Read Lezgi New Testament – ЦӀийи Икьрар Марк 15 Bible Online

Марк 15 - Lezgi New Testament – ЦӀийи Икьрар bible

Марк 15

¹Экуьнахъ тадиз чӀехи хахамри агъсакъалрихъни тавратдаррихъ ва Меслягьатда авай вирибурухъ галаз меслятар авуна. Абуру Иса кутӀунна, тухвана ПилатӀан гъиле туна.

²ПилатӀа Адавай хабар кьуна: — Вун Чувудрин Пачагь яни? — Вуна гъа икӀ я лугьузва, — жаваб гана Исади.

³ЧӀехи хахамри Адак гзаф тахсирар кутуна.

⁴ПилатӀа Адавай мад хабар кьуна: — Ваз лугьудай гаф авачни? Вак кутазвай кьван тахсирар Ваз аквазвачни?

⁵Амма Исади и гафаризни жаваб тагайвиляй ПилатӀ пара мягьтел хьана.

⁶Гьар Песагь суварин юкъуз халкьди тӀвар кьур къазаматдавайбурукай сад ПилатӀа ахъайдай адет тир.

⁷Гьа чӀавуз, гъулгъула гьатай вахтунда инсанар кьиниз килигна, Бараб ва са кьадар маса ксар къазаматда тунвай.

⁸Халкьди, кӀватӀ хьана, и гъилерани ПилатӀавай ада гьар сувариз ийизвай кар кьиле тухун тӀалабзавай.

⁹— Квез кӀандатӀа, Чувудрин Пачагь ахъайдани? — жаваб гана ПилатӀа.

¹⁰(ПилатӀаз чӀехи хахамри Иса чпин пехилвиляй вичин гъиле тунвайди чизвай.)

¹¹Амма чӀехи хахамри, Исадилай Бараб ахъаюн хъсан я лугьуз, халкьдик футфа кутазвай.

¹²— Куьне «Чувудрин Пачагь я» лугьузвайдаз за вуч авуна кӀанзава? — мад лагьана ПилатӀа халкьдиз.

¹³— Хашуниз ягъ Ам! — гьарайна абуру.

¹⁴— Ада вуч пис кар авуна кьван? — лагьана ПилатӀа. Амма халкьди амайдалайни кӀевиз гьараяр авуна: — Хашуниз ягъ Ам!

¹⁵Халкьдиз кӀандайвал хьун патал, ПилатӀа Бараб ахъайна. Исани, къамчидалди гатана, хашуниз ягъ лагьана эмирна.

¹⁶Аскерри Иса сердердин кӀвалерин гьаятдин къенез тухвана, гьана вири аскерар кӀватӀна.

¹⁷Абуру Адал яру пекер алукӀна, кьилелни къакъвадин таж эцигна.

¹⁸Гьанлай абуру Адакай ягьанатар ийиз хьана: — Чувудрин Пачагь сагъ хьурай!

¹⁹Абуру лашунал Адан кьил гатазвай, тфуяр гузвай, метӀерал акъвазиз ягьанатдалди Адаз икрам ийизвай.

²⁰Адакай ягьанатар авуна куьтягь хьайидалай кьулухъ, Исадилай яру пекер хтӀунна, Адал Вичин парталар алукӀна. Гьанлай Ам хашуниз ягъиз тухвана.

²¹НикӀяй шегьердиз хквезвай киринейви Симун лугьудай са касдив, Искендеранни Руфан бубадив, Исадин хаш тухуз туна.

²²Ам ГалгутӀ, яни «Генгеш» лугьудай чкадал гъана.

²³Адаз тиряк квай набататдин миже какадарнавай чехир гуз алахъна, амма Ада ам хъванач.

²⁴Иса хашуниз ягъайдалай кьулухъ, Ам хашунал алаз хкажайбуру Адан пекер, чип вегьиз, чпин арада пайиз хьана.

²⁵Ам экуьнин сятдин кӀуьдриз хьиз хашуниз янай.

²⁶Тахсиркарвилер къалурдай кьулунал «Чувудрин Пачагь» кхьена, Адан кьилихъ яна.

²⁷Адахъ галаз санал кьилдин хашариз кьве къучини яна: сад Адан эрчӀи, муькуьдини — чапла патавай.

²⁸

²⁹Патавай физвайбуру, Адакай чӀурукӀа рахаз, чпин кьилер юзуриз лугьуз хьана: — Эй, Аллагьдин КӀвал чукӀурна пуд йикъан къене эхциг хъийидайди!

³⁰Жува Жув хиласа! Хашунилай эвичӀ!

³¹Гьа и жуьреда чӀехи хахамрини тавратдарри рахшанд кваз чпи чпиз лугьузвай: — Масадбур Ада хиласдай, гила Вичивай Вич хиласиз жезвач!

³²И Месигь, Исраилдин Пачагь, гила жедатӀа, хашунилай эвичӀрай. ЭвичӀна акуртӀа, Ам Месигь тирвилин чун чӀалахъ жеда! Адахъ галаз санал хашуниз янавайбуруни Адаз экъуьгъзавай.

³³Нисинрихъ вири чилел мичӀ акьалтна, сятдин пудралди гьакӀ амаз хьана.

³⁴Сятдин пудаз хьиз Исадай гьарай акъатна: — Элаи, Элаи! Лема сабахтани? (Яни: «Я Аллагь! Я Аллагь! Вуна Зун вучиз туна?»)

³⁵Адан ван атай гьанал алай са бязибуру лагьана: — Килиг садра, Ада Ильясаз эверзава.

³⁶Абурукай сада, чукурна фена, цуру чехирдай кьежирнавай мантар, лашунин кӀвенкӀвел акьалжна, Исадин сивихъ тухвана, лагьана: — Акъваз кван, Ам анлай элягъиз Ильяс къведатӀа килигин чун.

³⁷Исадай мад кӀевиз гьарай акъатна. Гьа инал Ада чан гана.

³⁸Аллагьдин КӀвале авай пердени виняй агъуз пад хьана.

³⁹Са вишенкьил къаншарда акъвазнавай. Исадин чан а жуьреда хкатайди акурла, ада лагьана: — И Инсан рикӀивайни Аллагьдин Хва тир.

⁴⁰Анал яргъал акъвазна килигзавай папарни алай. Абурун арада Маждалдай тир Майрам, гъвечӀи Якьубанни Юсидин диде Майрам ва Саламат авай.

⁴¹Абур, Иса Галилейда авай вахтунда, Адан гуьгъуьна гьатна, Адаз къуллугъ авурбур тир. Абурулай гъейри Адан гуьгъуьна аваз Ярусалимдиз атанвай гзаф маса папарни авай.

⁴²Няни хьанвай, суварин вилик квай жуьмядин югъ тир, яни Киш йикъан, Песагь суварин вилик квай югъ.

⁴³АриматӀайдай тир, вични Аллагьди пачагьвал ийидай вахтунал вил алай, Меслягьатдин векил, гьуьрмет авай ксарикай сад тир Юсуфа ПилатӀан патав фин кьетӀна. Ада фена ПилатӀавай Исадин мейит вичив вахгун тӀалабна.

⁴⁴Иса икьван фад кьена лагьана ван хьайила, ПилатӀ мягьтел хьана. Аскеррин кьилевайдаз эверна. — Ам фадлай кьенани? — хабар кьуна ада.

⁴⁵Аскеррин кьилевайдан жаваб чир хьайила, ПилатӀа Юсуфаз мейит къахчудай ихтияр гана.

⁴⁶Адани мейит хашунилай эляна, кафан маса къачуна, Исадал алчудна, Ам рага атӀанвай кьветӀе-сура кучукна. КьветӀин сивихъни къван агулдна.

⁴⁷Маждалдай тир Майрамани Юсидин диде Майрама Исадин мейит эцигнавай чка рикӀел хвена.