Read Lezgi New Testament – ЦӀийи Икьрар ЛукӀа 11 Bible Online

ЛукӀа 11 - Lezgi New Testament – ЦӀийи Икьрар bible

ЛукӀа 11

¹Садра са чкада Исади дуьаяр авурдалай кьулухъ, Адан тилмизрикай сада лагьана: — Я Агъа! Ягьяди вичин тилмизриз дуьаяр ийиз гьикӀ чирнатӀа, Вунани чаз гьакӀ чира!

²— Дуьа ийидайла, куьне икӀ лагь, — жаваб яз лагьана Исади. — Буба! Ви ТӀвар пак хьурай! Ви пачагьвилин вахтни алукьрай!

³Чаз къвезвай кап гьалал фу це На чаз гьар юкъуз.

⁴Гъил къахчу чи гунагьрилай, чнани чи бурж алайбурулай гъил къахчузва эхир. Чун темягьра твамир Вуна.

⁵Ахпа Исади абуруз лагьана: — Лугьун чна, кьуланфериз квекай сада дустунин патав фена, лугьуда: «Къала, дуст кас, буржуна зав кьвед-пуд фу гице.

⁶Рекьяй зи дуст атана акъатнава, захъ адан вилик эцигдай затӀни авач».

⁷Дустуни кӀвалин къеняй адаз жаваб гана: «Зун икрагь ийимир, ракӀарарни агалнава, аяларни захъ галаз къатканва; завай къарагъна вав фу вугуз жедач».

⁸За квез лугьузва: ада ваз дуствилелди фу тагуз хьайитӀа, ви кӀевивал акурла, ада, къарагъна, ваз лазим кьван гуда.

⁹Зани квез лугьузва: тӀалаба — квез гуда, къекъуьгъ — квез жагъида, рак гатут — квез ахъайда.

¹⁰Гьар ни тӀалабайтӀа, гьада къачуда, вуж къекъвейтӀа, гьадаз жагъида, ни рак гатайтӀа, гьадаз рак ахъайда.

¹¹Хци гьуьлуьн гъед це лагьайла, квекай гьи бубади гъетрен чкадал адан гъиле гъуьлягъ вугуда?

¹²Кака це лагьайла, какадин чкадал акьраб гудани?

¹³Куьн хьтин писбуру чпин аялриз хъсан савкьватар гуз хьайила, цавараллай Бубадивайни Вичивай тӀалабайдаз Пак Руьгь гуз жедачни мегер?

¹⁴Садра Исади лалдакай чӀуру жин хкудна. Жин хкатайла, лалдай чӀал акъатна. Халкь мягьтел хьана.

¹⁵Са бязибуру лугьузвай: — Жинерар хкуддай къуват Ада жинеррин кьилевай Багьал-Зевулавай къачузва.

¹⁶Муькуьбуру, Ам синагъ ийиз кӀанз цавараллайдавай къалуриз жедай хьтин керемат-ишараяр ая лугьуз адавай тӀалабзавай.

¹⁷Амма Исади, абурун рикӀера авайдакай чиз, абуруз лагьана: — Чеб чпиз акси кьве патал пай хьайи пачагьлугъ ичӀи жеда; къал гьатай кӀвални чӀур жеда.

¹⁸Иблисни вич вичиз акси хьайитӀа, адан пачагьлугъди давам гьикӀ гуда? Куьне лугьузва хьи, За жинерар хкуддай къуват Багьал-Зевулавай къачузва.

¹⁹За а къуват Багьал-Зевулавай къачузватӀа, куь терефдарри ахьтин къуват нивай къачузва? Куь дуван ийидайбур гьабур хьурай!

²⁰Куьне За жинерар хкуддай къуват Аллагьдивай къачузва лагьайтӀа, — им квел Аллагьди пачагьвал ийизва лагьай чӀал жеда.

²¹Къуват авайда ва яракь гвайда вичин кӀвал хуьз хьайила, адан мулк саламатвиле амукьда.

²²Амма адалай гзаф къуват авайди адал гъалиб хьайитӀа, адавай вичин далу акалнавай яракьни къакъудда, адан эменнини тарашна тулкӀ ийида.

²³Вуж Захъ галаз туштӀа, ам Заз акси я; ни Зун галачиз вуч кӀватӀнатӀа, гьам вара-зара ийида.

²⁴Жин инсандикай хкечӀайла, ам яд авачир кьурумра вичиз секин са чка жагъун тавурла, къекъвез гьатда. «Жуван кӀвализ хъфин кван», — лугьуда ада.

²⁵Элкъвена аниз хтайла, адаз анаг къакъажнаваз жагъида.

²⁶Гьанлай ам фена, вичелайни бетер ирид маса жинни къачуна, вич кваз хьайи инсандиз гьахь хъийида ва архайин жеда. А жинерар акатай инсандиз авайдалайни пис жеда.

²⁷И гафар лугьудайла, халкьдин арадай са папа ван алаз Исадиз гьарайна: — Бахтавар я Вун хайи, Ваз нек гайи паб!

²⁸Амма Исади лагьана: — ЯтӀани, Аллагьдин чӀалаз килигиз, Адан Гафар кьилиз акъудзавайбур а папалайни бахтавар я.

²⁹Исадин патав мадни гзаф халкь кӀватӀ жез хьана. Абурухъ элкъвена, Ада лагьана: — Къенин несил гьикьван чӀур хьанва! И несилди керемат-ишара тӀалабзава, амма адаз Юнусан керемат-ишарадилай гъейри маса керемат-ишара аквадач.

³⁰Ниневдин агьалийриз Юнус гьихьтин ишара хьанатӀа, и несилдизни Инсандин Хва гьахьтин ишара жеда.

³¹Кьибле патан пачагь-ханум чилин лап а кьиляй Сулейман пачагьдин камал квай гафариз яб гуз атанай. И несилдиз Сулейман пачагьдилайни ЧӀехидан гафарин ван къвезва. ЯтӀани и несил Адаз акси экъечӀзава. Гьавиляй Къияматдин юкъуз Кьибле патан пачагь-ханумди и несилдиз кар кьада.

³²Къияматдин юкъуз Ниневдин агьалийри и несилдиз кар атӀуда. Юнус ам несигьатриз яб гайи Ниневдин агьалийри туба авунай ва несилдиз Юнусалайни ЧӀехидан несигьатрин ван къвезва.

³³Гьич садани куькӀуьрнавай шем чинебан чкада, я тахьайтӀа, къапунин кӀаник эцигдач. Ам, кӀвализ гьахьзавайбуруз экв акун патал, шемергандал эцигда.

³⁴Ви бедендин чирагъ вилер я; ви вилер сагъ хьайитӀа, вун экуьнив ацӀана жеда, ви вилер чӀурузваз хьайитӀа, вун мичӀивиле гьатна жеда.

³⁵Килиг ви беденда авай экв мичӀивал яз тахьурай!

³⁶Ви беден вири экуь ятӀа ва адак гьич са чӀулав лекени квачтӀа, вун, чирагъдин экуьник квайди хьиз, михьиз экуь жеда.

³⁷Исади Вичин чирвилер гана куьтягьайдалай кьулухъ, са фарисейди Ам вичин кӀвализ илифарна. Ада атана суфрадихъ Вичин чка кьуна.

³⁸Фу недалди Исади Вичин чин-гъил чуьхуьн тавурла, фарисей лап мягьтел хьана.

³⁹Амма Реббиди адаз лагьана: — Куьне, фарисеяр, куь къаб-къажахдин винел патар михьзаватӀани, куь къене авайди къанихвални писвал я.

⁴⁰Эй, ахмакьар! Къен пад халкь авунвайди гьа винел пад халкь авурди тушни?

⁴¹Къаб-къажахда авайди кесибриз пая — куьн вири патарихъай михьи жеда.

⁴²Гуж я квез хьанвайди, фарисеяр: пурнийрилай, рейгьандилай ва гьар жуьредин векьер-кьаларилай куьне харж гузва, амма эвелни-эвел авуна кӀанзавай адалатвални Аллагь кӀан хьун куьне рикӀелай ракъурнава! Авуна кӀанзавай важиб авай кар гьа им я, амма муькуь крарни рикӀелай ракъурна виже къведач.

⁴³Гуж я квез хьанвайди, фарисеяр: синагугра аквадай чкаяр кьунал куь рикӀ ала, майданрални — квез куьн гьуьрметдалди тебрикна кӀанда.

⁴⁴Гуж я квез хьанвайди, куьн кьилихъ къван галачир сурар хьиз я: инсанар ана сурар авайди тийижиз къекъвезва.

⁴⁵Инал тавратдаррикай сада Адаз лагьана: — Муаллим! Вуна и гафаралди чи гуьгьуьлрани эцязава хьи?!

⁴⁶Амма Исади лагьана: — Квезни, тавратдарар, хьанвайди гуж я: куьне халкьдин кӀула диндин къайдайрин зурба парар твазва, амма а парарик куьне гьич тӀубни кязавач.

⁴⁷Гуж я квез хьанвайди, куьне куь бубайри кьейи пайгъамбарриз гуьмбетар эцигзава.

⁴⁸Гьадалди куь бубайри авур чӀуру крар дуьзбур я лугьуз куьне къул чӀугвазва; абуру пайгъамбарар кьена, куьне а пайгъамбарриз гуьмбетар эцигзава.

⁴⁹Гьавиляй тушни Аллагьдин чӀехи Камалди икӀ лагьайди: «За абурун патав пайгъамбарарни илчияр ракъурда; абурукай садбур абуру рекьида, муькуьбур хурук кутада».

⁵⁰Дуьнья халкь авур чӀавалай инихъ экъичнавай пайгъамбаррин иви, Гьабилан ивидилай гатӀунна Аллагьдин КӀвалинни къурбангандин арада кьейи Зекеридин ивидал къведалди, За а несилдин вилерай хкида. Эхь, лугьузва За квез, а несилдиз вичиз къвезвайди вичел агакьни ийида.

⁵¹

⁵²Гуж я квез хьанвайди, тавратдарар: чирвилерин куьлегар куьне куь гъиле кьунва. Я куьн гьахьзавач, я гьахьиз кӀанзавайбурузни куьне манийвал ийизва.

⁵³Иса анай экъечӀайла, тавратдарарни фарисеяр гужуналди Адаз суалар гуз, Ам кӀеве тваз кӀанз,

⁵⁴Адан сивяй Адак тахсир кутаз жедай хьтин гаф акъатдатӀа лугьуз, алахъзавай.