Read Lezgi New Testament – ЦӀийи Икьрар ЛукӀа 18 Bible Online

ЛукӀа 18 - Lezgi New Testament – ЦӀийи Икьрар bible

ЛукӀа 18

¹Ахпа Исади Вичин тилмизриз умуд квадар тавуна датӀана дуьаяр авуникай са кьиса ахъайна:

²— Са шегьерда са дуванбег авай, адаз я Аллагьдихъай кичӀедачир, я инсанрихъай регъуьдачир.

³Гьа шегьерда са хендеда авай. Дуванбегдин патав къвез ада лугьузвай: «Дуванда вуна зи пад хуьх».

⁴Амма адаз папан пад хуьз кӀан тийиз хейлин вахт алатайла, дуванбегди вичи вичикди лагьана: «Заз Аллагьдихъай кичӀедачтӀани, инсанрихъай регъуьдачтӀани,

⁵и папа зун секиндиз тун тавуниз килигна, мад ада зи кьилтӀар тавун патал, за адан силис гьялда».

⁶Реббидини лагьана: — И адалат гвачир дуванбегди вуч лугьузватӀа килиг!

⁷Мегер Аллагьди Вичи хкягъайбурун, Вичиз юкъуз-йифиз ялварзавайбурун пад кьадачни? Ада абуруз гудай куьмек энгелардани кьван?

⁸За квез лугьузва: Аллагьди тадиз абурун пад кьада. ГьакӀ ятӀани, Инсандин Хва элкъвена хтайла, яраб Адаз чилел иман жагъин хъийидатӀа?

⁹Чеб гьахъ-михьи инсанар яз гьисабзавай, масабур кваз такьазвай ксариз Исади агъадихъ галай кьиса ахъайна:

¹⁰— Кьве инсан дуьаяр ийиз Аллагьдин КӀвализ гьахьна. Абурукай сад фарисей тир, муькуьдини — харж кӀватӀдайди.

¹¹Фарисейди кьилди акъвазна дуьа ийидайла, лагьана: «Я Аллагь! Ваз шукур хьуй, зун амай вири инсанар хьтинди туш: зун чапхун гвайбурукай, гунагькаррикай, зинабурукай ва и харж кӀватӀзавай хьтиндини туш.

¹²За гьафтеда кьведра сив хуьзва ва гъилиз къвезвайдан цӀудакай са пайни за Аллагьдин КӀвализ гузва».

¹³Харж кӀватӀзавайда фарисейдивай яргъал акъвазна, кьил хкаждай жуьрэт авачиз, вичин хур гатаз, лагьана: «Я Аллагь! Гунагькар заз мергьемет ая!»

¹⁴За квез лугьузва хьи, фарисей ваъ, гьа и харж кӀватӀзавай инсан дуьа авурдалай кьулухъ вичин кӀвализ Аллагьдин вилик гьахъ-михьи яз хъфена. Гьар ни вичи вич вине кьуртӀа, гьам агъуз вегьида, вичи вич агъуз кьурди виниз акъудда.

¹⁵Исадин патав, Ада кап алтадун патал, аяларни гъидай, амма тилмизри абуруз туьгьметар ийизвай.

¹⁶Исади Вичин тилмизриз эверна, лагьана: — Аялар Зи патав атурай, куьне абуруз манийвилер ийимир, вучиз лагьайтӀа Аллагьдин Пачагьлугъ гьахьтинбурунди я.

¹⁷За квез рикӀивай лугьузва: ни Аллагьдин Пачагьлугъ аялди хьиз кьабул тавуртӀа, ам аниз акъатдач.

¹⁸Гьакимрикай сада хабар кьуна: — Хъсан Муаллим! Эбеди уьмуьрдин иеси хьун патал, за вуч авун лазим я?

¹⁹— Вуна Заз хъсанди вучиз лугьузва? — жаваб гана Исади. — Аллагьдилай гъейри садни хъсанди туш.

²⁰Ваз Аллагьдин тагькимар чида: «Зинавал ийимир; яна рекьимир; чуьнуьхмир; тапан шагьидвал ийимир; жуван диде-бубадиз гьуьрмет-хатур ая».

²¹— За вири а тагькимрал жуван жегьил чӀавалай амал ийизва, — лагьана ада.

²²И гафарин ван хьайи Исади лагьана: — Ваз кимизвайди са кар я: фена вахъ вуч аватӀа, маса гана, кесибриз пай ая, гьа чӀавуз вахъ цавара хазинаяр жеда. ГьакӀ авурла, Захъ галаз ша.

²³И гафарилай кьулухъ адан кефияр чӀур хьана, вучиз лагьайтӀа ам лап гзаф девлет авайди тир.

²⁴И гьал акур Исади адаз лагьана: — Девлет авайбуруз Аллагьдин Пачагьлугъдиз фин акьван четин я хьи!

²⁵Девлет авайдаз Аллагьдин Пачагьлугъдиз гьахьунилай деведиз рапунин хъуькъуьмдай экъечӀун регьят я.

²⁶И гафарин ван хьайибуру лагьана: — АкӀ хьайила, бес нивай вич хилас ийиз жеда?

²⁷— Инсанрилай алакьдачир кар Аллагьдилай алакьда — жаваб гана Исади.

²⁸Петрудини лагьана: — Ингье, чи мал-девлет туна чун Ви гуьгъуьна аваз атана.

²⁹Исади абуруз лагьана: — За квез рикӀивай лугьузва: Аллагьдин Пачагьлугъдиз фин патал, и девирда кӀвал-югъ, диде-буба, стха-вах, паб-аял тур, гьар садал вичи турдалайни гзаф гьалтда, къведай девирда адаз эбеди уьмуьр жеда.

³⁰

³¹Вичин цӀикьвед илчи са къерехдихъ тухвана, Исади абуруз лагьана: — Ингье, чун Ярусалимдиз физва. Инсандин Хцикай пайгъамбарри кхьенвайди ина Адан кьилел къведа:

³²Ам римвийрин гъиле твада, Адакай рахшандарни ийида, Адакай ягьанатда, Адаз тфуярни гуда,

³³Ам гатана рекьинни ийида. Амма пуд лагьай юкъуз Адал чан хкведа.

³⁴Амма Исади лагьай гафарин гъавурда абур гьатначир, и гафарин мана Аллагьди илчийрикай кӀевирнавай хьиз тир, абурувай а мана кьатӀуз хьаначир.

³⁵Иса Еригьандин патав агакьдайла, рекьин къерехда са буьркьуьди, це лугьуз, ацукьнавай.

³⁶Патавай инсанар физвайди чир хьайила, ада хабар кьуна: — Им вуч хабар я?

³⁷Адаз Назаретви Иса къвезва лагьана.

³⁸Гьа вахтунда ада гьарайна: — Я Иса! Заз регьим ая! Я Давуд пачагьдин Хва!

³⁹Вилик кваз физвайбур ам секинриз алахъна, амма ада мадни кӀевиз гьарайна: — Я Давуд пачагьдин Хва! Заз регьим ая!

⁴⁰Исади, акъвазна, ам Вичин патав гъун эмирна. Буьркьуьди Адан патав гъайила, Исади хабар кьуна:

⁴¹— Ваз Завай вуч кӀанзава? — Я Агъа! — жаваб гана ада. — Заз экв ахкуна кӀанзава.

⁴²— Сагъ хъхьухь! — лагьана Исади. — Ви иманди вун сагъарна.

⁴³Адан вилериз гьасятда экв хтана, амни Аллагьдиз хийир-дуьа ийиз-ийиз Исадин гуьгъуьна аваз фена. И кар акур вири халкьдини Аллагьдиз шукурар ийиз хьана.