Read Lezgi New Testament – ЦӀийи Икьрар Марк 13 Bible Online

Марк 13 - Lezgi New Testament – ЦӀийи Икьрар bible

Марк 13

¹Иса Аллагьдин КӀваляй экъечӀдайла, Адан тилмизрикай сада Адаз лагьана: — Муаллим! Килиг садра! Гьихьтин иер къванер, гьихьтин иер дараматар ятӀа!

²— Вун и зурба дараматрал гьейран хьанвани? — лагьана Исади. — Абур вири барбатӀ жеда, къван къванцел аламукьдач.

³Иса Зейтун пелел, Аллагьдин КӀвалин къаншарда ацукьнавайла, Адахъ галаз кьилди амукьай Петруди, Якьуба, Ягьяди ва Эндирея Адавай хабар кьуна:

⁴— Ам мус жедай кар я? Адакай виликамаз хабар гудай ишара гьихьтинди я?

⁵Вичиз гайи суалдиз жаваб яз, Исади абуруз ихтилат ийиз гатӀунна: — Мукъаят хьухь, куьн алцурариз тахьурай!

⁶Гзафбур, чеб Зун я лугьуз, чеб Зи ТӀварцӀелай атанвайди я лугьуз, къведа. Гьадалди абуру гзаф инсанар алцурарда.

⁷Мукьваривай ва я яргъарай дяве физвай ванер къвез хьайила, кичӀе жемир, абур жедай крар я, амма чир хьухь хьи, им гьеле эхир туш.

⁸Халкь халкьдал къарагъда, пачагьлугъни — пачагьлугъдал, чка-чкайра залзалаяр жеда, каш гьатда. Им азаб-азиятрин эвел я.

⁹Амма мукъаят хьухь, инсанри дуванханайра куь дуван аквада, чпин синагугра квез гатунар кьада, Закай шагьидвал авун патал, куьн гьакимринни пачагьрин вилик акъвазарда.

¹⁰Амма эхир жедалди вилик эвелни-эвел кӀанзавайди вири халкьарин арада Шад Хабар чукӀурун я.

¹¹Куь дуван ийидалди виликамаз вуч лугьудатӀа фикирмир; дуванханада куь рикӀел вуч атайтӀа, гьам лагь, куьз лагьайтӀа куь мецелай рахадайди куьн ваъ, Пак Руьгь жеда.

¹²Стхади стха, ажалдин къармахра тун патал, маса гуда, бубадини — вичин веледар; веледарни диде-бубадиз акси экъечӀда ва абур рекьида.

¹³Зи ТӀвар мецел хьуниз килигна, куьн вирибуруз такӀан жеда; эхирдалди эхайди хилас жеда.

¹⁴Тахьана кӀандай чкада авай чкӀайвилин чиркинвал акурла, — кӀелзавайда кьатӀунни авурай, — Ягьудатда авай кьванбур вири, катна фена, дагълара чуьнуьх хьурай.

¹⁵Вуж къавал алаз хьайитӀа, ам герек шей къачуз кӀвализ гьахь тавурай!

¹⁶Вуж чуьлда аваз хьайитӀа, ам винелай алукӀдай вичин пекер къахчуз кӀвализ хъфин тавурай!

¹⁷Гьа чӀавуз руфунал заланбурузни хурухъ аялар галайбуруз гуж жеда!

¹⁸Гьахьтин къада-балаяр галай йикъар хъуьтӀуьз татурай лагьана дуьаяр ая.

¹⁹Аллагьди дуьнья халкьай йикъалай къенин йикъалди тахьай хьтин ва идалай кьулухъ тежедай хьтин мусибат гьа йикъара инсанрин кьилел къведа.

²⁰Реббиди виликамаз гьа мусибатдин йикъар тӀимил авуначиртӀа, чан алай са затӀни хилас жедачир. Амма Вичи хкянавайбурун, Вичин рикӀ алайбурун хатурдай Ада а мусибатдин вахт куьруь авунва.

²¹Гьа чӀавуз квез сада «Ингье, им Месигь я», я тахьайтӀа муькуьда «Ангье, Ам Месигь я» лагьайтӀа, куьн чӀалахъ жемир.

²²Тапан месигьарни тапан пайгъамбарар гзаф акъатда. Абуру гьар жуьредин аламатар ва керемат-ишараяр къалурда, алакьайтӀа, гьатта Аллагьди хкянавайбурни кваз алцурариз алахъда.

²³Амма куьн мукъаят хьухь. Килиг гьа, За квез вири виликамаз лагьанва.

²⁴Ахпа и къада-балаяр алатайдалай кьулухъ къведай йикъара рагъ мичӀи жеда, вацрани экв хгудач.

²⁵Гъетер аватда, цавун къуватар юзада.

²⁶Гьа чӀавуз Инсандин Хва зурба къудратда ва баркаллада, циферин юкьва аваз къвез аквада.

²⁷Гьа вядеда Инсандин Хци, дуьньядин и кьиляй а кьилиз Вичин малаикар ракъурна, Вичи хкянавайбур кӀватӀ хъийида.

²⁸Инжилдин тар квез чешне хьурай: адан хилери тӀурар гъана пеш ахъайиз хьайитӀа, квез мукьвара гад алукьдайди чир жеда.

²⁹За лугьузвайди кьилел къвез акурла, Инсандин Хва куь ракӀарив агакьнавайди квез чир хьухь.

³⁰За квез рикӀивай лугьузва: гилан несил алатна фидалди и крар вири кьилиз акъатда.

³¹Чилни цав алатна фида, амма Зи Гафар алатна фидач.

³²Ам къведай я югъ, я сят садазни чидач, я цавараллай малаикриз, я Хциз. Ам анжах Бубадиз чида.

³³Килиг гьа, уях хьухь, квезни а вахт чизвач!

³⁴А чӀав — кӀвал-югъ туна, кӀвалел элкъвезвайбурун хиве жавабдарвал туна, гьардал ийидай кар тапшуругъ авуна, варарал алайдазни ксумир лагьана, сиягьатдиз фейи инсан хьиз я.

³⁵ГьакӀ хьайила, уях хьухь. КӀвалин иеси няниз ва я кьуланфериз, кӀекер рахадайла ва я пакамахъ — мус хкведатӀа квез чизвач.

³⁶Килиг гьа, ам хтайла, адаз куьн ксанваз жагъун тавурай!

³⁷За квез лугьузвайди вирибурузни лугьузва: уях хьухь!