Read Lezgi New Testament – ЦӀийи Икьрар ЛукӀа 2 Bible Online

ЛукӀа 2 - Lezgi New Testament – ЦӀийи Икьрар bible

ЛукӀа 2

¹Гьа йикъара, чилел алай кьван инсанар сиягьдиз къачун патал, АгъустӀас пачагьдилай эмир атанай.

²Им Куьруьна Суьрия идара ийизвай чӀав тир. Сад лагьай гъилера халкь сиягьдиз къачузвай.

³Чпин тӀварар кхьиз тун патал, вирибур чпин тухумрин шегьерриз хъфенай.

⁴Галилейдин Назарет шегьердай Ягьудатдиз, Давуд пачагьдин ватан тир Бетлегьем шегьердиз, Давудан тухумдикай тир Юсуфни фена.

⁵Ам аниз ада лишан кутунвай Майрамни галаз чпин тӀварар сиягьда тун патал фейиди тир. Майрам кӀвачел заланзавай.

⁶Абур Бетлегьемда авайла, Майрамаз аял жедай вахт алукьна.

⁷Ада Хва — сифте Аял хана, Ам пекерик кутуна, мугьманар кьабулдай кӀвале чка тахьуниз килигна, тӀуна эцигна.

⁸Абур акъвазнавай чкадин мукьув гвай чӀура йифиз чпин суьруьяр хуьзвай чубанар авай.

⁹Садлагьана абурун вилик Реббидин малаик акъатна. Абур алай чка Реббидин къудратдин нурари экуь авуна. Абуруз кӀевелай кичӀе хьана.

¹⁰Амма малаикди лагьана: — КичӀе жемир, за квез Исраилдин вири инсанар шадардай зурба муштулух гузва:

¹¹къе Давудан шегьерда куь Хиласкар — Ребби Месигь дидедиз хьанва.

¹²Имни квез ишара: тӀунай квез пекерик кутунвай Аял жагъида.

¹³Садлагьана малаикдин патав Аллагьдиз шукурар ийиз-ийиз атай цаварин гзаф кьушунар пайда хьана:

¹⁴— Шукур хьуй цавараллай Аллагьдиз! — лагьана абуру. — Адаз хуш инсанар авай чилел ислягьвал хьурай!

¹⁵Малаикар цаварал хъфейла, чубанри сада садаз лагьана: — Ша чун Бетлегьемдиз фин, ана вуч хьанатӀа килигин. Чаз Реббиди вуч малумнаватӀа акван.

¹⁶Тади кваз аниз атай абуруз Майрам, Юсуф ва тӀуна авай Аял жагъана.

¹⁷БицӀек акурла, чубанри малаикди чпиз Адакай лагьай гафар анал алайбуруз тикрар хъувуна.

¹⁸Чубанрин ихтилатар ван хьайи вири мягьтел хьана.

¹⁹Амма Майрама ибур вири вичин рикӀе хвена, ибурукай фикирзавай.

²⁰Чубанар чпиз акурдай ва ван хьайидай Аллагьдиз шукурар ийиз-ийиз хъфена: вири крар абуруз лагьай жуьреда кьиле фенвай.

²¹Аял дидедиз хьайи муьжуьд йикъалай Ам суьннет авунай ва Адал Иса тӀвар эцигна. А тӀвар дидедин руфуна аял кьадалди малаикди гайиди тир.

²²Реббиди Мусадиз гайи Къанундалди михьивилердай адет кьилиз акъуддай вахт алукьайла, Юсуфани Майрама БицӀек Реббидиз къалурун патал Ярусалимдиз гъана.

²³Гьа Къанунда кхьенвайвал, гьар са сифте гада аял Реббидиз талукьарна ва кьве тӀапӀас ва я кьве жегьил лиф къурбанд гана кӀанзавайди я.

²⁴

²⁵Гьа вахтунда Ярусалимда Суьмегьал лугьудай кас аваз хьана. Ам гьахъ-михьи ва Аллагь рикӀел алайди тир, вични Исраил гъамарикай азад жедай югъ атунал вил алай, Пак Руьгь акатнавай инсан тир.

²⁶Реббидин Месигь вилералди такунмаз вич рекьин тийидайди адаз Пак Руьгьди лагьанвай.

²⁷Суьмегьал Руьгьдин эсерди Аллагьдин КӀвализ гъана. Чпин БицӀек патал Мусадин Къанунда къалурнавай къайдаяр кьилиз акъудиз, Исадин дидени буба Аллагьдин КӀвализ гьахьайла,

²⁸Суьмегьала абурувай аял къачуна гъилерал кьуна, Аллагьдиз шукурар авуна ва лагьана:

²⁹— Заз гайи гаф Вуна кьилиз акъудна, Вири Ихтияррин Иеси, гила На заз рухсат гуда,

³⁰Зи вилериз вилик вири халкьарин На гьазурай Хиласвал акуна.

³¹

³²Гьар са халкьдиз рехъ къалурдай экв гуда, Ви халкь Исраилдал гъида Ада баркалла.

³³Аялдин бубани диде Адакай авур ихтилатри мягьтеларнай.

³⁴Суьмегьала абуруз хийир-дуьа авуна, Аялдин диде Майрамаз лагьана: — Ингье, и аялдикай Исраилда гзафбур агъуз ва виниз хьунин себеб жеда. Адакай Аллагьди ганвай, амма гзафбуру кьабул тийидай ишара жеда.

³⁵Гьа идалди абурун рикӀера вуч аватӀа ачух жеда. Ваз, лагьайтӀа, рикӀ атӀай кьван тӀар жеда.

³⁶Инал Ашеран тайифадикай тир Фануилан лап кьуьзуь хьанвай руш Гьайна алай. Ам Аллагьдин мецелай раханай. Гъуьлуьз фейидалай кьулухъ ада вичин итимдихъ галаз санал ирид йисуз уьмуьр тухванай.

³⁷Ам кьудкъанни кьуд йис хьанвай хендеда тиртӀани, ада, Аллагьдин КӀвале жез, йифди-югъди дуьаяр ийиз, сив хуьз Аллагьдиз къуллугъ ийидай.

³⁸Гьанна гьа вахтунда Аялдин диде-бубадин патав атана, ада Аллагьдиз шукурар авуна ва ада Ярусалим азад авунал вил алай кьванбуруз таза аялдикай ихтилатар ийиз хьана.

³⁹Реббидин Къанунда кхьенвайвал, вири лазим крар авуна куьтягь хьайила, абур Галилейдиз, чпин Назарет шегьердиз хтана.

⁴⁰Аял къвердавай чӀехи жезвай, ва къвез-къвез къуватда ва камалда гьатзавай. Ам Аллагьдин нуьсретдик квай.

⁴¹Гьар йисуз Адан диде-буба Ярусалимдиз Песагь суварик фидай.

⁴²Къайда яз, суварик Ярусалимдиз фидайла, абуру аниз цӀикьвед йиса авай Иса сад лагьай гъилера тухванай.

⁴³Суварин йикъар куьтягь хьана, абур элкъвена хквезвайла, гада Иса Ярусалимда амукьна. Ам хквен тийизвайди Адан диде-бубадиз эвелдай чир хьаначир.

⁴⁴Абуру Ам масабурухъ галаз хквезва жеди лагьана фикирнай. Амма са йикъан рехъ атӀайдалай кьулухъ, абур мукьва-кьилийринни танишрин арада гададихъ къекъвез хьанай.

⁴⁵Ам жагъун тавурла, Адахъ къекъвез элкъвена Ярусалимдиз хъфенай.

⁴⁶Пуд йикъалай абуруз Ам, Аллагьдин КӀвале муаллимрихъ яб акализ ва абурун вилик суалар эцигиз, абурун арада ацукьнаваз жагъанай.

⁴⁷Исадин ван хьайибур Адан акьулдал ва Ада гузвай жавабрал гьейран тир.

⁴⁸Ам акурла, дидени буба мягьтел хьана амукьна. — Я Хва, — лагьана дидеди, — Вуна чаз вуч авуна? Ви бубани Зун рикӀик гъалаба кваз Вахъ къекъвез хьана.

⁴⁹— Куьн Захъ вучиз къекъвена? — жаваб гана Исади. — Зун Зи Бубадин кӀвале хьана кӀанзавайди квез чизвачирни?

⁵⁰Амма абур Исади лагьай гафарин гъавурда гьатнач.

⁵¹Ам абурухъ галаз элкъвена Назаретдиз хтана. Исади абуру лагьай вуч хьайитӀани ийизвай. Адан дидеди Ярусалимда хьайи агьвалат рикӀел хвена.

⁵²ЧӀехи жердавай Исадин камал гзаф, Аллагьдини инсанри Адахъ ийизвай майилар артух жезвай.