Read Lezgi New Testament – ЦӀийи Икьрар Марк 14 Bible Online

Марк 14 - Lezgi New Testament – ЦӀийи Икьрар bible

Марк 14

¹Песагь ва ТӀили фарин суварар алукьдалди кьве югъ амай. ЧӀехи хахамарни тавратдарар чпи Иса кьуна рекьидай чинебан са рекьихъ къекъвезвай.

²— Ам сувар юкъуз кьуна виже къведач, халкьдин арада наразивал гьатда, — лугьузвай абуру.

³Иса Бетанда, жузам азарди кьунвай Симунан кӀвале суфрадихъ ацукьнавайла, Адан патав атана са папа, хъенчӀин къапунин кӀуф хана, гьада авай багьа атирар Адан кьилел илична.

⁴Хъел атай са бязибуру чпи чпик лугьуз хьана: — А атирар вучиз гьакӀ серфна вара-зара ийизва?

⁵Ам пуд виш динардилайни[4] багьаз маса гана, а пул кесибрин арада пайиз жедай. Абуру папаз ахмурар ийиз хьана.

⁶Амма Исади лагьана: — Ам секиндиз тур, куьн вучиз адал гьавалат хьанва? Ада Зун патал хъсанвал авуна.

⁷Кесибар датӀана квехъ галаз амукьда, квевай абуруз гьар квез кӀан хьайила хъсанвилер ийиз жеда, амма Зун квехъ датӀана галамукьдач.

⁸А папа вичивай жедайвал авуна: Зал атирар илична, ада Зун сура динжарун патал гьазурна.

⁹За квез рикӀивай лугьузва: Шад Хабардикай вязер ийидай кьван чкайра и папа авур хъсан кардикай рахаз жеда, ам инсанрин рикӀерилай алатдач.

¹⁰Исадин цӀикьвед илчидикай сад тир Искарият Ягьуд, Иса маса гуз кӀанз, чӀехи хахамрин патав фена.

¹¹Адан къаст чир хьайила, хахамриз хвеши хьана ва абуру а кардай адаз пул гун хиве кьуна. Ягьуд, Иса гьикӀ маса гудатӀа лугьуз, са къулай вахтунихъ къекъвез хьана.

¹²ТӀили фарин суварин сад лагьай юкъуз, адет тирвал, Песагьдин тукӀвадай кӀел къурбанддиз акъудна гьазур хьайила, тилмизри Исадиз лагьана: — Ваз Песагь суварин суфрадихъ гьина ацукьиз кӀанзава? Чна фена тӀуьн гьазурда.

¹³Вичин тилмизрикай кьвед рекье твадайла, Исади абуруз лагьана: — Куьн шегьердиз алад. Квел ана цив ацӀай квар гвай са инсан гьалтда; куьн адан гуьгъуьна аваз алад.

¹⁴Ам гьи кӀвализ гьахьайтӀа, гьадан иесидиз «Муаллимди Вичин тилмизрихъ галаз санал Песагь суварин суфра авай кӀвал гьина ава лугьуз хабар кьазва», — лагь.

¹⁵Ада квез вини гьавада авай дигирнавай чӀехи тавдин кӀвал къалурда. Гьана чаз Песагьдин тӀуьн гьазура.

¹⁶Адан тилмизар фена шегьердиз акъатна. Абуруз Исади лагьайвал жагъана. Абуру гьана Песагьдин тӀуьн гьазурна.

¹⁷Няни хьайила, Ам цӀикьвед илчини галаз атана.

¹⁸Суфрадихъ ацукьна фу незвайла, Исади лагьана: — За квез рикӀивай лугьузва: Исятда Захъ галаз санал фу незвай квекай сада Зун хаинвилелди маса гуда.

¹⁹Абур пашман хьана. — Зун яз тахьуй гьа? — са-сада хабар кьуна Адавай.

²⁰— Ам Захъ галаз хуьрекдик кягъиз незвай цӀикьвед касдикай сад я, — лагьана Исади.

²¹Инсандин Хци Вичин уьмуьр Каламда кхьенвайвал тухузва, амма Инсандин Хва маса гудайдан кьилел къведайди ма́са гуж я! А касдиз дуьньядал атаначиртӀа гена хъсан тир.

²²Абур тӀуьник квайла, Исади фу къачуна, хийир-дуьа ийиз-ийиз, ам кӀус-кӀус авуна, тилмизриз пайна. — Ма, къачу, им Зи Беден я! — лагьана Ада.

²³Ахпа Ада сукӀра къачуна, хийир-дуьа авуна, ам абурув вугана. Вирида анай хъвана.

²⁴— Им Зи Икьрардин иви я, — лагьана Исади. — Ам гзафбур хилас хьун патал авахьда.

²⁵За квез рикӀивай лугьузва: къенин йикъалай эгечӀна За мад чехир — ципицӀрин миже хъвадач. ЦӀийи чехир За анжах Аллагьдин Пачагьлугъда хъвада.

²⁶Шукурдин манияр яна, Исани тилмизар Зейтун пелел экъечӀна.

²⁷Ана Исади тилмизриз лагьана: — Къе йифиз куьн садни Зи иман гваз амукьдач. Каламда кхьенвай «За Чубан яна кьейила, лапагар гьар сад санихъ чкӀида» лугьудай гафар Зи кьилел къведа.

²⁸Зал чан хтайла, Зун квелайни вилик Галилейдиз атана акъатда.

²⁹Петруди Адаз лагьана: — Амайбур Ви иман гвачиз амукьайтӀани, зун Ви имандал аламукьда.

³⁰— За ваз рикӀивай лугьузва, — жаваб гана Исади, — къе йифиз кӀекре кьведра гьарайдалди вуна Закай пудра кьил къакъудда.

³¹Амма Петруди рикӀивай лугьуз хьана: — Зун Вахъ галаз санал рекьидай чкадал атайтӀани, Вакай за са чӀавузни кьил къакъуддач. Гьа ихьтин гафар амай тилмизрини лагьанай.

³²Ахпа абур Гетсеман лугьудай чкадиз атана. — За дуьаяр ийидалди куьн инал хьухь, — лагьана Исади Вичин тилмизриз.

³³Ада Вичихъ галаз Петру, Якьуб ва Ягья тухвана. Гьана Адак кичӀевални дарихвал акатна.

³⁴— Зи рикӀ ажалдин тӀалди незва, куьн, ксун тавуна, инал хьухь, — лагьана Ада тилмизриз.

³⁵Са тӀимил анихъ фена, Исади, чинихъди ярх хьана, мумкин кар ятӀа, а пис чӀав Вичелай алатрай лугьуз, дуьаяр авуна.

³⁶— Абба! Буба чан! — лугьуз хьана Ада. — Валай алакь тийидай кар авач; и гъам-пияла Зав хъваз тамир; ятӀани, Заз кӀандайвал ваъ, Ваз кӀандайвал хьурай.

³⁷Элкъвена хтайла, Адаз тилмизар ахварал фенваз акуна. — Я Симун! — лагьана Ада Петрудиз. — Вун ксанвани? Вавай са сятда уяхдиз акъвазиз хьаначни?

³⁸Уях хьухь, куьн темягьра гьат тавурай лугьуз, дуьаяр ая, руьгьдиз кӀан хьайитӀани, беден зайиф яз амукьда.

³⁹Исади, мад къерех хьана, виликдай лагьай гафар тикрар хъийиз, дуьаяр авуна.

⁴⁰Ам хтайла, Адаз абур мад ксанваз жагъана. Абур юргъун хьана, вилер чеб-чпелай ахвариз физвай. Абур вуч жаваб гудатӀа чин тийиз амай.

⁴¹Пуд лагьай гъилера атана, Ада абуруз лагьана: — Куьн мад ксана амани? Ял язавани? Бес я! Вахт атана агакьнава. Ингье, Инсандин Хва гунагькаррин гъиле гьатзава.

⁴²Къарагъ, ша: ангье, Зун маса гузвайди мукьва хьанва.

⁴³Гаф мецел аламаз, Адан цӀикьвед илчидикай сад тир Ягьуд атана акъатна. Адахъ чӀехи хахамри, тавратдарри ва агъсакъалри ракъурнавай гзаф инсанар галай. Абурув турарни вагьрамар гвай.

⁴⁴Хаинди вичихъ галайбур Иса маса гунин ишарадин гъавурда туна: — Низ за салам гана темен гайитӀа, Ам Гьам жеда. Вегьена, Ам яхъ. Килиг, Ам тухудайла, Адалай вил алудиз тахьуй, мукъаят хьухь.

⁴⁵Атанмазни Ягьуда, Исадиз мукьва хьана, «Муаллим!» лагьана, Адаз темен гана.

⁴⁶Гьа инал Ягьудахъ галайбуру вегьена Иса кьуна.

⁴⁷Амма Исадихъ галайбурукай сада вичин тур акъудна, кьилин хахамдин са лукӀ яна, адан яб галудна.

⁴⁸И чӀавуз Исади атанвайбуруз лагьана: — Зун кьун патал, куьн, къачагъ кьаз фидайвал, турарни вагьрамар гваз атанва хьи?

⁴⁹Зун гьар юкъуз чирвилер гуз квехъ галаз санал Аллагьдин КӀвале жедай, амма ана куьне Зак кязавачир. Гила къуй Каламда кхьенвайди Зи кьилел атурай!

⁵⁰Гьа вахтунда вири тилмизар, Ам гьанал туна, катна.

⁵¹КьецӀил жендекдал анжах шаршав алчуднавай са жегьил Исадин гуьгъуьна аваз физвай. Инсанри ам вегьена кьуна.

⁵²Амма ам хъуткьунна, абурун гъиле шаршавни туна, кьецӀила катна.

⁵³Иса кьилин хахамдин патав гъана. Анал чӀехи хахамар, тавратдарар ва агъсакъалар вири кӀватӀ хьанвай.

⁵⁴Петру яргъалай хьиз абурун гуьгъуьна аваз, кьилин хахамдин гьаятдиз кьван атана; гьана ада, цӀун патав нуькеррин арада ацукьна, вичиз чим акъудзавай.

⁵⁵ЧӀехи хахамарни вири Меслягьат, Иса кьиникьиз акъудун патал, Адаз акси делилрихъ къекъвезвай, амма абуруз Адак кутадай тахсирар жагъизвачир.

⁵⁶Гзафбуру Адаз акси тапан шагьидвилер ийизвай, амма абур сад садахъ галаз кьан тийидайбур тир.

⁵⁷Са бязибуру, къарагъиз, ихьтин тапан делилар гъизвай:

⁵⁸— Чаз Ада «Инсандин гъилералди эцигнавай и Аллагьдин КӀвал чӀурна, пуд йикъалай За инсандин гъил галукь тавур масад эхцигда», — лугьуз ван хьана.

⁵⁹Абурун шагьидвилерни сад садав кьунвайбур тушир.

⁶⁰Ахпа кьилин хахам юкьвал экъечӀна. — Вучиз вун чуькьни тавуна акъвазнава? — хабар кьуна ада Исадивай. — Ваз лугьудай гаф авачни? Абур Ваз акси яз экъечӀзава эхир!

⁶¹Амма Ада сивяй са гафни акъуднач. — Шукур хьайи Аллагьдин Хва Месигь Вун яни? — мад хабар кьуна кьилин хахамди.

⁶²— Зун я, — жаваб гана Исади. — Инсандин Хва цаваллай цифераллаз, шукур хьайи Къудрат Авайдан эрчӀи патавай ацукьнаваз квез аквада.

⁶³Инал кьилин хахамди вичел алай пекер къазунна. — Мад чаз шагьидар герек яни кьван? — лагьана ада. —

⁶⁴Адан аси ихтилатар квез ван хьана. Куь фикир гьихьтинди я? Абуру вирида Ам кьиникьиз акъуддай чкадал атанва лагьана.

⁶⁵Са бязибуру Адан чиниз тфуяр вегьена, Адан вилер кутӀуниз, чин ягъиз, Адавай «Ягъайди вуж я, пайгъамбар?» лугьуз хабар кьазвай. Нуькеррини Адан чиниз лапӀашар вегьизвай.

⁶⁶Гьа чӀавуз Петру гьаятда авай. Адан патав кьилин хахамдин къаравушрикай сад атана,

⁶⁷цӀун патав вичиз чим акъудзавай Петру акуна, адаз килигна, лагьана: — Назаретви Исадихъ вунни галай.

⁶⁸Амма Петруди Исадикай кьил къакъудна. — Абур заз чидай крар туш, я вуна вуч лугьузватӀани зун гъавурда гьатзавач, — лагьана ада. Ам экъечӀна вилик квай гьаятдиз фена. И арада кӀекре гьарайна.

⁶⁹Ам мад садра ахкур гьа къаравушди инал акъвазнавайбуруз «Имни гьабурукай я» лагьана.

⁷⁰Ада мад Исадикай кьил къакъудна. Са герендилай анал акъвазнавайбуру Петрудиз мад хълагьна: — Якъин вун гьабурукай я; вун Галилейдай я.

⁷¹— Куьне лугьузвай Инсан заз чидайди туш, — кьин кьуна ада.

⁷²И чӀавуз кӀекре кьвед лагьай гъилера гьарайна. Петрудин рикӀел вичиз Исади лагьай гафар хтана: «КӀекре кьведра гьарайдалди вуна Закай пудра кьил къакъудда». Петру шехьиз эгечӀна.