Read Lezgi New Testament – ЦӀийи Икьрар ЛукӀа 15 Bible Online

ЛукӀа 15 - Lezgi New Testament – ЦӀийи Икьрар bible

ЛукӀа 15

¹Исадиз яб гун патал, харж кӀватӀдайбурни гунагькарар вири атана кӀватӀ хьанвай.

²Фарисейрини тавратдарри наразивал ийиз хьана: — Ам гунагькаррихъ галаз алагъ-салагъда ава, гьатта абурухъ галаз санал ацукьна фуни незва.

³И чӀавуз Исади ихьтин кьиса ахъайна:

⁴— Виш хипекай сад квахьайла, кьудкъанни цӀекӀуьд хеб кьурумда туна, гьа квахьай садахъ къекъвез квекай вуж фидач? Хеб жагъун тавунмаз вуж элкъвена хкведа?

⁵Жагъайла, хеб шадвилелди къуьнерал вегьена хкида.

⁶КӀвализ хтайла, ада дустаризни къуншийриз эверна лугьуда: «Куьнени захъ галаз шадвал ая, заз зи квахьай хеб жагъун хъувуна».

⁷Идалди За квез лугьузва хьи, кьудкъанни цӀекӀуьд гьахъ-михьи касдилай са гунагькар Аллагьдин рекьел атун цавар патал чӀехи шадвал я.

⁸Я тахьайтӀа, цӀуд гимишдин пул авай са паб къачун, пуларикай сад адавай квахьайтӀа, гьам жагъидалди шемни куькӀуьрна ам кӀвал шуткуниз, мукьуфдалди кӀвалин са-са пӀипӀ тирвал къекъвез жедачни мегер?

⁹Ам жагъайла, дустаризни къуншийриз эверна ада лугьуда: «Куьнни захъ галаз шад хьухь, квахьай пул заз жагъун хъувуна».

¹⁰Гьа икӀ, лугьузва За квез, Аллагьдин рекьел атай са гунагькар акуртӀани, Аллагьдин малаикриз хвеши жеда.

¹¹Исади мад лагьана: — Са касдихъ кьве хва авай.

¹²Абурукай гъвечӀида бубадиз лагьана: «Я буба! Ви эменнидикай зал гьалтзавай пай зав вахце». Бубадини эменни рухвайрин арада пайна.

¹³Са кьадар йикъар фейила, гъвечӀи хва вичин шейэр кӀватӀна, яргъал уьлкведиз фена. Гьанра ада, кефер чӀугваз, вичихъ авай мал-девлет гаралай авуна.

¹⁴Ада вичихъ авай-авачирди руфунай авадарна куьтягьайла, а вилаятда зурба каш хьана. Ам кӀеве гьатна.

¹⁵Ам фена кӀвалах це лугьуз а вилаятдин са касдал алахъна, адани ам вичин вакӀар хуьз чуьлдиз ракъурна.

¹⁶Адаз вакӀари незвай тӀуьналдини руфун ацӀуриз кӀанзавай, амма адаз гьам гудайдини авачир.

¹⁷Кьили ван авурла, ада вичи вичикди лагьана: «Зи бубадихъ гьакъидалди кӀвалахзавайбур гьикьван аватӀани, абур вири тухни я ва недайди абуруз амукьни ийизва, амма зун ина гишила рекьизва!

¹⁸Бубадин патав хъфида. „Чан буба! — лугьуда за. — Зун цаварин ва ви вилик гунагькар я,

¹⁹гила зун ви хва я лагьай тӀварцӀиз лайих яз амач. Зунни ваз кӀвалахзавайбурун арадиз кьабула, буба“».

²⁰Ам къарагъна вичин бубадин патав хъфена. Бубадиз ам гьеле яргъа амаз акурла, адаз хцин язух атана; бубади, чукурна фена хцин гардан кьуна, адаз теменар гана.

²¹«Чан буба! — лагьана хци. — Зун цаварин ва ви вилик гунагькар я, ви хва я лугьудай тӀварцӀизни зун лайих яз амач.».

²²Амма бубади вичин лукӀариз лагьана: «Лап хъсан пекер гъана адал алукӀ, адан тупӀухъ тупӀални акала, алукӀдай кӀвачин къапарни,

²³хвенвай данани гъана тукӀукӀ. Нез, хъваз шадвилер ийин чна:

²⁴зи и хва кьенвай, гила адал чан хтанва, ам завай квахьнавай, гила ам заз жагъун хъувунва». Абур шадвилер ийиз эгечӀна.

²⁵ЧӀехи хва, лагьайтӀа, никӀе авай; ам хтана кӀвализ ахгакьайла, адаз манийрин ва инсанри кьуьлер ийизвай ванер атана.

²⁶Ада кӀвалел алайбурукай садаз эверна, адавай хабар кьуна: «Ина вуч хьанва?»

²⁷«Ви стха хтанва, — жаваб гана ада, — хва сагъ-саламат яз хтана акур ви бубадини хвенвай дана тукӀунва».

²⁸Стхадиз хъел атана кӀвализ хквез кӀан хьанач. Бубади, кӀваляй экъечӀна, адаз хъша лагьана.

²⁹Амма ада бубадиз жаваб гана: «И вири йисара за ваз къуллугъ ийиз, ви гафунал гаф эцигайди туш, амма вуна заз, жуван дустарихъ галаз кефер чӀугун патал, гьич бацӀини гайиди туш.

³⁰Гьина ятӀани гьатнавай ва чӀуру рекье авай папарихъ галаз ви эменни гаралай авур ви и хва хтайла, вуна адаз хвенвай дана тукӀуна».

³¹«Чан хва! — лагьана бубади. — Вун датӀана захъ гала, захъ авай-авачирдини вири види я.

³²Ви стха хтай чӀавуз шадвал тавуна гьикӀ акъвазда?! Ам кьенвай, гила — чан хтанва. Ам квахьнавай, гила — жагъун хъувунва».