Read Lezgi New Testament – ЦӀийи Икьрар Марк 4 Bible Online

Марк 4 - Lezgi New Testament – ЦӀийи Икьрар bible

Марк 4

¹Исади вирин къерехда мад чирвилер гуз хьана. Вичин патав гзаф инсанар атуниз килигна, Ам луьткведа акьахна. Халкь вирин къерехда амукьна.

²Луьткведа ацукьна, Ада яргъалди Вичин несигьатар кьисайралди инсанрал агакьарзавай. Ада халкьдиз ихьтин кьиса ахъайна:

³— Яб це! Йикъарикай са юкъуз лежбер никӀиз тум цаз фена.

⁴Ада тум вегьидайла, са бязи тварар рекьин къерехрал аватна, алтӀушай къушари абур кӀуфар ягъиз тӀуьна.

⁵Са бязи тварар къван квай чкадиз аватна. И тварар фад экъечӀна, вучиз лагьайтӀа абур накьв тӀимил квай чкадиз аватна.

⁶Рагъ экъечӀайла, цӀирер шуьткьвена, чӀварахар галачирбур хьиз, кьурана.

⁷Са бязи тварар къалгъанар квай чкадиз аватна. Къалгъанри чӀехи жердавай цӀирер пӀуьрчӀуькьарна. Гьавиляй абуру майваяр гъанач.

⁸Амай тварар мублагь чилел аватна ва абуру цӀир авуна, хкаж хьана, майваярни гъана — сада къанницӀуд твар, муькуьда — пудкъад, амайбуруни — виш.

⁹Ахпа Исади хълагьна: — Нихъ япар аватӀа, гьадаз ван атурай.

¹⁰Халкь чкӀана, Иса Вичин цӀикьвед тилмиздихъни Вичин гуьгъуьнавайбурухъ галаз кьилди амукьайла, абуру Адавай кьиса ахъаюнин мана-метлеб вуч ятӀа хабар кьуна.

¹¹— Аллагьди пачагьвал авунин сирер кьатӀун квез ганва; амайбуруз кьисаяр мисал яз гъана кӀанда, — лагьана Исади, —

¹²Каламда лагьанвайвал: «Аллагьдихъ элкъуьн тавун патал ва Ада чпелай гъил къахчун тавун патал, абуруз килигайла аквазвач, яб гайила абур гъавурда акьазвач».

¹³Исади абуруз мад лагьана: — Куьн и кьисадин гъавурда гьатначни? Бес амай кьисайрин гъавурда куьн гьикӀ гьатда?

¹⁴Тум вегьизвайда цазвайди Аллагьдин Гаф я.

¹⁵Рекьин къерехдал аватнавай тум — им ван хьана рикӀера Аллагьдин Гаф гьатнавай, амма ам анай тадиз иблисди ахкъудай инсанар я.

¹⁶Гьа и жуьреда къван квай чкадиз аватнавай тумни — ван хьанмазни гьасятда гаф шадвилелди кьабулдай инсанар я лагьай чӀал я.

¹⁷Амма чпихъ мягькем дувул тахьуниз килигна, абур икӀ яргъалди амукьдач. Чеб а гаф кьуна лугьуз хурук кутурла, кьил баладик акатайла, абур гьасятда рекьяй акъатда.

¹⁸Къалгъанриз вегьенвай тум гафунин ван къвезвайбур я лагьай чӀал я.

¹⁹Амма гьар йикъан къайгъуйри, девлетдихъ вил ичӀи хьуни ва маса къанихвилери ахьтинбурун рикӀера гьатнавай гаф пӀуьрчӀуькьарда, ам бегьер тагудайди ийида.

²⁰Миян чилиз аватнавай тварар — гафуниз яб гана, ам кьабулзавайбур я. Гьа ксари вичин бегьерни гъида — садбуру къанницӀуд гъилера, масабуру пудкъад гъилера, са бязибуру виш гъилерилайни артух бегьер гъида.

²¹Исади абуруз лагьана: — КуькӀуьрнавай шем къапунин кӀаник кутуна туьхуьрун патал, я тахьайтӀа чарпайдин кӀаник эцигун патал гъизвайди яни? Ам шемерганда тун патал гъизвайди тушни кьван?

²²Винел акъат тийидай сирни авайди туш, я ашкара тахьана амукьдай чинебан карни.

²³Нихъ ван къведай япар аватӀа, гьадаз ван атурай.

²⁴Ада мад лагьана: — Исятда квез ван жезвай гафариз хъсандиз яб це. Куьне гьихьтин уьлчмедалди алцумайтӀа, квезни гьахьтин уьлчмедалди алцумда, квез гьатта артухни гуда.

²⁵Авайдаз мадни гуда, авачирдавай гвайдини къакъудда.

²⁶Исади давамар хъувуна: — Аллагьдин Пачагьлугъ инсанди чилиз тум вегьизвайдаз ухшар я.

²⁷Ахпа ам йифиз ксузва, югъ алукьайла къарагъзава. Тум гьикӀ экъечӀзаватӀа, гьикӀ цӀир ахъайзаватӀа, адаз хабарни жедач.

²⁸Чили сифте вичи къаз гъида, ахпа къуьлуьн кьилерив чеб ахъайиз тада, адалайни кьулухъ кьилер тварарай ацӀурда.

²⁹Бегьер агакьайла, инсанди гьасятда мукал гъиле кьада, вучиз лагьайтӀа гвен гуьдай вахт атанва.

³⁰Исади мад лагьана: — Аллагьдин Пачагьлугъ чна куьв гекъигин? Я тахьайтӀа гьихьтин кьисадалди чна адан шикил чӀугван?

³¹Ам финдин тварцив гекъигиз жеда. Ам дуьньяда чилик кутазвай тумарикай виридалайни куьлуь тум я.

³²Амма цайила, адакай экъечӀдай тар амай салан вири набататрилайни чӀехи жеда. Ада чӀехи хилер гъида. Хъен гудай гьа хилерал къушаривай мукар ийиз жеда.

³³Абур гъавурда гьатдай тегьерда Исади гьа ихьтин кьисайралди Аллагьдин гафар абурал агакьардай.

³⁴Кьиса галачиз Ада халкьдиз ихтилат ийидачир, амма тилмизрихъ галаз кьилди амукьайла, Исади абуруз кьисайрин мана ачухардай.

³⁵Гьа йикъан няниз Исади тилмизриз лагьана: — Ша чун вирин а патаз экъечӀин.

³⁶Абурни, халкь туна, Адахъ галаз луьткведа акьахна. Абурун гуьгъуьна маса луьтквеярни авай.

³⁷КӀеви гар акъатна; лепейри, луьткведин къерехрилай хкадриз, ам цяй ацӀурзавай.

³⁸Иса луьткведин кьулухъ кьиле, тумаж акьалжнавай хъуьцуьган кьилик кутуна, ксанвай. Тилмизри Ам ахварай авудна лагьана: — Муаллим! Ваз чун квахьна кӀанзавани?

³⁹Иса къарагъна, гарузни вириз «Кис хьухь, акъваз» лагьана эмир гана. Гар секин хьана, вирин кьуд пата лал кьена.

⁴⁰— Квез вучиз икьван кичӀе я? — лагьана Исади тилмизриз. — Квехъ са тӀимил кьванни иман авачни?

⁴¹Авайдалайни гзаф кичӀе хьайи абуру чпи чпиз лугьуз хьана: — Вирни гар муьтӀуьгъарзавай Им вуж хьуй?