатӀа хабар кьуна: — Квез за вуж ахъайна кӀанзава: Бараб ахъайдани, я тахьайтӀа Месигь лугьудай Иса?

¹⁸ПилатӀаз хахамрин кьилевайбуру Иса чпин пехилвиляй вичин гъиле тунвайди чизвай.

¹⁹ПилатӀ дуванбегдин чкадал ацукьнавай вахтунда, адан патав са кас атана ва адан папа лагьай гафар тикрарна: — А Кас гьахъ-михьиди я, Адаз са затӀни мийир, сенфиз за ахвара Ам себеб яз гзаф азабар чӀугуна.

²⁰Амма чӀехи хахамрини агъсакъалри Бараб азад хъувуна Иса кьиникьиз акъудун лазим тирдахъ халкь чӀалахъарна.

²¹Гьанлай сердерди абурувай хабар кьуна: — Квез за и кьведакай гьим ахъайна кӀанзава? — Бараб, — лагьана абуру.

²²— Месигь лугьузвай Исадиз за вуч авун лазим я? — лагьана ПилатӀа. — Хашуниз ягъ Ам! — жаваб гана вирида.

²³— Ада вуч пис кар авуна кьван? — лагьана ПилатӀа. Амма халкьди амайдалайни кӀевиз гьараяр авуна: — Хашуниз ягъ Ам!

²⁴ПилатӀавай халкь секинариз жезвачир. Жемятдик мадни гзаф гъулгъула акатзавай. И кар акурла, ПилатӀа, яд къачуна, халкьдин вилик вичин гъилер чуьхвена, лагьана: — И Муъминдин Иви авахьунай зак тахсир квач, ам куь кӀвалах я.

²⁵— Къуй Адан Ивидин жаваб гудайбур чунни чи аялар хьурай! — жаваб гана халкьди.

²⁶Гьа чӀавуз ПилатӀа Бараб ахъайна, Исани къамчидалди гатана, хашуниз ягъ лагьана эмирна.

²⁷Гьанлай сердердин аскерри Иса гьукумдардин кӀвалерин гьаятдиз тухвана, гьана вири аскерар Исадин патав кӀватӀна.

²⁸Исадал алай пекер хтӀунна, абуру Адал яру пекер алукӀна,

²⁹кьилелни къакъвадин таж эцигна, Адан эрчӀи гъилени лаш туна, Адан вилик метӀер яна, абуру рахшанддалди лугьуз хьана: — Чувудрин Пачагь сагъ хьурай!

³⁰ГьакӀ лугьуз абуру Адаз тфуяр гуз хьана, ахпа Адан гъиляй лаш акъудна, гьадалди Адан кьил гатаз эгечӀна.

³¹Адакай ягьанатар авуна куьтягь хьайидалай кьулухъ, Исадилай яру пекер хтӀунна, Адал Вичин парталар алукӀна, гьанлай Ам хашуниз ягъиз тухвана.

³²Абур фидайла, абурал киринейви Симун лугьудай са кас гьалтна, абуру Исадин хаш адав гужалди тухуз туна.

³³Абур ГалгутӀ, яни Пел лугьудай чкадив агакьна.

³⁴Исадиз абуру туькьуьлвал квай чехир гана, амма адан дад акурла, Адаз ам хъваз кӀан хьанач.

³⁵Иса хашуниз ягъайдалай кьулухъ, Ам хашунал алаз хкажайбуру Адан пекер, чип вегьиз, пайна.

³⁶Ахпа анал ацукьна Адан къаравул чӀугваз хьана.

³⁷Адан кьилихъ тахсиркарвилер къалурдай кьул яна. Адал кхьенвай: «Им Чувудрин Пачагь Иса я».

³⁸Исадихъ галаз санал хашариз кьве къучини янай: сад Адан эрчӀи, муькуьдини — чапла патавай.

³⁹Патавай физвайбуру, Адакай чӀурукӀа рахаз, чпин кьилер юзуриз, лугьуз хьана:

⁴⁰— Эй, Аллагьдин КӀвал чукӀурна пуд йикъан къене эхциг хъийидайди! Вун Аллагьдин Хва ятӀа, жува жув хилас ая, хашунилай эвичӀ!

⁴¹Гьа и жуьреда чӀехи хахамри, тавратдарри ва агъсакъалрини рахшанд кваз лугьудай:

⁴²— Масадбур Ада хиласдай, гила Вичивай Вич хилас ийиз жезвач. Ам Исраилдин Пачагь ятӀа, хашунилай гила эвичӀрай. ЭвичӀна акуртӀа, Ам Месигь тирдан чун чӀалахъ жеда!

⁴³Ада Аллагьдихъ далу акалнавай; Аллагьдиз Ам багьа ятӀа, къуй Аллагьди Ам хилас авурай. Ада лагьанай хьи бес: «Зун Аллагьдин Хва я».

⁴⁴Адахъ галаз санал хашуниз янавай къачагърини Адаз экъуьгъзавай.

⁴⁵Нисинрихъ вири чилел мичӀ акьалтна, сятдин пудралди гьакӀ амукьна.

⁴⁶Сятдин пудаз хьиз Исадай гьарай акъатна: — Эли, эли! Лема сабахтани? Яни: я Аллагь! Я Аллагь! Вуна Зун вучиз туна?

⁴⁷Адан ван атай гьанал алай са бязибуру лагьана: — Килиг садра, Ада Ильясаз эверзава.

⁴⁸Абурукай сада, чукурна фена, цуру чехирдай кьежирнавай мант, лашунин кӀвенкӀвел гьалдна, Исадин сивихъ авуна.

⁴⁹— Акъваз кван, — лугьуз хьана амайбуру, — Ам хилас ийиз Ильяс къведатӀа килигин чун.

⁵⁰Исадай мад кӀевиз гьарай акъатна. Гьа инал Адан чан хкатна.

⁵¹Гьасятда Аллагьдин КӀвале авай пердени виняй агъуз пад хьана, залзала хьана, рагар пад-пад хьана.

⁵²Кьейибур динжарнавай кьветӀерикай са гзафбур ачух хьана, Аллагьдиз талукь са хейлин кьейибурал чан хтана.

⁵³Исадал чан хтайдалай кьулухъ абур чпин кьветӀерай экъечӀна, Ярусалимдиз — пак шегьердиз — фена. Абур гзафбуруз акуна.

⁵⁴Иса хуьзвай аскерризни абурун кьилевайдаз залзала ва маса хьайи крар акурла, гзаф кичӀе хьана, лагьана: — РикӀивайни Ам Аллагьдин Хва тир!

⁵⁵Анал яргъал акъвазна гзаф папарни алай. Абур, Иса Галилейда авай вахтунда, Адан гуьгъуьна гьатна, Адаз къуллугъ авурбур тир.

⁵⁶Абурун арада Маждалдай тир Майрам, Якьубанни Юсуфан диде Майрам ва Зебедеян паб авай.

⁵⁷Няни хьайила, Исадин тилмиз хьайи АриматӀайдай тир Юсуф тӀвар алай девлет авай са кас ПилатӀан патав атана.

⁵⁸Ада ПилатӀавай Исадин мейит вичив вахгун тӀалабна. ПилатӀа мейит вахгун эмирна.

⁵⁹Юсуфа Исадин мейит къахчуна, ам михьи кушдин кафандик кутуна,

⁶⁰вич кьейила динж авун патал вичи цӀийиз рага атӀанвай кьветӀе-сура туна. КьветӀин сивихъни са чӀехи къван агалдна, ам хъфена.

⁶¹Маждалдай тир Майрамни муькуь Майрам кьветӀен къаншарда ацукьнавай.

⁶²Гуьгъуьнин юкъуз, ам Киш югъ тир, ПилатӀан патав чӀехи хахамарни фарисеяр кӀватӀ хьана.

⁶³— Агъа, — лагьана абуру, — гьеле а тапархъандал чан аламаз, Ада «Пуд йикъалай Зал чан хкведа» лагьайди чи рикӀел хтана.

⁶⁴ГьакӀ хьайила, пуд лагьай югъ алукьдалди, Адан мейит авай кьветӀ хъсандиз хуьдайвал эмир це, Адан тилмизри, йифиз атана, Ам чуьнуьхун мумкин я. Ахпа абуру халкьдиз «Кьенвай Адал чан хтана» лугьуз къекъведа. ГьакӀ хьайитӀа, Адан эхиримжи таб эвелимжидалай писди жеда.

⁶⁵— Квехъ аскерар гала, — лагьана ПилатӀа, — алад, квез чидайвал хуьх.

⁶⁶Абуру кьветӀен патав атана, къванцел муьгьуьр эцигна, кьветӀен патав къаравулар акъвазарна.