Read Lezgi New Testament – ЦӀийи Икьрар ЛукӀа 10 Bible Online

ЛукӀа 10 - Lezgi New Testament – ЦӀийи Икьрар bible

ЛукӀа 10

¹Адалай кьулухъ Реббиди мад пудкъанни цӀуд кас хкяна, Вичиз физ кӀанзавай шегьерризни хуьрериз абур кьве-кьвед Вичелай вилик ракъурна.

²Абуруз Ада лагьана: — Гвен бул я, гвен гуьдайбур — тӀимил; гьакӀ хьайила, гвенин Иесидиз гвен гуьдайбур мад ракъуррай лагь!

³Алад! За куьн жанавуррин арадиз кӀелер хьиз ракъурзава.

⁴Я пулунин кисе, я гьебе, я кӀвачин къапар къачумир, я физвай рекье садазни салам гумир.

⁵Гьи кӀвализ куьн фейитӀани, сифте лагь: «Хийирар хьуй!»

⁶Ана хийир-дуьа авуниз лайих авай инсан аваз хьайитӀа, ада куьне а кӀвализ гъидай хийир кьада, тахьайтӀа куь хийир элкъвена квел хкведа.

⁷Гьа кӀваляй хъфимир, гьабурухъ авайди неъ, хъухъ: чӀугунвай зегьметдиз лайих къимет гун лазим я. Садан кӀваляй масадан кӀвализ экъечӀмир.

⁸Са шегьердиз атана куьн кьабулайтӀа, квез вуч гъайитӀа, гьам неъ.

⁹Гьана азарри кьунвайбурни сагъар хъия ва анин эгьлийризни лагь: «Аллагьди пачагьвал ийидай вахт квез мукьва хьанва».

¹⁰Чара шегьердиз атайла, куьн кьабул тавуртӀа, къецел экъечӀна, лагь:

¹¹«Квек тахсир квайди чирун патал, чи кӀвачерал ацукьнавай куь шегьердин ругни кваз чна югъур хъувуна квез тада. Аллагьди пачагьвал ийидай вахт мукьва хьанвайди квез чир хьухь».

¹²За квез лугьузва хьи, Къияматдин юкъуз Садум шегьердиз и шегьердилай регьят жеда.

¹³Вазни жедайди гуж я, Харазин шегьер! Вазни жедайди гуж я, Бетсаид шегьер! Куьна хьайи хьтин аламатар Туьрс ва Сидун шегьерра хьанайтӀа, а шегьеррин агьалияр, шихин пекер алукӀна, кьилелай руьхъ алахна, Аллагьдин рекьел къведай.

¹⁴ГьакӀ хьайила, Къияматдин юкъуз квез гудай жазадилай Туьрсдизни Сидундиз гайи Аллагьдин жаза кьезилди жеда.

¹⁵Вазни, Кефернагьум, вун цавариз хкаждайди хьиз авани? Ваъ, вун ирид чилерин кӀаник вегьида!

¹⁶Квекай кьил къакъудзавайда закайни кьил къакъудда, Закай кьил къакъудзавайда Зун Ракъурнавайдакайни кьил къакъудда.

¹⁷Пудкъанни цӀуд тилмиз шаддаказ элкъвена хтана. — Я Агъа! — лагьана абуру. — Ви ТӀвар кьурла, чаз жинерарни кваз муьтӀуьгъ жезвай.

¹⁸— Заз цӀайлапан хьиз цаварай аватай иблис акуна, — лагьана Исади. —

¹⁹Ингье, За квез гъуьлягърални акьрабрал са зиянни авачиз кӀвач вегьидай ва душмандин вири къуватрал гъалиб жедай гуж ганва, са затӀунивайни квез зиян гуз жедач.

²⁰Амма куьне жинерар квез табий хьунал шадвал ийимир, куь тӀварар цаварал кхьенваз хьунал шадвал ая.

²¹Гьа вахтунда Пак Руьгьди Иса хвешивилив ацӀурна. — Ваз шукур хьурай, Буба, цаваринни чилин Ребби, — лагьана Исади, — Вуна акьулни къанажагъ авайбурукай чуьнуьхнавай сир гъвечӀи аялриз ахъайна. Эхь, Буба, ам Ви регьим алай къаст тир.

²²Зи Бубади Заз вири ганва. Хва вуж ятӀа, Бубадилай гъейри садазни чидач, Буба вуж ятӀа, Хцелай ва Хциз Ам низ къалуриз кӀан хьайитӀа, гьадалайни гъейри садазни чидач.

²³Исади тилмизрихъ элкъвена кьилди абуруз лагьана: — Квез аквазвайди аквазвай вилер бахтавар я!

²⁴За квез лугьузва: квез аквазвай крар гзаф пайгъамбарризни пачагьриз чпизни акуна кӀанзавай, амма акунач; квез ван къвезвайбурукай чпизни ван атана кӀанзавай, амма атанач.

²⁵Са гъилера Иса синагъ ийиз кӀанз, къарагъна са тавратдарди Адавай хабар кьуна: — Я Муаллим, эбеди уьмуьрдив агакьун патал, за вуч авун лазим я?

²⁶— Къанунда вуч кхьенва? — жаваб гана Исади. — Анай вуна вуч кӀелзава?

²⁷Ада жаваб гана: — Виридан Ребби Аллагь рикӀин сидкьидай, жуван вири чандалди, жуван вири амандалди, жуван вири кьатӀунралди кӀан хьухь, «жув хьиз жуван мукьув гвайдини кӀан хьухь».

²⁸— Вуна дуьздаказ жаваб гана, — лагьана Исади; — вуна гьакӀ авунни ая, вал чан жеда.

²⁹Амма, вичин суал дуьзди яз къалурун патал, ада Исадиз лагьана: — Бес зи мукьув гвайди вуж я?

³⁰А суалдиз жаваб яз, Исади адаз кьиса ахъайна: — Са инсан Ярусалимдай Еригьандиз физвайла, ам къачагърин гъиле гьатна; абуру адалай пекер хтӀунна, гатана, ам рекьидай чкадал гъана, чебни хъфена.

³¹А рекьяй са хахам физваз хьана, адаз гатанвайди акурла, ам кьасухдай къвалавай элячӀна фена.

³²Гьа и чкадал атай левидини гьакӀ авуна: гатанвайди акун кумазни, патавай элячӀна фена.

³³Гьанлай са самариятви фидайла, ам акунмазни, адаз а касдин язух атана.

³⁴Ам адан патав фена, чехирдив чуьхвена, адан хирериз зейтундин чӀем яна, кутӀунна. Вичин ламрал акьадарна ам мугьманханадиз хкана ва гьанани адахъ гелкъвена.

³⁵Пакагьан юкъуз вич хъфидайла, кьве динар акъудна ада мугьманханадин иесидиз виликамаз гана ва лагьана: «Адахъ гелкъуьгъ; артухан харж акъатайтӀа, элкъвена хкведайла, за вав вахгуда».

³⁶Ваз чиз, къачагърин гъиле гьатай кас патал а пудакай вуж мукьув гвайди тир?

³⁷Тавратдарди лагьана: — Адаз хъсанвал авурди. Инал Исади лагьана: — Алад, жувани гьакӀ ая.

³⁸Садра абур рекье авайла, Иса атана са хуьруьз акъатна; ана Марта лугьудай са папа Адаз мугьманвилиз эверна.

³⁹Адахъни Майрам лугьудай са вах авай. Ада, Исадин кӀвачерив ацукьна, Адан гафариз яб гузвай.

⁴⁰ТӀуьн-хъун гьазуриз гара авай чӀавуз, Мартади, атана, Исадиз лагьана: — Я Агъа! Зи ваха са кӀвалахни тийиз, икьван крар са зал вегьенвайди Ваз аквазвачни? Адаз заз куьмек ая лагь.

⁴¹— Марта! Марта! — жаваб гана Реббиди. — Вуна гзаф зегьметар чӀугвазва, ваз гзаф къайгъуяр ава.

⁴²КӀанзавайди анжах са кар я. Майрама вичиз виридалайни хъсан кар хкянава, ам адавай къакъудни ийидач.