Read Lezgi New Testament – ЦӀийи Икьрар Марк 11 Bible Online

Марк 11 - Lezgi New Testament – ЦӀийи Икьрар bible

Марк 11

¹Исани тилмизар Зейтун пелен ценерив гвай Бетфагдивни Бетандив агакьна. Ярусалим, лагьайтӀа, лап мукьварив гвай. Исади Вичин тилмизрикай кьвед ракъурна,

²абуруз лагьана: — Куь вилик квай хуьруьз алад. Финни кумаз квез гьаятда кутӀуннавай хам лам аквада, адал садрани инсан акьахайди туш. А лам ахъайна иниз гъваш.

³Квез «Куьне вуч ийизва?» лугьудай кас хьайитӀа, куьне адаз икӀ лагь: «Ам Агъадиз герек я, Ада ам вав ахгакьарда».

⁴Абур фена. Агакьайла, къецихъай варарал кутӀуннавай жегьил лам акуна. Абуру ам ахъайна.

⁵Анал акъвазнавай са бязибуру лагьана: — Куьне вуч ийизва? Лам вучиз ахъайзава?

⁶Абуру Исади лагьайвал жаваб гана. АтӀабуруни абуруз лам тухудай ихтияр гана.

⁷Абуру ламрал чпин пекер-парталар вегьена, ам Исадин патав гъана, ва Ам гьадал ацукьна.

⁸Гзафбуру чпин пекер хтӀуниз, муькуьбуру тарарин хилер атӀуз, Исадин вилик рекьел экӀягъиз хьана.

⁹Вилик квайбуруни кьулухъ галайбуру гьарай къачуна лугьузвай: — Гьасанна![3] Реббидин ТӀварцӀелай Къвезвайдаз шукур хьурай!

¹⁰Чи бубайрин буба Давудан гележегда жедай пачагьвилиз шукур хьурай! Цавариз шукур хьурай!

¹¹Иса Ярусалимдиз гьахьна. Ам Аллагьдин КӀвализ фена. И патаз, а патаз вил яна, вахт гежди хьуниз килигна, Вичин цӀикьвед илчини галаз Бетандиз рекье гьатна.

¹²Бетандай экъечӀай пакагьан юкъуз Адаз гишин хьана.

¹³Яргъалай Исадиз пешери кьунвай инжилдин тар акуна. Адалай затӀ жагъидатӀа лугьуз фена. Атана килигайла, пешерилай гъейри Адаз затӀни гьатнач, вучиз лагьайтӀа инжилар кӀватӀдай вахт хьанвачир.

¹⁴Исади тарциз лагьана: — Ви майваяр садрани мад садани туьхтӀуьрай! И гафарин ван Адан тилмизризни хьанай.

¹⁵Исани тилмизар Ярусалимдиз атана. Аллагьдин КӀвалин гьаятдиз гьахьайла, Иса ана авай алверзавайбурни муьштерияр чукуриз эгечӀна. Ада пул дегишарзавайбурунни лифер маса гузвайбурун экӀягъанар ярхарна.

¹⁶Аллагьдин КӀвалин гьаятдай тӀуз шейэр тухудай ихтияр Ада садазни гузвачир.

¹⁷Ада абуруз несигьат кваз лагьана: — «Зи кӀвализ вири халкьар патал дуьаяр ийидай кӀвал лугьуда» лагьана Каламда кхьенвачни? Амма куьне ам къучийрин макандиз элкъуьрнава!

¹⁸И гафарин ван тавратдарризни чӀехи хахамриз атана. Абур Ам тергдай са рекьихъ къекъвез хьана. Абуруз Адахъай кичӀезвай, вучиз лагьайтӀа халкьдиз Исадин чирвилери зурба таъсир ийизвай.

¹⁹Няни хьайила, Ам тилмизрихъ галаз шегьердай экъечӀна хъфена.

²⁰Экуьнахъ инжил таран патавай фидайла, абуруз ам михьиз кьуранваз жагъана.

²¹Исадин лянет рикӀел хтана, Петруди Исадиз лагьана: — Муаллим! Килиг, Вуна агь авур инжилдин тар кьурана.

²²— Аллагьдихъ иман ийиз хьухь, — жаваб гана Исади. —

²³За квез рикӀивай лугьузва: ни и пелез, рикӀе шак тун тавуна, агъунваз «Къарагъ, жува жув вириз вегь» лагьайтӀа, ада лагьай гафар кьилиз акъатда.

²⁴ГьакӀ хьайила За квез лугьузва: дуьаяр ийидай чӀавуз куьне са затӀ тӀалабиз хьайитӀа, гьам квез гудайвилин чӀалахъ хьухь, квез гунни ийида.

²⁵Квез са никай ятӀани хъел аваз хьайитӀа, дуьаяр ийизвай чӀавуз а касдилай гъил къахчу, цавараллай куь Бубадини куь тахсиррилай гъил къахчуда.

²⁷Исани тилмизар мад Ярусалимдиз хтана. Иса Аллагьдин КӀвале къекъведайла, Адан патав чӀехи хахамар, тавратдарар, агъсакъалар атана.

²⁸— Вуна а крар гьикӀ лагьана ийизва? — жузуна абуру Адавай. — Абур ийидай ихтияр Ваз ни гана?

²⁹— За квевайни са кардикай хабар кьада, куьнени Заз жаваб це; ахпа Зани квез Заз ни ихтияр ганватӀа, лугьуда, — жаваб гана Исади. —

³⁰Ягьяди инсанрив чпиз кӀан хьана цик акахьун къачуз тазвайни, я тахьайтӀа, Аллагьдин къастуналди? Жаваб це Заз.

³¹Абуру веревирдер авуна: — Чна «Аллагьдин къастуналди» лагьайтӀа, Ада хабар кьада: «Бес куьн Ягьядихъ вучиз агъунач?»

³²«Инсанриз кӀан хьана» лугьуз жезвачир — халкьдихъай кичӀе тир, вучиз лагьайтӀа вири халкьди Ягья гьакъикъи пайгъамбар яз гьисабзавай.

³³Гьавиляй абуру Исадиз жаваб гана: — Чаз чидач. — Зани квез а крар, За ни ихтияр гана ийизватӀа, лугьудач, — лагьана Исади.