Read Lezgi New Testament – ЦӀийи Икьрар ЛукӀа 12 Bible Online

ЛукӀа 12 - Lezgi New Testament – ЦӀийи Икьрар bible

ЛукӀа 12

¹Агъзурралди инсанар кӀватӀ хьана, сада сад чуькьуьзвай арада Исади сифтедай Вичин тилмизриз лугьуз хьана: — Фарисейрин маядикай, яни абурал кьве чин хьуникай мукъаят хьухь!

²Ашкара тежедай гьич са затӀни ва малум тежедай чинебан гьич са карни авайди туш.

³Гьаниз килигна буьркьвеба вуч куьне лагьанатӀа, гьадан ван эквеба жеда ва кӀвале куьне япал вуч лагьанатӀа, гьадакай кӀвалин чӀередилай хабар акъатда.

⁴За квез, Зи дустариз, лугьузва: инсан яна рекьизвайбурукай кичӀе жемир, кьинилай гъейри абурулай маса кар алакьдач.

⁵Амма нихъай кичӀе хьана кӀандатӀа, За квез лугьуда: кьена жегьеннемдиз ракъурдай къуват авай анжах Садакай кичӀе хьухь. Эхь, лугьузва За квез, гьа Гьадакай кичӀе хьухь.

⁶Вад нуькӀрен къимет кьве къара пул тушни? НуькӀерикай садни Аллагьдин рикӀелай фенвач.

⁷Куь кьилелни гьикьван чӀарар алатӀа гьисабнава; гьа икӀ, квез кичӀе жемир: куьн нуькӀерилайни гзаф артух я.

⁸Лугьузва За квез: инсанрин вилик Зун ни ихтибардалди кьабулзаватӀа, гьам Аллагьдин малаикрин вилик Инсандин Хцини гьакӀ кьабулзава.

⁹Инсанрин вилик ни Закай кьил къакъудайтӀа, Аллагьдин малаикрин вилик Инсандин Хцини адакай кьил къакъудда.

¹⁰Инсандин Хцикай чӀуру гаф лагьайтӀа, лагьайдалайни гъил къахчуда; амма Пак Руьгьдикай ни аси гафар авуртӀа, адалай гъил къахчудач.

¹¹Куьн синагугриз, гьакимрин ва гуж гвайбурун патав гъайила, абуруз гьикӀ ва вуч жаваб гудатӀа лугьуз къайгъудик жемир.

¹²Гьа чӀавуз куьне вуч лагьана кӀандатӀа, гьам квез Пак Руьгьди лугьуда.

¹³Халкьдин арадай сада Исадиз лагьана: — Муаллим! Зи стхадиз лагь хьи, ада захъ галаз ирс пай авурай.

¹⁴— Эй инсан, — лагьана Исади, — куь мал-мулк паюн, куь гьахъ-дуван авун Зи хиве тунвайди вуж я?

¹⁵— Килиг, — хълагьна Исади халкьдиз, — пулунихъ-девлетдихъ къаних жемир, инсандин уьмуьр адан мал-девлетдилай аслу жедач.

¹⁶Исади абуруз са кьиса ахъайна: — Девлет авай са инсандин никӀи хъсан бегьер гъана.

¹⁷Адани вичи вичикди веревирдер авуна: «Вучда? Зи чилерин майваяр кӀватӀна хуьдай чка захъ авач».

¹⁸«Ингье за вучдатӀа аку, — фикирна ада, — жуван гьамбарханаяр чукӀурна, гьабурулайни гегьенш чкаяр эцигда. Ана за жуван техил ва жувахъ авай-авачир вири хуьда.

¹⁹Жува жувазни лугьуда: Вуна ваз гзаф йисара менфят къачудай зурба няметар кӀватӀна: ял ягъа, неъ, хъухъ, кеф чӀугу».

²⁰Амма Аллагьди адаз лагьана: «Эй ахмакь! Къе йифиз ви чан къачуда; вуна кӀватӀнавай кьванди нел гьалтда?»

²¹Аллагь патал ваъ, вич патал девлет кӀватӀдайдан кьилел гьа ихьтин крар къведа.

²²Исади Вичин тилмизриз лагьана: — ИкӀ хьайила За квез лугьузва: вуч недатӀа лугьуз жуван чан патал ва вуч алукӀдатӀа лугьуз жуван беден патал къайгъуйрик жемир.

²³Чан недайдалай артух я, беденни — пекерилай.

²⁴КӀвагъриз килиг: абуру я цазвач, я гуьзвач; абурухъ я цадай, я бегьер хуьдай чкаяр авач, амма Аллагьди абуруз тӀуьн гузва. Квезни Аллагьди гуда! Куьн къушарилай артух тушни мегер?

²⁵Кат-галтуг авуналди квевай нивай жуван уьмуьр са сятдин хьайитӀани артухариз жеда?

²⁶Гьа икӀ, квелай и гъвечӀи кар хьайитӀани алакьдачтӀа, амайбурун къайгъу чӀугун куьз герек я?

²⁷Бубуяр гьикӀ экъечӀзаватӀа килиг: абуру я зегьмет чӀугвазвач, я са затӀ хразвач. Амма За квез лугьузва хьи, гьихьтин иер пекер алай Сулейман пачагьни и цуькверикай садав гекъигиз хьун мумкин туш.

²⁸Къе никӀяй экъечӀзавай ва пака къулаз вегьидай векьни Аллагьди акӀ чӀагурзаватӀа[4], Ада а векь квелай артух чӀагурзавани, эй иманда зайифбур!

²⁹Гьа икӀ, куьн вуч неда, я тахьайтӀа вуч хъвада лугьуз, кат-галтугмир, я къайгъудикни жемир,

³⁰тӀуьнихъ-хъунихъ и дуьньяда галтугзавайбур мажусияр я. Куь Бубадиз ибур квез герек тирди чизва.

³¹Гьавиляй куьне квез Аллагьдин Пачагьлугъ жагъура, амайди Ада квез кӀукӀни алаз гуда.

³²КичӀе жемир, гъвечӀи кӀеретӀ! Вучиз лагьайтӀа квез Вичин Пачагьлугъ гун куь Бубадиз кӀанзава.

³³Жуван мулкар маса це ва садакьаяр пая. Гьадалди куьне квез цаварал куьгьне тежедай пулунин кисеяр ва куьтягь тежедай хазинаяр гьазурда. Анра ам я чуьнуьхдай угъри, я недай гъуьчӀ жедач.

³⁴Куь девлет гьина аватӀа, куь рикӀни гьана жеда.

³⁵Куьн, юкьвара чӀулар туна, куькӀуьрнавай чирагъар гваз гьазур хьухь.

³⁶Куьн мехъерикай хтана кӀанзавай чпин агъадал вил алай инсанриз ухшар хьухь, ам хтана рак гатанмазни адаз гьасятда рак ахъайдайвал.

³⁷Чпин агъа кӀвализ хтайла, адаз уях яз жагъай лукӀар бахтавар я. За квез рикӀивай лугьузва: агъади, вичин пекер дегишарна, абуруз суфрадихъ эверда ва абуруз къуллугъда.

³⁸ЛукӀарин иесидиз, кьуланфериз хтайлани, экв жедайла хтайлани абур уях яз жагъайтӀа, а лукӀар бахтавар я.

³⁹Квез чидани, кӀвалин иесидиз угъри къведай чӀав чир хьанайтӀа, вичин кӀвал атӀуз тадачир.

⁴⁰Куьнни гьазур яз хьухь: гьич квез хабарни авачиз Инсандин Хва хтана акъатда.

⁴¹Гьа чӀавуз Петруди Исадиз лагьана: — Я Агъа! И кьиса Вуна чаз лугьузвайди яни, я тахьайтӀа амайбурузни?

⁴²Реббидини лагьана: — Лугьун хьи, агъади вичин кӀвалихъ гелкъвезвайбурун кьилел, абуруз вахтунда фу-яд гун патал, са кас эцигна. А кас вафа гвайди ва кьил авайди хьайитӀа, ада вуч ийида?

⁴³Агъа кӀвализ хтайла, ам вичин хиве авай крарал машгъул яз жеда. Ахьтин кас бахтавар я.

⁴⁴За квез рикӀивай лугьузва хьи, адан агъади вичин вири мал-мулкунин кьиле а кас акъвазарда.

⁴⁵А касди вичи вичик «Зи агъа мукьвара ахкъатдач» лагьана, кӀвале вач-хъшаяр тир итимарни папар гатаз, кьадардилай артух нез, хъваз, хъивегьиз хьайитӀа,

⁴⁶а касдин агъади, гьич виливни техуьзвай са юкъуз, гьич фикирдизни гъиз тежедай чӀавуз хтана, адаз векъи жаза гуда ва гьадазни, иман гвачирбуруз хьиз, гьа икӀ ийида.

⁴⁷Вичин агъадиз вуч кӀанзаватӀа чизвай, амма гьазур тахьана, а кар тавур кас гзаф гатанни ийида.

⁴⁸Вичин агъадин мурад тийижиз, саймазвилелди са чӀуру кар авур лукӀ тӀимил гатада. Гьар низ гзаф ганватӀа, гьадавай гзаф кӀанни жеда; нив гзаф ихтибар вуганватӀа, гьадавай гзаф тӀалабни ийида.

⁴⁹Зун чилел цӀай куькӀуьриз атанвайди я, ам куькӀвенайтӀа Заз гзаф кӀандай!

⁵⁰Амма Заз жедай чӀехи азабрин югъ вилик кума, а югъ атана алукьдалди Зи рикӀел залан пар жеда.

⁵¹Квез Зун и дуьньядиз ислягьвал гваз атанвайди хьиз авани? Ваъ, Зун инсанар чара ийиз атанвайди я!

⁵²Гила кӀвале вад кас аваз хьайитӀа, абур кьве пай жеда: пуд кьведаз акси жеда, кьведни — пудаз.

⁵³Буба хциз акси жеда, хвани — бубадиз; диде рушаз акси жеда, рушни — дидедиз; къари вичин сусаз акси жеда, свасни — вичин къаридиз.

⁵⁴Халкьдизни Исади лагьана: — Рагъ экъечӀзавай патай къвезвай циф акурла, куьне «Марф къвада» лугьуда. Дуьз я.

⁵⁵Кьибле патай гар акъатайла, куьне «Гзаф чими жеда» лугьуда. Дуьз я.

⁵⁶Эй, кьве чин алайбур! Чилизни цавуз килигна гьихьтин гьава жедатӀа, квевай чириз жезва, бес гила гьихьтин вахт атанватӀа квевай кьатӀуз жезвачни?

⁵⁷Бес вучиз квевай куьн патал гьахъ-михьивал вуч ятӀа чириз жезвач?

⁵⁸Вахъ галаз гьуьжетарзавайди галаз вун дувандиз фидайла, жезмай кьван адахъ галаз рекье туьхкӀуькӀ. АкӀ тахьайтӀа, ада вун дуванбегдин патав тухуда, дуванбегдини вун къазаматдардин гъиле твада, къазаматдардини вун къазаматханадиз вегьида.

⁵⁹За ваз лугьузва: вал алай бурж эхиримжи чет кепекдал къведалди вахгун тавунмаз вун къазаматдай акъатдач.