Read Lezgi New Testament – ЦӀийи Икьрар ЛукӀа 16 Bible Online

ЛукӀа 16 - Lezgi New Testament – ЦӀийи Икьрар bible

ЛукӀа 16

¹Исади Вичин тилмизриз лагьана: — Са инсандихъ девлет авай, адахъни кӀвалин кӀвалахар идара ийизвайди авай; ада кӀвалин эменни вара-зара ийизва лугьуз са ни ятӀани и девлет авайдаз хабарнай.

²Девлет авайда адаз эверна, лагьана: «Заз вакай къвезвайбур вуч ванер я? Жуван кӀвалахдин гьахъ-гьисаб авуна, зи патав гъваш. За вун къуллугъдилай алудзава».

³КӀвалин-йикъан кьилел алайдани вичи вичикди лагьана: «Гила за вуч ийида? Зи агъади зун къуллугъдилай алудзава. Залан кӀвалахдихъ галаз зун кьунвач, це лугьуз физни заз регъуьда.

⁴КӀвалахдилай алудайла, масадбуру зун чпин кӀвалера кьабулун патал, за вуч ийида? Агьан, заз чир хьана!»

⁵Ада вичин агъадин буржар алайбуруз са-садаз кьилди-кьилди эвериз хьана. «Вал зи агъадин гьикьван бурж ала?» — сад лагьайдавай хабар кьуна.

⁶«ЧӀемдин виш бат алама», — жаваб гана ада. «Жуван буржунин куьгьне чар къахчуна, тадиз яхцӀурни цӀуд уьлчме лагьана цӀийи чар кхьихь», — лагьана кӀвалин-йикъан кьилел алайда.

⁷Ахпа муькуьдаз эверна, лагьана: «Вал гьикьван бурж ала?» «ЦӀуд агъзур укӀур къуьл», — жаваб гана ада. Адазни лагьана: «Жуван буржунин куьгьне чар къахчуна муьжуьд агъзур лагьана цӀийиди кхьихь».

⁸Агъади, крар бажарагъ гваз авуна лугьуз, кӀвалин-йикъан кьилел алай ламатӀдин тариф авуна. РикӀивайни, Аллагьдин экуьнин веледри чпин крарай кьил акъудзавайдалай и дуьньядин инсанри а крарай кьил акьул гваз акъудзава.

⁹За квез лугьузва: и гьахъ авачир дуьньяда кӀватӀай девлетрин куьмекдалди куьне квез дустар жагъура. Куьне гьакӀ ийиз хьайитӀа, пул виляй аватайла, куьн хушвилелди даим дуьньядин кӀвалера кьабулда.

¹⁰ГъвечӀи карда вафа тирди чӀехи крарани вафа жеда, гъвечӀи карда вафа туширди чӀехи крарани вафа жедач.

¹¹Квел чилин девлетар ихтибариз жезвачтӀа, халисан девлетар квел ни ихтибарда?

¹²Квевай чарадан девлет намус гваз хуьз хьаначтӀа, куь девлет квез ни гуда?

¹³Гьич са нуькердивайни кьве агъадиз къуллугъ ийиз жедач: абурукай сад кӀан хьайитӀа, муькуьди такӀан жеда; садаз вафавал хвейитӀа, муькуьдаз — жедач. Аллагьдизни пулуниз квевай сад хьиз къуллугъ ийиз жедач.

¹⁴И вири гафар пулунал рикӀ алай фарисейризни ван хьана, абур Исадал хъуьрезвай.

¹⁵Ада абуруз лагьана: — Куьне куьн инсанрин вилик гьахъ-михьи ксар хьиз къалурзава, амма Аллагьдиз куь рикӀера авайдакай хабар ава: инсанри къимет ава лугьузвай затӀ Аллагьдин вилерай муртад затӀ я.

¹⁶Ягьядилай вилик Къанунни авай, пайгъамбарарни. Адалай кьулухъ Аллагьдин пачагьвиликай Шад Хабар гуз хьана. Гзафбур, чпин вири къуватар эцигна, Аллагьдин Пачагьлугъдиз гьахьиз алахъзава.

¹⁷Цавни чил фад квахьун мумкин я, Къанундин лап гъвечӀи са цӀарни къуватдай аватдач.

¹⁸Вичин папахъ галаз чара хьана маса паб гъизвай гьар сада зинавал ийизва; масада рахкурнавай паб гъизвайдани зинавал ийизва.

¹⁹Девлет авай са инсан хьана. Ада, вичел пачагьдин хьтин чӀагай пекер алукӀиз, гьар юкъуз кӀандайвал кефер чӀугвазвай.

²⁰Михьиз пихери кьунвай Лазар лугьудай са къекъвераг адан варарин кӀане аваз хьана.

²¹Девлет авайдан суфрадилай амукьай кӀусар вичел мус гьалтдатӀа лугьуз, ам вил алаз жедай. КицӀерини къвез адан пихериз мез гудай.

²²Ам кьейила, малаикри къачуна, ам Ибрагьиман патав тухвана. Девлет авайдини кьена, ам кучукна.

²³Агъа дуьньяда азабрик кваз, девлет авайда кьил хкажайла, яргъай хьиз адаз Ибрагьим ва адан патавни Лазар акуна.

²⁴«Я Ибрагьим буба! — гьарай кваз лагьана ада. — Зун кана чӀух жезва, заз регьим ая. Вуна зи патав Лазар ракъура, ада вичин тупӀун кӀвенкӀв кьежирна зи мецивай гуьцӀрай».

²⁵Амма Ибрагьима лагьана: «Я хва! Вуна рикӀел хкваш хьи, ваз дуьньяда авай кьван хъсанвилер хьана, амма Лазараз анжах писвилер акуна. Гила адаз ина теселли жагъида, ваз — азабар.

²⁶Адалайни гъейри, куьни чи арада ахьтин кӀан квачир дагьар ава хьи, инай куь патаз кӀан хьайибурувай экъечӀиз жедач ва а патайни и патаз къвез жедач».

²⁷«За ваз минетзава, буба, — лагьана девлет авайда, — вуна Лазар зи бубадин кӀвализ ракъура,

²⁸ана захъ вад стха ама. Ада абуруз зурба азаб-азият авай и жегьеннемдикай хабар гурай, гьабур хьайитӀани иниз акъат тавурай».

²⁹«Абурухъ Мусадин ва пайгъамбаррин ктабар ава, — лагьана Ибрагьима, — къуй абуру ана кхьенвайдал амал авурай».

³⁰«Ваъ, Ибрагьим буба! — лагьана девлет авайда. — Абурун кьилив кьейибурукай сад фейитӀа, абур Аллагьдин рекьел къведа».

³¹«Абур Мусадинни пайгъамбаррин чӀалахъ жезвачтӀа, — лагьана Ибрагьима, — кьейидалай кьулухъ чан хтанвай са вуж ятӀани абурун патав атайла, абур чӀалахъ жедач».