Read Lezgi New Testament – ЦӀийи Икьрар МатӀай 28 Bible Online

МатӀай 28 - Lezgi New Testament – ЦӀийи Икьрар bible

МатӀай 28

¹Пакамахъ фад, гьафтедин сад лагьай юкъуз[9] Маждалдай тир Майрамни муькуь Майрам кьветӀен патав атана.

²Гьа чӀавуз зурба залзала хьана, Реббидин малаик цаварилай эвичӀна, кьветӀен сиве тунвай къван алудна, гьадал ацукьнавай.

³Адан акунар цӀайлапандиз ухшар тир, адан пекерни жив хьиз лацу тир.

⁴КичӀевиляй къаравулрикни адан вилик зурзун акатна, абур мейитар хьиз хьана.

⁵Малаикди элкъвена папариз лагьана: — КичӀе жемир, куьн хашуниз янавай Исадихъ къекъвезвайди заз чизва.

⁶Ам ина амач. Ада Вичи лагьайвал, Адал чан хтанва. Фад инал ша, ингье Ам эцигай чкани.

⁷Гьерекатна фена Адан тилмизриз Адал чан хтайдакай хабар це. Ам Галилейдиз тилмизрилайни вилик атана акъатдайди абурун рикӀел хкваш. Абуруз Ам гьана аквада. Ингье за квез вири гафар лагьана.

⁸Тадиз кьветӀяй экъечӀна, папари кичӀевал ва зурба хвеш кваз Исадин тилмизриз хабар гуз чукурна.

⁹Фидай рекье абурал садлагьана Иса гьалтна. — Хийирар хьуй! — лагьана Ада абуруз. Абуру Адав агатна, Адан кӀвачер кьуна, икрам авуна.

¹⁰Гьанал Исади абуруз лагьана: — КичӀе жемир. Фена Зи стхайриз Галилейдиз алад лагь, абуруз Зун гьана аквада.

¹¹Папар тилмизриз лугьуз фидайла, къаравулрикай са бязибур шегьердиз фена, абуру хьайи агьвалатдикай чӀехи хахамриз хабар гана.

¹²Агъсакъалрихъ галаз меслят авуна, адалай кьулухъ абуру къаравулриз бегьем пул гана,

¹³лагьана: — Куьне виридаз лугьун лазим я: «Чун ксанвайла, йифиз Адан тилмизри атана Адан мейит чуьнуьхна».

¹⁴Адакай сердердиз ван хьайитӀа, чна адан хъел иликьарда, квез са писвални тахьун патал, чна къайгъу чӀугвада.

¹⁵Абуру, пул къачуна, чпиз лагьайвал авуна. А хабар къенин йикъал къведалдини чувудрин арада чкӀана ама.

¹⁶ЦӀусад тилмиз Галилейдиз Исади чпиз ша лагьай дагъдиз фена.

¹⁷Иса акурла, вирида Адаз икрамна, амма са бязибуру шак авуна.

¹⁸Абурун мукьув хьана, Исади лагьана: — Чилелни цавара вири Зи Гъиле ава.

¹⁹ГьакӀ хьайила алад, вири халкьарин инсанрикай зи тилмизар ая. Бубадин, Адан Хцин ва Пак Руьгьдин ТӀварцӀелай абурув цик акахьун къачуз тур.

²⁰За квез авур эмирар кьилиз акъудиз абуруз чира. Эхир алукьдалди Зун гьар юкъуз квехъ галайди чир хьухь.