Read Lezgi New Testament – ЦӀийи Икьрар МатӀай 3 Bible Online

МатӀай 3 - Lezgi New Testament – ЦӀийи Икьрар bible

МатӀай 3

¹Гьа йикъара Ягьудатдин кьурумда инсанриз Ягья пайгъамбар пайда хьана.

²Ада икӀ лугьузвай: — Ша Аллагьдин рекьел элячӀ, Цаварин Пачагьлугъдин чӀав атана мукьва хьанва.

³Яшай пайгъамбарди лагьай гафарни Ягьядикай я: «Кьурумда гьарайзавайдан ван чкӀида: „Реббидиз рехъ гьазура, Ам къведай рехъ дуьзра“».

⁴Ягьядал деведин сун пекер алай, адан юкьвани тумаждин чӀул авай. Ада незвайди цицӀерни чӀуру чӀижерин вирт тир.

⁵Гьа чӀавуз адан патав Ярусалимдайни вири Ягьудатдай ва Ярдан вацӀун къерехра авай чкайрай инсанар къвезвай.

⁶Абуру чпин гунагьар хиве кьазвай, Ягьядин кап алаз Ярдан вацӀа цик акахьун къачузвай.

⁷Вичин патав цик акахьун къачун патал къвезвай гзаф фарисеярни сакъаяр акурла, Ягьяди абуруз лагьана: — Эй гъуьлягъдин къеняй акъатайбур! Аллагьди хъиляй ацӀана квез гудай жазадикай квевай катиз жеда лагьай фикир куь кьилера ни туна?

⁸Къуй куь хъсан крарин майвайри куьн Аллагьдин рекьел атанвайди къалуррай.

⁹«Чи буба Ибрагьим я» лугьуз ацукьмир. За квез лугьузва хьи, Аллагьдивай и къванерни Ибрагьиман веледриз элкъуьриз жеда.

¹⁰ЯкӀвни датӀана тарарин пунарив гьазур я: хъсан майваяр тегъидай гьар са тар атӀана цӀуз гадарда.

¹¹Квез Аллагьдин рекьел къвез кӀан хьайила, за квев цик акахьун къачуз тада. Амма залай кьулухъ къведайди залайни гзаф къудрат авайди жеда. Зун Адан кӀвачин къапар гваз къекъуьнизни лайих туш. Ада квев Пак Руьгьдик ва цӀук акахьун къачуз тада.

¹²Адан йирф Вичин гъиле ава, Ада Вичин рат михьда, гатай къуьл Вичин бегьер хуьдай чкадиз кӀватӀда, нагъварни хкахь тийидай цӀал куда.

¹³Гьа чӀавуз Иса Галилейдай Ярдан вацӀал Ягья пайгъамбардин патав цик акахьун къачун патал атана.

¹⁴Ягья Ам акъвазариз алахъна. — Зав Вуна цик акахьун къачуз туна кӀандай чкадал Вун цик акахьун къачуз зи патав вучиз атанва? — лагьана ада.

¹⁵— Исятда гьакӀ хьурай, — жаваб гана Исади. — Исятда чна Аллагьдиз кӀанзавайди кьилиз акъудайтӀа дуьз жеда. Гьа икӀ, Ягьяди Адав цик акахьун къачуз туна.

¹⁶Иса, цик акахьун къачуна, цяй экъечӀдайла, цавар ахъа хьана. Ягьядиз Исадал лифрен шикилда аваз Аллагьдин Руьгь эвичӀайвал ва Адал амукьайвал акуна.

¹⁷Цаварай рахадай ван атана: — Ам Зи рикӀ алай Хва я, Зи шадвал Гьадалди я.