Read Lezgi New Testament – ЦӀийи Икьрар Марк 16 Bible Online

Марк 16 - Lezgi New Testament – ЦӀийи Икьрар bible

Марк 16

¹Киш югъ алатайдалай кьулухъ Маждалдай тир Майрама, Якьубан диде Майрама ва Саламата, фена, Исадивай гуьцӀун патал, атирдин ни галай гъерияр маса къачуна.

²Экуьнахъ лап фад, рагъ экъечӀзавайла, гьафтедин сад лагьай юкъуз[5], абур Иса эцигнавай сурун патав атана.

³«КьветӀин сивив агалднавай къван чаз ни алудда?» лугьуз, абур чеб чпихъ галаз рахазвай.

⁴Килигайла, абуруз къван сивихъай гелянаваз жагъана. Къванни зурбади тир.

⁵Суруз гьахьайла, абуруз яргъи лацу пекер алаз эрчӀи пата ацукьнавай жегьил гада акуна. Абуруз гзаф кичӀе хьана.

⁶— КичӀе жемир, — лагьана гадади, — куьн хашуниз янавай Назаретви Исадихъ къекъвезвани? Адал чан хтанва, Ам ина амач. Ингье Ам эцигай чкани.

⁷Алад, фена, Исади Вич Галилейдиз абурулай вилик акъатда лагьана хиве кьурвал жедайвиликай Адан тилмизризни Петрудиз хабар це. Абуруз Ам гьана аквада.

⁸Папар кьветӀяй экъечӀна, чукурна фена. Абурук кичӀевилин зурзун акатнавай. Чпиз акурдакай абурувай кичӀела садазни лугьуз жезвачир.

⁹Экуьнахъ фадамаз, гьафтедин сад лагьай юкъуз, чан хтай Иса сифтени-сифте Маждалдай тир Майраман вилик атана акъатна. Исади адакай ирид жин хкудайди тир.

¹⁰Адани, фена, шез хъукьван тийизвай Исадин тилмизриз хабар гана.

¹¹Амма абур чан хтай Иса Майрамаз акуна лугьудай гафарин чӀалахъ хьанач.

¹²Адалай кьулухъ абур чуьлдай фидайла, абурукай кьведан вилик маса къаматда аваз Иса пайда хьана.

¹³Хтайла, абуруни амайбуруз хабарна, амма гьабурун чӀалахъни хьанач.

¹⁴Эхирни садра фу нез суфрадихъ ацукьнавай цӀусад тилмиздин вилик Иса атана акъатна. Абур чӀалахъ тахьайди ва абурун рикӀерин буьркьуьвал чизвай Ада абуруз туьгьметарна, вучиз лагьайтӀа абур Ам чан хтанваз акурбурун чӀалахъ хьаначир.

¹⁵— Дуьнья тирвал алад ва Шад Хабардикай чан алай кьван виридаз муштулухар це, — лагьана Ада абуруз.

¹⁶— Ни имандал атана цик акахьун къачуртӀа, гьам хиласни жеда; нив иман тахьайтӀа, адаз кар атӀуда.

¹⁷Иман гвайбурун патав ихьтин керемат-ишараяр жеда: абуру Зи ТӀварцӀелай жинерар хкудда, абур цӀийи чӀаларалди рахада;

¹⁸абуру гъуьлягъар гъиле кьада, агъу хъвайитӀа, абуруз са зарарни жедач; азарри кьунвайбурал гъилер эцигайла, абур сагъ хъжеда.

¹⁹Гьа икӀ тилмизрихъ галаз Вичин суьгьбет куьтягь хьайи Ребби Иса, цавариз хкаж хьана, Аллагьдин эрчӀи патавай ацукьна.

²⁰Анай хъфена, тилмизар виринра Шад Хабардикай муштулухар гуз къекъвена. Реббиди, лагьайтӀа, абуруз куьмек гузвай: Вичин патай керемат-ишараяр ракъуриз, Ада абурун гафарин дуьзвал тестикь ийизвай.