Read Lezgi New Testament – ЦӀийи Икьрар Марк 3 Bible Online

Марк 3 - Lezgi New Testament – ЦӀийи Икьрар bible

Марк 3

¹Мад садра Киш юкъуз Иса синагугдиз атана. А юкъуз ана гъил члахъ хьанвай са инсан авай.

²Бязибуру Исадилай вил алудзавачир. Адак тахсирар кутун патал, Ада Киш юкъуз начагъди сагъардатӀа лугьуз, абуру Ам вилив хуьзвай.

³Исади члахъ гъил галай касдиз лагьана: — Виридаз аквадайвал юкьвал акъваз.

⁴Анал алай фарисейризни Ада лагьана: — Киш юкъуз хъсанвал авун лазим яни, я тахьайтӀа писвал? Уьмуьр хвена кӀандани, я тахьайтӀа пучна кӀандани? Амма абурай гафни акъатнач.

⁵Абуруз хъел кваз вил яна, абурун рикӀер къван хьунал гьайиф чӀугуна, Исади а инсандиз лагьана: — Ви гъил инихъ ая кван. Адани лагьайвал авуна. Адан гъил сагъ хъхьана.

⁶Фарисейри, анай экъечӀна, Гьируд пачагьдин терефдаррихъ галаз Иса рекьидай рекьер жагъурун патал меслят авуна.

⁷Иса Вичин тилмизарни галаз вирин къерехдал фена. Галилейдай, Ягьудатдай, Ярусалимдай, Идумейдай, Ярдан вацӀун а патай ва гьакӀни Туьрсдинни Сидундин патарив гвай чкайрайни Адан крарикай хабар авай гзафбур Исадин гуьгъуьна аваз фена.

⁹Гзаф инсанар кӀватӀ хьуниз килигна, Исади, Вич басрухра гьат тавун патал, тилмизриз Вичиз кьилди луьткве гьазура лагьана.

¹⁰Ада гзафбур сагъар хъувуна лугьуз, азарар квайбур, Исади чпик гъил кяна кӀанз, Адав агатиз кӀанз алахънавай.

¹¹ЧӀуру жинерар квайбуру, Ам акурвалди, Адан вилик ярх хьана, гьарайзавай: — Вун Аллагьдин Хва я!

¹²Амма Ада абуруз Вич вуж ятӀа лугьун кӀевелай къадагъа ийизвай.

¹³Ахпа Ам пелел экъечӀна ва Вичиз кӀандайбурузни эверна. Абурни Адан патав атана.

¹⁴Вичихъ галаз са рекье хьун патал ва гьар санихъ Шад Хабардикай муштулухар гуз ракъурун патал, Исади абурукай цӀикьвед кас хкяна. Ада абуруз жинерар хкуддай къуват гана. И цӀикьвед касдиз Исади илчияр лагьана тӀвар гана.

¹⁶Ада хкянавай цӀикьвед илчи ибур тир: Ада Петру лагьана тӀвар гайи Симун,

¹⁷Зебедеян рухваяр Якьубни Ягья (Исади абуруз Бунаржис, яни цавун гугрумрин рухваяр лагьана тӀвар ганвай),

¹⁸Эндирей, ФилипӀ, БартӀаламай, МатӀай, ТӀумай, Гьалфеян хва Якьуб, Тадас, Миллетбаз Симун

¹⁹ва гьакӀни Ам маса гайи Искарият Ягьуд.

²⁰Ам кӀвализ хтайла, аниз мад акьван инсанар атана хьи, Исадизни Адан тилмизриз ацукьна фу недай мажални хьанач.

²¹И кардикай Исадин мукьва-кьилийриз хабар хьайила, абур Ам хутахиз атана, вучиз лагьайтӀа абуру «Ам Вич Вичик квач» лугьуз фикирзавай.

²²Ярусалимдай атай тавратдарри лугьузвай: — Адак жинерин кьил тир Багьал-Зевул акатнава! Жинерар хкуддай къуватни Ада гьадавай къачузва!

²³Инал Исади тавратдарриз эверна, абуруз кьисаяр мисал гъиз эгечӀна: — Иблисди иблис гьикӀ чукурда?

²⁴Са пачагьлугъ сад садаз акси кьве патал пай хьайитӀа, а пачагьлугъ яргъалди амукьдач.

²⁵Хизан кьве патал пай хьайитӀа, а кӀвал чӀур жеда.

²⁶Иблис вич вичиз акси хьайитӀа, иблисдивай давам гуз жедач, адан эхир пуч жеда.

²⁷Низ гуж авай касдин кӀвал атӀуз кӀанзаватӀа, ада эвелни-эвел къуват авайдан гъилер-кӀвачер кутӀунна кӀанда, ахпа адан кӀвал тарашиз жеда.

²⁸За квез рикӀивай лугьузва: инсанрин вири гунагьрилайни, абуру ийизвай чӀуру ихтилатрилайни гъил къахчуда,

²⁹амма вуж Пак Руьгьдикай чӀурукӀа рахаз хьайитӀа, адалай гьич садрани гъил къахчудач. А гунагь инсандик даим кумукьда.

³⁰Иса гьа икӀ рахана, вучиз лагьайтӀа тавратдарри «Адак чӀуру жин акатнава» лугьузвай.

³¹Ахпа Исадин дидени стхаяр атана, къецел акъвазна. Абуру, Исадиз эверун патал, са кас ракъурна.

³²Инсанар Иса юкьва туна ацукьнавай. Абуру Адаз лагьана: — Ингье, ви дидени, стхаярни вахар къецел ала, абуру Вун хабар кьазва.

³³— Зи диде, зи стхаяр-вахар вужар я? — жаваб гана Ада.

³⁴Ацукьнавайбурулай вил элкъуьрна, Ада лагьана: — Ингье Зи диде ва Зи стхаяр-вахар!

³⁵Аллагьдин къаст ни кьилиз акъудзаватӀа, гьам Зи стхани я, вахни я, дидени.