Read Lezgi New Testament – ЦӀийи Икьрар Марк 12 Bible Online

Марк 12 - Lezgi New Testament – ЦӀийи Икьрар bible

Марк 12

¹Исади Вичин патав атанвай чӀехи хахамриз, тавратдарриз ва агъсакъалриз кьисаяр мисал яз гъиз, суьгьбет ийиз эгечӀна: — Са инсанди ципицӀбагъ кутуна, адалай пару чӀугуна. Фур эгъуьнна, шуткьурган туькӀуьрна, ципицӀбагъдал вил алаз хьун патал минарани эцигна. Ибур вири вичиз кӀвалахиз кьунвай ципицӀбанрив вугана, вич сиягьатдиз фена.

²Вахт атайла, вичиз къвезвай пай къахчун патал, ада вичин нуькеррикай сад ципицӀбанрин патав ракъурна.

³ЦипицӀбанрини ам кьуна, хъсандиз гатана, затӀни гвачиз рахкурна.

⁴Ада аниз муькуь нуькер рекье туна, гьадан кьилни хана, беябур авуна чукурна.

⁵Мад сад рахкурна, гьамни абуру яна кьена. ГьакӀ гьар гъилера атай-атайди я гатадай, я рекьидай.

⁶Эхирни ада «Зи хцикай абуруз регъуь жеда» лагьана, вичин рикӀ алай авай-авачир са хва гьаниз ракъурна.

⁷Амма ципицӀбанри чпи чпиз лагьана: «Им варис я. Ша чна ам рекьин, адан ирсни чаз жеда».

⁸Абуру ам яна кьена, ципицӀбагъдай акъудна гадарна.

⁹Гила ципицӀбагъдин иесиди вуч ийида? Ада атана ципицӀбанар рекьида, ципицӀбагъни масабурун гъиле вугуда.

¹⁰Куьне Каламдай ихьтин гафар кӀелначни бес: «УстӀарри кваз такьуна гадарай къванцикай хандакӀдин пипӀе твадай кьилин къван хьана.

¹¹Бес им аламат тушни кьван чаз аквазвайди».

¹²Кьиса чпикай тирдан гъавурда акьур абуруз Иса кьаз кӀанзавай, амма халкьдихъай кичӀе хьана. Иса гьанал туна, чеб хъфена.

¹³Иса гафунал кьадай къаст аваз, абуру Адан патав фарисейрикайни Гьирудан терефдаррикай са бязибур ракъурна.

¹⁴Абуру атана Адаз лагьана: — Я Муаллим! Вун гьакъикъи ва масадаз чин чуьхуьдай гафар талгьудай инсан тирди чаз чизва. Вуна, садазни гардан кӀир тавуна, Аллагьдин рекьер гьакъикъидаказ къалурзава. Римдин пачагьдиз харж гун дуьз кар жезвани-жезвачни? Чна ам гана кӀанзавани, тагана?

¹⁵Амма Ада, абурал кьве чин алайди чир хьуниз килигна, лагьана: — Куьне вучиз Зун синагъ ийизва? Зун килигун патал са динар гъваш.

¹⁶Абуру ам гъана. — Идал алай шикил ва кхьенвай тӀвар нинди я? — лагьана Ада. — Пачагьдинди я, — жаваб гана абуру.

¹⁷— Пачагьдин пай — пачагьдиз це, Аллагьдин пай — Аллагьдиз, — лагьана Исади. Абур Адан гафари мягьтеларна.

¹⁸Ахпа Исадин патав кьейидалай кьулухъ инсандал чан хкведач лугьудай сакъаяр атана.

¹⁹— Я Муаллим! — хабар кьуна абуру. — Мусади чаз кхьенай: «Стхайрикай сад кьена, аялар галачир паб амукьайтӀа, къуй муькуь стхади адан паб къахчуна вичин стхадин тухум кухтурай».

²⁰Ирид стха хьана: сад лагьай стхади паб гъана, амма ам аялар тахьана кьена.

²¹Адан паб кьвед лагьай стхади къахчуна, аялар тахьана гьамни кьена; пуд лагьай стхани гьакӀ хьана.

²²А паб ирид стхадини къахчунай, амма садахъни аялар хьанач. Абурулай кьулухъ пабни хкьена.

²³Ада ирид стхадик гъуьлуьк хьуниз килигна, абурал чан хтайдалай кьулухъ а паб ирид стхадикай гьи стхадин паб жеда?

²⁴— Квез я Калам, я Аллагьдин къуват тийижирвиляй тушни куьн гъалатӀ жезвайди? — жаваб гана Исади.

²⁵Чан хтайла, инсанрин арада я папар гъунар, я гъуьлуьз финар хъжедач. Абур цавараллай малаикар хьиз жеда.

²⁶Кьейибурал чан хтуникай рахайтӀа, бес куьне Таврат кӀелначни кьван? ЦӀай кьуна кузвай къакъвадин валарин юкьвай Аллагьди Мусадиз ихьтин гафар лугьузвай чка кӀелначни: «Зун Ибрагьиманни, Исакьанни, Якьубан Аллагь я»?

²⁷Аллагь кьейибурун ваъ, чан алайбурунди я. Куьн кӀевелай гъалатӀ жезва.

²⁸Тавратдаррикай сада, Исади сакъайриз гьуьжетра хъсан жавабар гуз акуна, атана Адавай хабар кьуна: — Аллагьдин вири тагькимрикай сифтегьанди гьим я?

²⁹Исади адаз жаваб яз кьилин тагьким лагьана: — «Яб це, Исраил! Чи Ребби Аллагь я, Ребби сад я;

³⁰жуван Ребби Аллагь рикӀин вири сидкьидай, жуван вири руьгьдалди, жуван вири кьатӀунралди, жуван вири амандалди кӀан хьухь». Ингье, сифтегьан тагьким гьа им я!

³¹Кьвед лагьайди ихьтинди я: «Жув хьиз жуван мукьув гвайдини кӀан хьухь». И кьве тагьким вирибурулайни важиб тирбур я.

³²— Хъсан я, Муаллим! — лагьана тавратдарди, — Вуна авайвал лагьана, Аллагь сад я, Адалай гъейри масад авач.

³³Гьам рикӀин сидкьидай, вири кьатӀунралди, вири амандалди кӀан хьун, жуваз жув хьиз, мукьув гвайдини кӀан хьун Аллагьдиз акъуднавай вири къурбандрилайни артух я.

³⁴Ада акьул квай жавабар гуз акуна, Исади лагьана: — Вун Аллагьдин Пачагьлугъдиз гьахьдайвал гьазур хьанва. Мад Адавай са куьникайни хабар кьадай жуьрэт абуру хъувунач.

³⁵Аллагьдин КӀвале чирвилер гун давамариз, Исади лугьуз хьана: — Тавратдарри Месигьдиз Давуд пачагьдин Хва вучиз лугьузвайди я?

³⁶Пак Руьгь акатай Давуд пачагьдин вичин мецелай алатнай: «Реббиди зи Агъадиз лагьанай: „Ви душманар За Ви кӀвачерик вегьидалди Зи эрчӀи гъилихъай ацукь“».

³⁷Давуд пачагьди Месигьдиз Агъа лугьуз хьайила, Ам адан эвлед гьикӀ жезвайди я? Гзаф халкьди хуш аваз Адаз яб гузвай.

³⁸Халкьдиз чирвилер гуз, Исади лугьузвай: — Тавратдаррикай яргъаз хьухь! Абуруз, яргъи пекер алаз, майданрал чеб къалуриз кӀанзава, абурун рикӀ халкьди чпиз гьуьрмет къалурунал ала.

³⁹Синагуграни межлисра абур вилик чкаяр кьаз алахъда.

⁴⁰Абуру, кьве чин алайбуру хьиз, яргъалди дуьаяр ийидай амалар ийиз хендедайрин кӀвал-югъ тӀуьна куьтягьда. Амма Аллагьдин патай абурув лап кӀеви жаза агакьда.

⁴¹Иса, садакьадин пул вегьидай буьруьнждикай авунвай крчунин къаншарда ацукьна, халкьди гьаниз пул гьикӀ вегьизватӀа, килигзавай. Девлет авай гзафбуру пул пара вегьизвай.

⁴²Атай са кесиб хендедади, къапуниз мукьва хьана, кьве чет кепек вегьена.

⁴³Исади, Вичин тилмизрин фикир а папал желбна, лагьана: — За квез рикӀивай лугьузва: и кесиб хендедади амайбурулай гзаф пул вегьена,

⁴⁴вирибуру чпихъ авай артуханди вегьизвай, и папа, вичин кесибвилизни килиг тавуна, вичихъ авай-авачир вири гана.