Read Lezgi New Testament – ЦӀийи Икьрар МатӀай 5 Bible Online

МатӀай 5 - Lezgi New Testament – ЦӀийи Икьрар bible

МатӀай 5

¹Къвезвай кьван халкь акурла, Иса пелел хкаж хьана. Ам анал ацукьайла, Адан патав тилмизар агатна.

²Ам абуруз чирвилер гуз эгечӀна:

³— Бахтавар я Аллагьдин вилик затӀни авачирбур, Цаварин Пачагьлугъ гьабурунди я!

⁴Бахтавар я шехьзавайбур, Аллагьди абуруз теселли гуда!

⁵Бахтавар я умунбур, абуруз ирсинай чил акъатда!

⁶Бахтавар я гьахъ-михьивилихъ гишинбур ва къанихбур, абур тух жеда!

⁷Бахтавар я регьим гвайбур, абуруз Аллагьди регьим ийида!

⁸Бахтавар я михьи рикӀ авайбур, абуруз Аллагь аквада!

⁹Бахтавар я ислягьвал гъизвайбур, абуруз Аллагьдин веледар лугьуда!

¹⁰Бахтавар я Аллагьдиз кӀанзавайди кьилиз акъудзава лугьуз хурук кутунвайбур, Цаварин Пачагьлугъ гьабурунди жеда!

¹¹Зи терефдарар я лугьуз, инсанри куь намусдик хкӀурдайла, куьн хурук кутадайла, куьне жуьреба-жуьре чӀуру крар авуна лугьуз квек квачир тахсирар кутадайла, куьнни бахтавар жеда.

¹²Куьне чӀехи шадвилер ая, цаварал квез Аллагьди зурба савкьват гьазурнава. Квелай вилик хьайи пайгъамбарарни гьа икӀ хурук кутунай.

¹³Куьн чилин кьел я. Кьелен ери квахьайтӀа, ам гьикӀ уькӀуь хъийиз жеда? Мад ам са куьнизни герек хкведач, ам инсанрин кӀвачерик гадарда.

¹⁴Куьн дуьньядин экв я. Дагъдин кукӀушдал эцигнавай шегьер чуьнуьхариз жедач.

¹⁵КуькӀуьрнавай шем къапунин кӀаник кутадач, кӀвале авайбуруз экв гун патал, ам шемерганда твада.

¹⁶Гьа саягъда куь экуьнини инсанриз экв гун лазим я. Абуруни, куьне ийизвай хъсан крар акваз, цавараллай куь Бубадин тариф ийида.

¹⁷Куьне Зун Мусади кхьенвай Къанун ва пайгъамбаррин кхьинар чӀуриз атанва лугьуз фикирмир. Зун абур чӀуриз ваъ, абуру лагьай кьван вири крар кьилиз акъудиз атанвайди я.

¹⁸За квез рикӀивай лугьузва: цаварни чил амай кьван гагьда Къанунда кхьенвайбур кьилиз акъат тавунмаз, анай гьич са гъвечӀи гьарфни, гьич са цӀарни квахьдач.

¹⁹Гьа икӀ, ни и гъвечӀи тагькимрикай сад хьайитӀани чӀурайтӀа ва гьакӀ амай инсанриз абур чӀуриз чирайтӀа, Цаварин Пачагьлугъда ам виридалайни гъвечӀиди жеда. Ни и тагькимар кьилиз акъудиз хьайитӀа ва абур кьилиз акъудиз масадбуруз чириз хьайитӀа, гьам Цаварин Пачагьлугъда чӀехиди жеда.

²⁰За квез лугьузва хьи, куьне Аллагьдиз кӀанзавайди тавратдаррилайни фарисейрилай хъсандиз кьилиз акъудиз тахьайтӀа, квевай Цаварин Пачагьлугъдиз гьахьиз жедач.

²¹Дегь чӀавара инсанриз лагьай гафар квез ван хьана: «Ягъна рекьимир», «Ни яна кьейитӀа, адан дуван авуна кӀанда».

²²Амма За квез лугьузва хьи, жуван стхадикай хъел къвезвайдан дуванни авуна кӀанда. Ни вичин стхадиз «Вун са затӀни туш» лагьайтӀа, адан дуван Меслягьатди авун герек я. Ни са масадаз «КӀамаш» лагьайтӀа, ам жегьеннемдин цӀуз аватун герек я.

²³Гьа икӀ, вун къурбангандал Аллагьдиз къурбанд авун патал, хеб-мал гваз атайла, ви рикӀел ви стхадин рикӀ вакай ханвайди хтайтӀа, вав гвай къурбандар са къерехдив тур. Фена сифте жуван стхадихъ галаз туьхкӀуькӀ, ахпа хтана жуван къурбандар ая.

²⁴

²⁵Вахъ галаз гьуьжетарзавайда вун дувандиз тухузватӀа, аниз фидай рекье адахъ галаз туьхкӀуьз алахъ. ТахьайтӀа, ада вун дуванбегдин, дуванбегдини вун вичиз куьмекарзавайдан гъиле твада, адани вун къазаматда твада.

²⁶За ваз рикӀивай лугьузва: вал алай бурж эхиримжи кепекдал къведалди вахгун тавунмаз вун къазаматдай акъатдач.

²⁷Инсанриз лагьай гафар квез ван хьана: «Зинавал ийимир».

²⁸Амма За квез лугьузва хьи, гьар вуж са папаз темягьдалди килигайтӀа, ада вичин рикӀе адахъ галаз зинавал авуна.

²⁹ЭрчӀи вили вун гунагь ийидай йикъаз гъизватӀа, вуна ам акъудна гадара: ви вири беден жегьеннемдин цӀуз аватдалди, бедендин са чка терг хьун ваз хъсан я.

³⁰ЭрчӀи гъили вун гунагь ийидай йикъаз гъизватӀа, вуна ам атӀана гадара, ви вири беден жегьеннемдин цӀуз аватдалди, бедендин са чка терг хьун ваз хъсан я.

³¹Мадни лагьанва хьи, вуж вичин папахъ галаз чара жезватӀа, къуй ада чара хьунин гьакъиндай чар кхьирай, ахпа чара хьурай.

³²Амма За квез лугьузва: вуж явавал ийизвачир вичин папахъ галаз чара жезватӀа, ада вичин папаз зинавалдай рехъ ачухзава; рахкурнавай паб ни гъайитӀа, гьадани зинавал ийизва.

³³Дегь чӀавара инсанриз мад лагьай гафарни квез ван хьана: «Кьур кьин чӀурмир, Аллагьдин вилик жуван кьинер кьилиз акъуд».

³⁴Амма За квез лугьузва: гьич кьин кьамир: я цаварал кьамир — ам Аллагьдин тахт я;

³⁵я чилел кьамир — ам Ада кӀвачер эцигдай куьсри я; я Ярусалимдал кьамир — ам чӀехи Пачагьдин шегьер я;

³⁶я жуван кьилел кьинер кьамир — вавай ви са чӀарни я лацу, я чӀулав ийиз жедач.

³⁷Амма куь гаф я «эхь», я «ваъ» хьурай. А гафарилай артух гафар хьайитӀа, абур шийирдивай я.

³⁸Инсанриз лагьай гафарикай квез хабар я: «Ви вил акъудайтӀа, вунани вил ахкъуд, свах акъудайтӀа — свах».

³⁹Амма За квез лугьузва: ваз шийир авурдалай кьисас къахчумир. Гьадалайни артух яз, ни ви эрчӀи хъвехъ ягъайтӀа, адахъ муькуь хъвехъни элкъуьра.

⁴⁰Низ вун дувандиз вугана ви перем къакъудиз кӀан хьайитӀа, адав жуван абани гахце.

⁴¹Ни вун вичихъ галаз са милдин мензилдиз физ мажбурайтӀа, вун адахъ галаз кьве милдин мензилдиз алад.

⁴²Вавай тӀалабдайдаз це. Вавай бурж къачуз кӀанзавайдахъ далу элкъуьрмир.

⁴³Инсанриз лагьай гафар квез ван хьана: «Жуван мукьув гвайди кӀан хьухь», «душманар — такӀан».

⁴⁴Амма За квез лугьузва хьи, жуван душманарни кӀан хьухь, куьн хурук кутазвайбурун гьакъиндай дуьа ая.

⁴⁵ИкӀ авуртӀа, куьн цавараллай куь Бубадин аялар тирди чир жеда. Ада Вичин ракъинин нурар пис инсанрални хъсанбурал сад хьиз ракъуриз тазва. Гьахъ-михьибурални, гьахъ-михьи туширбурални Ада марфни сад хьиз ракъурзава.

⁴⁶Квез куьн кӀандайбур кӀандатӀа, идакай квез вуч суваб жеда? И кар харж кӀватӀдайбуруни ийизва.

⁴⁷Куьне салам анжах жуван дустариз гузватӀа, ина кьетӀен вуч кар ава кьван? Мажусийрини гьакӀ ийизвачни?

⁴⁸Цавараллай куь Бубадик нукьсан квачирвал, куьнни нукьсан квачиз хьухь.