Read Lezgi New Testament – ЦӀийи Икьрар Марк 6 Bible Online

Марк 6 - Lezgi New Testament – ЦӀийи Икьрар bible

Марк 6

¹Анай экъечӀна Иса тилмизарни галаз Вичин ватандиз хъфена.

²Киш югъ алукьайла, Исади синагугда чирвилер гуз гатӀунна. Адаз яб гайи кьванбуру гьейранвилелди лугьуз хьана: — Вичиз гьихьтин камал ганватӀа аку! Ада Вичин гъилералди гьихьтин аламатар къалурзаватӀа килиг! Икьван аламатар Адаз гьинай атанатӀа?!

³Ам харат устӀар тушни? Ам Майраман хва ва Якьубан, Юсидин, Ягьудан ва Симунан стха тушни? Адан вахарни чи арада авачни? Абуруз Ам квазни кьаз кӀан хьанач.

⁴— Пайгъамбар виринра гъилерал жеда, анжах вичин ватанда, юлдашрин ва хизандин арада адаз гьуьрмет жедач, — лагьана Исади абуруз.

⁵Адавай ватанда са аламатни ийиз хьанач, Адалай алакьайди, азарар квай анжах са шумудал гъилер эцигна, абур сагъар хъувун тир.

⁶Ам абурухъ иман тахьунал мягьтел хьана. Ада, патарив гвай хуьрериз физ, гьанра чирвилер гуз хьана.

⁷Исади Вичин патав цӀикьвед илчидиз эверна, абур, Шад Хабар чукӀурун патал, кьве-кьвед ракъуриз хьана. Исади абуруз чӀуру жинерар хкуддай къуватни гана.

⁸— Асадилай гъейри рекьиз затӀни кьамир — я фу, я гьебе, я пул, — эмирна Ада. —

⁹КӀвачел сантӀалар алукӀ, жувал алайдалай гъейри маса пекер алукӀмир.

¹⁰Са шегьердиз фейила, илифай кӀвале эхирдалди акъваз.

¹¹Са чкада куьн кьабул тавуртӀа ва куь чирвилериз яб тагайтӀа, анай экъечӀна хъфидайла, виридаз аквадайвал, куь кӀвачерал ацукьай ругни кӀвах хъувуна ахлад. Гьадалди куьне виликамаз Аллагьди абуруз гудай жазадикай хабарда.

¹²Исадин илчийри фена инсанриз, ша Аллагьдин рекьел элячӀ лугьуз, вязер-несигьатар ийизвай.

¹³Абуру гзафбурукай жинерар хкудзавай, азарар квай гзафбур, зейтундин чӀем гуьцӀиз, сагъар хъийизвай.

¹⁴Исадин ТӀвар машгьур хьанвай, Гьируд пачагьдизни Адакай хабар хьана. Садбуру лугьузвай: — Ам вичел чан хтанвай Ягья пайгъамбар я, гьакӀ хьайила адалай аламатарни алакьзава.

¹⁵Муькуьбуру «Ам Ильяс я», пуд лагьайбуруни «Ам виликан пайгъамбарриз ухшар са пайгъамбар я» лугьузвай.

¹⁶Гьирудаз и ван хьайила, ада лагьана: — Ам за кьил атӀай Ягья я. Адал чан хтанва.

¹⁷Гьа и Гьируда, вичин стха ФилипӀан паб Гьирудат къахчурла, Ягья кьуна къазаматда тун эмирнай,

¹⁸куьз лагьайтӀа Ягьяди адаз лугьуз хьанай: — Жуван стхадин паб къахчун гьарам я.

¹⁹Гьирудатаз адакай акьван хъел авай хьи, адаз Ягья яна рекьиз кӀанзавай, амма алакьзавачир.

²⁰Гьируда Ягья Гьирудатакай хуьзвай. Гьирудаз Ягьядихъай кичӀедай. Ягья пак ва гьахъ-михьи инсан тирди Гьирудаз чизвай, ада Ягьядин ихтилатрихъ рикӀ алаз яб акалдай. А ихтилатри ам кьве рикӀин ийизвайтӀани, ада датӀана абуруз хушвилелди яб гудай.

²¹Амма Гьирудат патал са къулай югъ атана алукьнай. Гьируда, вичин хайи югъ хьуниз килигна, вичин гъилибанриз, аскеррин кьилевайбуруз ва Галилейдин агъсакъалриз эвернай, межлис кутунай.

²²Гьирудатан руша атана кьуьлер ийидайла, ам Гьирудазни адахъ галаз ацукьнавайбуруз рикӀиз чими хьанай. — Завай вуч кӀандатӀани тӀалаба, за ваз гуда, — лагьанай Пачагьди рушаз.

²³Ада рушаз кьин кьунай: — Ваз вуч кӀан хьайитӀа, за ваз гьам гуда, кӀандатӀа ваз зи пачагьлугъдин са пайни гуда.

²⁴Руша экъечӀна вичин дидедивай хабар кьунай: — Адавай вуч тӀалабин? — Ягья пайгъамбардин кьил тӀалаба, — жаваб ганай дидеди.

²⁵Адани, тади кваз пачагьдин патав фена, лагьанай: — Заз исятда вуна синида аваз Ягья пайгъамбардин кьил гъана кӀанзава.

²⁶Пачагь гзаф пашман хьанай, амма, мугьманар алай чкадал кьин кьуниз килигна, адаз «ваъ» лугьуз кӀан хьаначир.

²⁷Гьасятда жаллатӀ ракъурна, Ягьядин кьил гъун эмирнай. ЖаллатӀдини фена къазаматда Ягьядин кьил атӀанай,

²⁸синидал алаз гъанай, рушав вуганай. Рушани тухвана кьил вичин дидедив вахганай.

²⁹Ягьядин тилмизриз и кардикай хабар хьайила, абуру атана адан мейит къахчуна, тухвана сура кучукнай.

³⁰Исадин патав илчияр хтана кӀватӀ хьана, абуру Адаз чпи авур крарикай ва гайи чирвилерикай ахъайна.

³¹— Куьн кьилди са хелвет чкадиз алад, ана са тӀимил ял ягъ, — лагьана абуруз Исади. Вучиз лагьайтӀа абур авай чкадиз инсанар къвез-хъфизвай, Исадизни илчийриз са кӀус фу недай вахтни жезвачир.

³²ГьакӀ хьайила, Иса, илчийрилай гъейри касни галачиз, луьткведа аваз са хелвет чкадиз фена.

³³Халкьдиз абур фейиди акуна, гзафбуруз абур вужар ятӀа чир хьанвай, гьавиляй абур физвай чкадиз вири шегьеррай инсанар абурулай вилик кӀвачи-кӀвачи атана.

³⁴Луьткведай эвичӀна килигайла, Исадиз гзаф халкь кӀватӀ хьанваз акуна. Абур чубан галачир хипер хьиз аквазвай. Абурун язух атана, Исади абуруз чирвилер гуз эгечӀна.

³⁵Вахт геж хьуниз килигна, Адан тилмизри, Адав агатна, лагьана: — Вахтни геж я, инагни хелвет чка я.

³⁶Вуна абур ахъая. Абуру фена патарив гвай хуьрерай чпиз недай затӀар къачурай.

³⁷— Абуруз куьне тӀуьн це, — жаваб гана Ада. — Абуруз тӀуьн гун патал, гила чна фена кьве виш динар жагъурдани? — лагьана тилмизри.

³⁸Амма Исади абурувай хабар кьуна: — Квев шумуд фу гва? Алад, фена килиг. Чирайдалай кьулухъ абуру хтана жаваб гана: — Чав вад фуни кьве гъед гва.

³⁹Ада халкь къацу векьел кӀватӀал-кӀватӀал ацукьарун эмирна.

⁴⁰Виш-виш, яхцӀурни цӀуд-яхцӀурни цӀуд инсан жерге-жерге хьана чилел ацукьна.

⁴¹Ада вад фуни кьве гъед къачуна, цавуз килигна, хийир-дуьа ийиз-ийиз, фу кӀус-кӀус авуна, Вичин тилмизрив инсанриз паюн патал вугана, кьве гъедни виридаз пайна.

⁴²ТӀуьна вири тух хьана.

⁴³Амукьай фан ва гъетрен кӀусарай цӀикьвед зимбил ахцӀурна.

⁴⁴ТӀуьрбурун кьадар вад агъзур кьван итим тир.

⁴⁵Идалай кьулухъ Исади, инсанар ахъай тавунмаз, тилмизриз луьткведа акьах лагьана ва абур Галилейдин вирин а пата авай Бетсаиддиз Вичелай вилик ракъурна.

⁴⁶Инсанар ахъайна, Ам дуьаяр ийиз пелел хкаж хьана.

⁴⁷Няни хьайила, тилмизар авай луьткве вирин юкьвал, Иса лагьайтӀа, ялгъуздиз къерехдал алай.

⁴⁸Исадиз кьусуйри[1] тилмизрал гуж акъалдарзавайди акунай, куьз лагьайтӀа гар луьткведиз аксиди тир. Экв жедай кьиляй Иса вирелай тӀуз абур галай патахъ фена. Ам луьткведилай алатна финни мумкин тир,

⁴⁹амма вирелай тӀуз къвезвай Иса акурла, и кар чпин вилерикай карагзавайди хьиз хьайи тилмизрай кичӀела гьараяр акъатна. — КӀевиз акъваз, им Зун я, кичӀе жемир, — лагьана Исади.

⁵⁰

⁵¹Ам абурун луьткведа акьахайла, гар секин хьана. Тилмизар лап мягьтел хьанвай.

⁵²Исади гзаф инсанар вад фалди тухарунин гъавурда абур гилани гьатнавачир. Абурун рикӀер буьркьуь тир.

⁵³Исани тилмизар вирелай яна фена Генисаратдин чилерин са къерехдал акъвазна.

⁵⁴Абур луьткведай эвичӀайла, анин жемятдиз Иса гьасятда чир хьана.

⁵⁵Иса флан чкада ава лагьана ван хьайи инсанри, вири патарай къвез, месерал алаз азарри кьунвайбур гъиз хьана.

⁵⁶Хуьруьз, шегьердиз, къазмайрал — гьиниз Ам фейитӀани, азарри кьунвайбур гъана майданрал эцигдай. Адаз, Вичин пекерин ценцин цӀирхиник кьванни азарри кьунвайбурув са тӀуб кягъиз тур лугьуз, минетдай. Адак гъил хкӀурбур дири хъжедай.