Read Lezgi New Testament – ЦӀийи Икьрар ЛукӀа 17 Bible Online

ЛукӀа 17 - Lezgi New Testament – ЦӀийи Икьрар bible

ЛукӀа 17

¹Исади Вичин тилмизриз лагьана: — Инсан рекьяй акъуддай затӀар дуьньяда тахьун мумкин туш, амма абур ни арадал гъизватӀа, гьадаз гуж жеда.

²ГьакӀан гъвечӀи инсанрикай сад рекьяй акъудзавай кас гарданда регъуьн къван туна гьуьлуьз вегьейтӀа, хъсан я.

³Мукъаят хьухь, ви стхади гунагь жедай са кар авуртӀа, вуна адаз туьнбуьгь ая. Ада туба авуртӀа, вуна адалай гъил къахчу.

⁴Ада йикъа иридра ваз акси яз гунагь крар авуртӀа ва, иридра ви патав атана, мад туба авуртӀа, вуна адалай гъил къахчу.

⁵Илчийри Реббидиз лагьана: — Чи иман чӀехиди ая!

⁶Реббиди лагьана: — Квехъ финдин твар кьванни са гъвечӀи иман аватӀа, тутун тараз куьне «Жуван дувуларни къахчуна фена гьуьлуьз гьахь», — лагьайтӀа, ам куь чӀалаз килигда.

⁷Цан цазвай, я тахьайтӀа куь малар хуьзвай вач-хъша элкъвена хтайла, квевай нивай адаз: «Тадиз хъша, суфрадихъ ацукь», — лугьуз жеда?

⁸Акси яз, куьне адаз «Вуна заз нянин тӀуьн гьазура, жуван пекер дегишарна, за тӀуьн-хъун ийидай чӀавуз захъ гелкъуьгъ, ахпа жувани неъ», — лугьудачни?

⁹Вичин эмир кьилиз акъудна лагьана ада а вач-хъшадиз сагърай лугьудани?

¹⁰Куьнни гьакӀ я, квез ганвай эмир кьилиз акъуддайла, лагь: «Чун гьакӀан лукӀар я, чна анжах чаз гайи эмир кьилиз акъудна».

¹¹Садра Иса, Ярусалимдиз физвайла, Самариятдинни Галилейдин сергьятдин патарив гвай.

¹²Ам са хуьруьз гьахьдайла, Адан вилик жузам азар квай цӀуд кас атана, са тӀимил къерехда хьиз акъвазна.

¹³Абуру гьарайна лагьана: — Иса! Устаз! Чаз регьим ая!

¹⁴Абур акурвалди, Исади лагьана: — Алад, фена куьн хахамриз къалура. Фидай рекье абур жузамдикай михьи хьана.

¹⁵Абурукай сад, вич сагъ хъхьана акурди, элкъвена хтана. Ада ван алаз Аллагьдиз шукурар авуна.

¹⁶Ам Исадин кӀвачерик ярх хьана, адаз «Вун сагърай» лагьана. А кас чувуд ваъ, самариятви тир.

¹⁷Исади адавай хабар кьуна: — Бес михьи хъхьайбур цӀуд кас туширни? Амай кӀуьд кас гьинава?

¹⁸Патанди тир и касдилай гъейри, Аллагьдиз шукурар ийиз вучиз абурукай садни хтанач?

¹⁹Къарагъ, вач, ви иманди вун хиласна.

²⁰Садра фарисейри Аллагьдин пачагьвилин вахт мус алукьда лагьана хабар кьурла, Исади жаваб ганай: — Аллагьдин пачагьвилин вахт вилериз аквадай жуьреда алукьдач,

²¹я квез: «Ингье, им Аллагьдин пачагьвал я», я тахьайтӀа: «Килиг, ана авайди Аллагьдин пачагьвал я» лагьана Адакай хабарни гудач. Ингье, Аллагьдин пачагьвал куь арада авайди я.

²²Ада тилмизриз мад хълагьна: — Йикъар къведа хьи, Инсандин Хцин баркалладин са югъ хьайитӀани квез акваз кӀан жеда, амма ам квез аквадач.

²³Квез садбуру: «Ингье, Инсандин Хва ина ава», — лугьуда. Муькуьбуру: «Ангье, Ам ана ава», — лугьуда. Куьн абурун гуьгъуьна гьатмир, я абуру къалурзавай патаризни фимир.

²⁴Цавун са патай ягъайла муькуь пад экуь ийидай цӀайлапан хьиз, Инсандин Хва атана акъатда.

²⁵Амма сифте Инсандин Хцикай и несилдин инсанри кьил къакъудда, Ам гзаф азиятрик акатун лазим я.

²⁶Нуьгьан девирда гьикӀ хьанатӀа, Инсандин Хва элкъвена хтай девирдани гьакӀ жеда:

²⁷Нуьгьан девирда, ам гимидиз акьахдалди, вирибуру незвай, хъвазвай, папар гъизвай, гъуьлуьз физвай, амма дуьньядал яд акьалтна — вири терг хьана.

²⁸Гьа икӀ Лутан девирдани незвай, хъвазвай, къачузвай, маса гузвай, тарар-тумар цазвай, дараматар эцигзавай.

²⁹Амма Лут Садумдай экъечӀай юкъуз, Садумдал цавай цӀайни гугурт квай марф къвана ва вири тергна.

³⁰Инсандин Хва пайда хьайи юкъузни гьакӀ жеда.

³¹Гьа юкъуз кӀвалин чӀередал вуж хьайитӀа, ам кӀвале авай шейэр къахчуз эвичӀ тавурай; вуж чуьлда аваз хьайитӀа, ам элкъвена кӀвализ хтун тавурай.

³²Лутан папан кьилел атай мусибат рикӀел хкваш.

³³Вуж вичин чан хуьз алахъзаватӀа, адавай ам къакъудда, ни вичин уьмуьрдилай гъил къачуртӀа, адан чан сагъни жеда.

³⁴За квез лугьузва: гьа йифиз кьвед са месик жеда: абурукай сад къахчуда, муькуьди тада.

³⁵Кьве папа са регъве техил регъведа: абурукай сад къахчуда, муькуьди тада.

³⁷Исади лагьай и гафариз яб гайидалай кьулухъ тилмизри Адавай хабар кьуна: — А крар гьина хьун лазим я? — Гьинал леш алатӀа, — жаваб гана Ада, — гьанал къузгъунарни кӀватӀ жеда.