Read Lezgi New Testament – ЦӀийи Икьрар ЛукӀа 13 Bible Online

ЛукӀа 13 - Lezgi New Testament – ЦӀийи Икьрар bible

ЛукӀа 13

¹Гьа вахтунда са бязибур Исадин патав атана, Аллагьдин КӀвале къурбандар ийизвай чӀавуз ПилатӀан эмирдалди яна кьейи галилейвийрикай Адаз суьгьбетна.

²И кардин патахъай Исади лагьана: — А инсанар амай галилейвийрилай гзаф гунагьар квайвиляй яна кьенва лугьуз фикирзавани куьне?

³Ваъ, лугьузва За квез; куьн Аллагьдин рекьел татайтӀа, гьабур хьиз куьнни вири пуч жеда.

⁴Я тахьайтӀа, куьне Шилугьамдин минарадик акатна кьейи цӀемуьжуьд касдик Ярусалимда уьмуьр тухузвай амай вирибурулайни гзаф тахсирар ква лагьана фикирзавани?

⁵Ваъ, лугьузва За квез; куьн Аллагьдин рекьел татайтӀа, гьабур хьиз куьнни вири пуч жеда.

⁶Ада и кьисани ахъайна: — Са касдихъ вичин ципицӀбагъда инжилдин тар хьана; тарцелай майваяр кӀватӀиз атайла, адаз затӀни гьатнач.

⁷Ада ципицӀбандиз лагьана: «Ингье, пуд йис я заз и таралай инжилар кӀватӀиз кӀанз, амма заз адалай затӀни жагъизвач. Вуна ам атӀутӀ: гьавайда ада вучиз чил кьазвайди я?»

⁸Амма ципицӀбанди жаваб яз адаз лагьана: «Агъа, цӀи ам за пер яна кьук кутадалди тур.

⁹Ада майваяр гъидатӀа килигда чун; тагъайтӀа, чна къведай йисуз ам атӀуда».

¹⁰Киш юкъуз са синагугда Исади чирвилер гузвай.

¹¹Ана чӀуру жинжи цӀемуьжуьд йисан къене акӀажарнавай са паб авай, адавай дуьз акъвазиз жезвачир.

¹²Ам акунмазни, Исади адаз эверна: — Вун ви начагъвиликай азад хьанва, вах.

¹³ГьакӀ лагьана, Исади адал гъилер эцигна; паб гьасятда къарагъна дуьз хъхьана ва Аллагьдиз шукурар ийиз хьана.

¹⁴Киш юкъуз Исади а паб сагъар хъувуна лугьуз, синагугдин кьилевайда хъел кваз халкьдиз лагьана: — Гьафтеда кӀвалахна кӀанзавайди ругуд югъ я; тӀаларикай сагъариз Киш ваъ, маса йикъарикай са юкъуз ша.

¹⁵— Кьве чин алайбур! — жаваб яз лагьана Реббиди. — Киш юкъуз куьне гьар сада жуван яц, я лам цурай акъудна цел тухузвачни?

¹⁶ЦӀемуьжуьд йисан къене иблисди бедбахтвилик кутунвай Ибрагьиман эвлед руш Киш юкъуз вичин къазадикай хкудна кӀандачирни кьван?

¹⁷Исади и гафар лагьайла, Адаз акси тир инсанриз регъуь жезвай, амай халкьди Адан аламатдин крарал шадвилер ийизвай.

¹⁸Исади лагьана: — Аллагьдин пачагьвал куьз ухшар я ва Ам куьв гекъигиз жеда?

¹⁹Ам инсанди вичин сала цайи финдин тварциз ухшар я: ам экъечӀна, адакай еке тар хьана, къушарини адан хилерал мукар ийиз жеда.

²⁰Исади давамарна: — Аллагьдин пачагьвал куьв гекъигиз жеда?

²¹Ам папа цӀуд киле гъуьруьк кутур гъварциз ухшар я, ам кутунмазни тини атана.

²²Иса Ярусалимдиз фидайла, рекье гьалтзавай шегьерра ва хуьрера Ада чирвилер гуз хьана.

²³Са инсанди Исадиз лагьана: — Я Агъа! ТӀимил инсанар хилас жеда лугьудай гафар гьахъбур яни? Адани жаваб яз лагьана:

²⁴— Аллагьдин Пачагьлугъдиз рехъ ачухзавай гуьтӀуь варарай физ алахъ, — жаваб гана Ада. — За квез лугьузва, гзафбур а варарай физ алахъда, амма абурувай анай экъечӀиз жедач.

²⁵КӀвалин иесиди къарагъна рак агалайла, куьн къецел амукьда. Куьне: «Я Агъа! Я Агъа! Чаз рак ахъая», — лугьуз, варар гатаз жеда. Амма Ада квез жаваб гуда: «Куьн гьинай я? Заз куьн чидач».

²⁶Гьа вахтунда куьне лугьуда: «Чун Вахъ галаз фу-яд тӀуьрбур я, чи куьчейрани Вуна чирвилер гайиди я».

²⁷Амма Агъади жаваб гуда: «За квез лугьузва: куьн гьинай ятӀа, Заз куьн чидач. Залай алат, адалат квачир крар ийизвайбур».

²⁸Квез Аллагьдин Пачагьлугъда Ибрагьим, Исакь, Якьуб ва амай вири пайгъамбарар аваз акурла, аниз ахъай тавуна къецел амукьайла, куьне сасни регъведа, шел-хвални ийида.

²⁹РагъэкъечӀдай патайни рагъакӀидай патай, кефер патайни кьибле патай атана, инсанри Аллагьдин Пачагьлугъда межлисда чпиз чкаяр кьада.

³⁰Исятда агъада авайбурукай са бязибур вине жеда, исятда вине авайбурукай са бязибур — агъада.

³¹Гьа и чӀавуз са шумуд фарисей атана, абуру Исадиз лагьана: — Ахлад, и чкадай экъечӀ: Гьирудаз Вун рекьиз кӀанзава.

³²— Фена а сикӀрез лагь хьи, — лагьана Исади, — къени пака За инсанрикай жинерар хкудда ва азарри кьунвайбур сагъар хъийида, пуд лагьай юкъуз За Зи крар куьтягьда.

³³Амма къени, пакани, ахпагьан юкъузни Зун Зи рекье хьун лазим я, вучиз лагьайтӀа Ярусалимдилай гъейри маса чкада пайгъамбардивай ажал кьабулиз жедач.

³⁴Эй Ярусалим, Ярусалим! Пайгъамбарар тергдай шегьер! Аллагьди ракъурнавайбур къванцин хура твадай шегьер! Вечре вичин цицӀибар кӀватӀна лувак кутадайди хьиз, шумудра Зун ви аялар кӀватӀиз алахънай! Амма квез кӀан хьаначир!

³⁵Килиг, куь ичӀи макан За квез тазва. Куьне: «Реббидин ТӀварцӀелай къвезвайдаз шукур хьурай!» лугьудай вахт къведалди, квез Зун ахквадач.