Read Lezgi New Testament – ЦӀийи Икьрар МатӀай 4 Bible Online

МатӀай 4 - Lezgi New Testament – ЦӀийи Икьрар bible

МатӀай 4

¹Руьгьди Иса, иблисди рекьяй акъуддатӀа чирун патал, кьурумдиз тухвана.

²ЯхцӀур юкъузни яхцӀур йифиз сив хвейидалай кьулухъ Исадиз гишин хьана.

³Иса рекьяй акъудиз кӀанзавай иблис Адав агатна. — Вун Аллагьдин Хва яз хьайила, и къванер фаз элкъуьрдай эмир це, — лагьана ада.

⁴Амма Исади жаваб гана: — Каламда кхьенва: «Инсандал алай чан тек са фалди туш. Инсанди Реббидин сивяй акъатзавай гьар са гафуналди уьмуьр тухузвайди я!»

⁵Ахпа Ам иблисди пак шегьердиз тухвана, ана Ам Аллагьдин КӀвалин виридалайни кьакьан чкадал хкажна: — Вун Аллагьдин Хва яз хьайила, агъуз хкадра, — лагьана ада. — Каламда кхьенва: «Аллагьди Вичин малаикриз Вун хуьх лугьуз тапшуругъ гуда. Абуру Вун Ви кӀвач къванцихъни галукьар тавуна гъилерал кьуна тухуда» .

⁷— Каламда мадни кхьенва, — жаваб гана Исади, — «Виридан Ребби тир Аллагь синагъ ийимир».

⁸Иблисди Иса мад са кьакьан дагъдал тухвана. Ада Исадиз дуьньядин вири пачагьлугъар чпин зурбавиле къалурна.

⁹— МетӀерал акъвазна заз икрам авуртӀа, ибур вири за Ваз гуда, — лагьана иблисди.

¹⁰Гьа чӀавуз Исади лагьана: — Алат Залай, иблис, Каламда кхьенва: «Реббидиз, ви Аллагьдиз, икрама, са Гьадаз къуллугъни ая».

¹¹Гьанлай иблисди Ам секиндиз туна. Малаикри атана Исадиз къуллугъ ийиз хьана.

¹²Исадиз Ягья къазаматда тунвайдакай хабар хьайила, Ам Галилейдиз фена.

¹³Назаретдай акъатна, Ам Забулунанни Нифталидин чилер хьайи чкада вирин къерехда авай Кефернагьум шегьерда акъвазна.

¹⁴Гьа икӀ, Яшай пайгъамбарди лагьай ихьтин гафар кьилиз акъатна:

¹⁵«Вирел фидай рекье Ярдандин атӀа пата авай чил! Эй, Забулунан чил, эй, Нифталидин чил! Эй чувудар туширбур авай Галилей!

¹⁶МичӀивилик ацукьнавай халкьдиз чӀехи нур акуна, уьлкведа ажалдин хъендик ацукьнавайбурузни нурди экв гана».

¹⁷Гьа чӀавалай Исади вязер ийиз хьана: — Ша Аллагьдин рекьел элячӀ, Цаварин Пачагьлугъдин вахт атана мукьва хьанва.

¹⁸Садра Галилейдин вирин къерехдай фидайла, Исадиз гъетягъар тир кьве стха — Петру лугьузвай Симунни адан стха Эндирей акуна. Абуру вириз чил вегьизвай.

¹⁹Исади абуруз лагьана: — Зи гуьгъуьнаваз ша. За квекай инсанар кьадай гъетягъар ийида.

²⁰Чпин чилерни туна, абур гьасятда Адан гуьгъуьнаваз фена.

²¹Са кьадар мад фейила, Исадиз маса кьве стха — Зебедеян хва Якьубни адан стха Ягья акуна. Абуру, чпин буба Зебедеяхъ галаз луьткведа ацукьна, чилер туькӀуьр хъийизвай. Гьабурузни Исади Вичихъ галаз ша лагьана.

²²Чпин бубани луьткве туна, Якьубни Ягья гьасятда Адан гуьгъуьна аваз фена.

²³Иса вири Галилей тирвал къекъвезвай, Ада Цаварин Пачагьлугъдин вахт атуникай Шад Хабар гузвай. Ада синагугра чирвилер гузвай ва гьар жуьре азарарни начагъвилер квайбур сагъар хъийизвай.

²⁴Суьрия тирвал Адакай ван-сес чкӀана; Адан патав гьар жуьредин азарар квайбур, жинерар квайбур, чӀур жедайбур, фалужди янавайбур ва масабур гъизвай. Ада вири сагъар хъийиз хьана.

²⁵Адан гуьгъуьна Галилейдайни ЦӀуд-Шегьердай, Ярусалимдайни Ягьудатдай ва Ярдан вацӀ галай патайни халкь гьатна.