Read Lezgi New Testament – ЦӀийи Икьрар Марк 1 Bible Online

Марк 1 - Lezgi New Testament – ЦӀийи Икьрар bible

Марк 1

¹Аллагьдин Хва Иса Месигьдикай Шад Хабардин эвел ихьтинди я.

²Яшай пайгъамбарди Вичин ктабда «Килиг, Валай вилик За Зи чархачи ракъурзава, ада Ви вилик Вун къведай рехъ гьазурда».

³«Кьурумда гьарайзавайдан ван чкӀида: „Реббидиз рехъ гьазура, Адан рехъ дуьзди ая“» кхьенвайвал,

⁴инсанрив цик акахьун къачуз тадай Ягья кьурумда пайда хьана. Ада, куьн Аллагьдин рекьел ша, и кар кьиле тухунин лишан яз, цик акахьун къачу ва гьа чӀавуз Аллагьди гъил къахчуда лугьуз, вязер-несигьатар гузвай.

⁵Вири Ягьудатдай ва Ярусалимдай адан патав инсанар къвезвай, чпин гунагьар хиве кьазвай ва адан кап алаз Ярдан вацӀа цик акахьун къачузвай.

⁶Ягьядал деведин сун пекер алай, юкьвани тумаждин гьяркьуь чӀул авай. Ада незвайди цицӀерни чӀуру чӀижерин вирт тир.

⁷Вичин вязера ада лугьузвай: — Зи гуьгъуьнлай къвезвайди залай къудрат авайди я. Зун Адан кӀвачин къапарин чӀулар ахъайизни лайих туш.

⁸За квев цик акахьун къачуз туна, Ада, лагьайтӀа, квев Пак Руьгьдик акахьун къачуз тада.

⁹Са юкъуз Исади, Галилейда авай Назарет шегьердай атана, Ягьядин гъил алаз Ярдан вацӀа цик акахьун къачуна.

¹⁰Иса цяй экъечӀдайла, Адаз цавар ахъа хьана ва лифрен шикилда аваз цаварилай Вичин винел эвичӀзавай Руьгь акуна.

¹¹Цаварилай рахадай ван атана: — Вун Зи РикӀ алай Хва я, Зи шадвал Валди я.

¹²Идалай кьулухъ гьасятда Руьгьди Иса кьурумдиз тухвана.

¹³Ана Ам яхцӀур юкъуз ничхиррин арада, Вич рекьяй акъудиз кӀанзавай иблисдин хурук хьана. Адаз малаикри къуллугъ ийизвай.

¹⁴Ягья къазаматда турдалай кьулухъ, Иса Галилейдиз Аллагьди ракъурдай Шад Хабардикай муштулухар гуз фена.

¹⁵— Аллагьди пачагьвал ийидай вахт атана мукьвал хьанва! — лагьана Ада. — Ша Аллагьдин рекьел элячӀ, Шад Хабардин чӀалахъ хьухь!

¹⁶Садра Галилейдин вирин къерехдай физвайла, Исадиз гъетягъар тир Симунни адан стха Эндирей акуна. Абуру вириз чил вегьизвай.

¹⁷— Зи гуьгъуьнаваз ша, — лагьана Исади. — За квекай инсанар кьадай гъетягъар ийида.

¹⁸Чпин чилерни туна, стхаяр Адан гуьгъуьнаваз фена.

¹⁹Са тӀимил кьван мад рехъди фейила, Исадиз Зебедеян рухваяр тир Якьубни Ягья акуна. Абуру, луьткведа ацукьна, чилер туькӀуьр хъийизвай.

²⁰Гьасятда Исади Вичихъ галаз гьабурузни ша лагьана. Чпин буба Зебедейни адан гъилик кӀвалахзавайбур луьткведа туна, Якьубни Ягья Адан гуьгъуьнаваз фена.

²¹Абур атана Кефернагьум шегьердиз акъатна. Киш юкъуз Иса синагугдиз фена ва инсанриз чирвилер гана.

²²Вири Адан несигьатрал гьейран хьанвай, вучиз лагьайтӀа Исади тавратдарри хьиз ваъ, гьукум гвайда хьиз Вичин чирвилер инсанрив агакьарзавай.

²³И чӀавуз ана чӀуру жин квай са кас авай.

²⁴— Ваз чавай вуч кӀанзава, Назаретви Иса? — гьарайна ада. — Вун чи эхир ийиз атанвайди яни? Вун вуж кас ятӀа заз чизва. Вун Аллагьдин Пакди я!

²⁵— Лал хьухь! ЭкъечӀ адай! — эмир гана Исади жинжиз.

²⁶А кас зурзурна, чӀуру жин гьарай галаз адай акъатна.

²⁷Вири мягьтел хьана. — Им вуч лагьай чӀал я? — сада садавай хабар кьаз хьана абуру. — Ибур чаз ван тахьай гафар я! Адахъ гьатта чӀуру жинерризни кваз эмирдай къуват ава, жинерарни Адаз табий жезва.

²⁸Гьа чӀавалай Адакай вири Галилейда ва патарив гвай чкайра ван-сес чкӀана.

²⁹Синагугдай экъечӀна, Иса Якьубни Ягья галаз Симунанни Эндиреян кӀвализ фена.

³⁰Симунан яран диде ифин кваз къатканвай, абуру Исадиз адан гьалдикай ихтилатна.

³¹Папан патав атана, Исади гъил кьуна ам къарагъарна. Адан ифин алатна. Паб абурун кьилел-кӀвачел элкъвез эгечӀна.

³²Нянихъ рагъ акӀизвайла, Исадин патав азарри кьунвайбурни жинерар квайбур гъиз хьана.

³³Шегьердавай кьванбур вири Ам авай кӀвалин ракӀарихъ кӀватӀ хьана.

³⁴Адани жуьреба-жуьре азарар квай гзафбур сагъар хъувуна, гзафбурукай жинерар хкудна. Ада Вич вуж ятӀа чизвайдакай рахун жинерриз къадагъа авуна.

³⁵Экуьнахъ фадамаз, рагъ экъечӀдалди къарагъна, Иса, дуьаяр авун патал, касни авачир чкадиз фена.

³⁶Симун ва адан юлдашар Исадин гуьгъуьна гьатна.

³⁷Ам жагъайла, абуру лагьана: — Вири Вахъ къекъвезва.

³⁸— Ша чун мукьув гвай хуьреризни шегьерриз фин, — лагьана Исади. — За гьанра Шад Хабардикай муштулухар гуда, Зун атунни гьа кар патал авунвайди я.

³⁹Гьа икӀ, Ада, вири Галилейда къекъвез, синагугра Шад Хабардикай муштулухар гузвай ва жинерар хкудзавай.

⁴⁰Садра Исадин патав жузам азарди кьунвай са кас атана ва метӀер чилиз яна, минетар ийиз лагьана: — Ваз кӀан хьайитӀа, Вавай зун сагъар хъийиз жеда!

⁴¹Исадиз адан язух атана, адак гъил кяна, лагьана: — КӀанзава заз. Сагъ хъхьухь!

⁴²Гьасятда жузам хкатна, ам михьи хъхьана.

⁴³А кас гьанал рахкурдалди вилик Исади адаз кӀевелай тагькимна:

⁴⁴— Килиг гьа, гьич садазни чуькьмир, амма, хахамдин патав фена, жув гьадаз къалура. Вуна азар хкатунин сагълугъдай Мусадин Къанундив кьадай къурбандни це. Гьа идалди вун сагъ хъхьанвайди чир хьурай.

⁴⁵А инсанди, анай хъфена, виридаз хьайи-хьайивал ихтилатиз хьана. Гьавиляй, Исадивай ачухдаказ шегьерриз хъфиз жезвачир. Ам шегьердин къерехда касни авачир чкайра акъваззавайтӀани, Адан патав виринрай инсанар къвезвай.