Read Lezgi New Testament – ЦӀийи Икьрар ЛукӀа 22 Bible Online

ЛукӀа 22 - Lezgi New Testament – ЦӀийи Икьрар bible

ЛукӀа 22

¹Песагь тӀвар алай ТӀили фарин сувар мукьва жезвай.

²ЧӀехи хахамарни тавратдарар Иса чпи гьикӀ рекьидатӀа лугьуз са багьнадихъ къекъвезвай, амма абуруз халкьдик гъулгъула акатиз кичӀезвай.

³Исадин цӀикьвед тилмиздикай сад тир Искарият лакӀаб алай Ягьудак иблис акатна.

⁴Ам, Иса чӀехи хахамринни аскеррин кьилевайбурун гъиле гьикӀ твадатӀа лугьуз, меслят ийиз фена.

⁵Абуруз хвеши хьана, абуру а кардай адаз пул гун хиве кьуна.

⁶Ягьуд абурун икьрардал рази хьана, ва ам, Иса халкьдиз таквадайвал абурун гъиле тун патал, са къулай вахтунихъ къекъвезвай.

⁷ТӀили фарин суварик адет тирвал тукӀвадай Песагьдин кӀел къурбанддиз акъуддай югъ атана.

⁸Исади Петрудизни Ягьядиз «Алад, фена чаз Песагь суварик недай затӀар гьазура», — лагьана.

⁹— Ваз чна тӀуьн гьина гьазурна кӀанзава? — хабар кьуна абуру.

¹⁰— Куьн шегьердиз гьахьайла, — жаваб гана Исади, — квел цив ацӀай квар гвай са итим гьалтда; гьадан гуьгъуьна аваз фена, гьам гьахьай кӀвализ куьнни гьахь.

¹¹А кӀвалин иесидиз «Муаллимди Вичин тилмизрихъ галаз санал Песагь суварин суфра авай кӀвал гьим я лугьуз хабар кьазва», — лагь.

¹²Адани квез вини гьавада чӀехи тавдин кӀвал къалурда. Гьана Песагьдин тӀуьн гьазура.

¹³Абурни фена. Абуруз Исади лагьай гафар галай-галайвал кьилиз акъатайди акуна. Абуру гьана Песагьдин тӀуьн гьазурна.

¹⁴Вахт хьайила, Исади, Вичин цӀикьвед илчини галаз суфрадихъ ацукьна,

¹⁵лагьана: — И Песагьдин фу Заз квехъ галаз Зи азаб-азиятдин вахт алукьдалди тӀуьнайтӀа гзаф кӀандай!

¹⁶За квез лугьузва: за и фу Аллагьдин Пачагьлугъда Песагь кьилиз акъатдалди недач.

¹⁷Ахпа Ада сукӀра гъиле кьуна, Аллагьдиз шукур авуна, лагьана: — Къачуна им куь арада пая.

¹⁸За квез лугьузва хьи, гьа и декьикьадилай, Аллагьдин пачагьвал жедалди, За мад чехир — ципицӀрин миже хъвадач.

¹⁹Ахпа Ада фу къачуна, Аллагьдиз шукур ийиз-ийиз, фу кӀус-кӀус авуна, а кӀусар абуруз гана ва лагьана: — Им куь рекье къурбандзавай Зи Беден я. Зун рикӀел хтун патални, гьа икӀ ая.

²⁰Нянин тӀуьнилай кьулухъ Исади мад гъиле сукӀра кьуна лагьана: — И сукӀра — цӀийи Икьрар я. Ам Зи иви авадаруналдин кутӀунда.

²¹Ингье, Зун хаинвилелди маса гузвай касдин гъилни Зи Гъилихъ галаз санал са суфрадал ала.

²²Инсандин Хва Вичиз Аллагьди ганвай рекьяй фида, амма Ам маса гудай касдиз жедайди ма́са гуж я!

²³Тилмизар чпин арадай и кар ийидайди яраб вуж ятӀа лугьуз, сада садавай хабар кьаз хьана.

²⁴Тилмизрин арада, чпикай вуж чӀехиди яз гьисабна кӀанзавайди ятӀа лугьуз, гьуьжетар гьатна.

²⁵И чӀавуз Исади абуруз лагьана: — Мажусийрин арада пачагьри чпин халкьарал агъавал ийизва, гьукумдарри чпиз «Архаяр» лагь лугьуз халкьдивай тӀалабзава.

²⁶Куь арада акӀ тахьурай! Квекай виридалайни вине авайда вич агъада авайдай, гьакимвалзавайда вич виридан кьилел-кӀвачел элкъвезвайдай кьун лазим я.

²⁷Вине авайди вуж я — суфрадихъ ацукьнавайди яни, я тахьайтӀа гьадахъ гелкъвезвайди? Суфрадихъ ацукьнавайди тушни кьван? Амма Зун куь арада вач-хъша хьиз ава.

²⁸Зун синагъ ийизвай вахтара куьн датӀана Захъ галамукьна.

²⁹Зи Бубади Заз пачагьвал гьикӀ багъишнатӀа, Зани ам квез багъишзава.

³⁰Зи Пачагьлугъда куьн нез, хъваз Зи суфрадихъ жеда. Тахтара ацукьна, куьне Исраилдин цӀикьвед тайифадин гьахъ-дуван ийида.

³¹Эй, Симун, Симун! Иблисдиз куьн къуьл хьиз сафунай ягъиз кӀан хьанай.

³²Амма За ви иман куьтягь тахьуй лагьана вун патал дуьаяр авунай. Вунани, Захъ элкъвена, ви стхайрин иман мягькемара.

³³Исадиз: — Я Агъа! — жаваб гана Петруди. — Ви гуьгъуьна аваз къазаматдиз физни, рекьизни зун гьазур я.

³⁴Амма Исади лагьана: — За ваз лугьузва, я Петру, къе кӀекре гьарайдалди, вуна Закай пудра кьил къакъудда.

³⁵Ахпа Исади тилмизриз лагьана: — За куьн пул авай кисени гвачиз, гьебени гвачиз, кӀвачин къапарни гвачиз ракъурайла, квез кими хьайи затӀ хьанайни? Абуру «ваъ» лагьана жаваб гана.

³⁶Инал Ада лагьана: — Амма гила пул авайда пул яхъ, гьебени къачу. Нихъ тур авачтӀа, жуван пекерни гана тур къачу.

³⁷За квез лугьузва хьи, Каламда: «Адакай тахсиркаррин тай авуна» лагьана кхьенвай гафар Зи кьилел атун лазим я. Закай вуч кхьенватӀа, исятда гьам кьилиз акъатда.

³⁸— Я Агъа! — лагьана абуру. — Ингье чав кьве тур гва. — Бес я, — лагьана Ада.

³⁹Къайда хьанвайвал, Иса Зейтун пелел фена. Адан гуьгъуьнал алаз Адан тилмизарни фена.

⁴⁰Чкадал агакьайла, Исади абуруз лагьана: — Куьн темягьра гьат тавурай лугьуз дуьаяр ая.

⁴¹Ам Вич, гадардай къван аватдай кьван чкадиз абурувай къакъатна, метӀер яна, дуьаяр ийиз эгечӀна:

⁴²— Я Буба! За Ваз тавакъу ийида, Ваз кӀан ятӀа, Зун и азабдикай яргъаз ая! ЯтӀани, Заз кӀандайвал ваъ, Ваз кӀандайвал хьурай!

⁴³Цаварай Исадин патав Адак руьгь кутаз малаик атана.

⁴⁴РикӀик зурба гъалаба кваз, Исади мукьуфдалди дуьаяр ийизвай; Адакай ивидин стӀалар хьиз гьекь чилел кӀвахьзавай.

⁴⁵Дуьа акъвазарна, Ам Вичин тилмизрин патав атана. Адаз абур дерт хьана ахвариз фенваз жагъана. —

⁴⁶Куьн вучиз ксанва? — жузуна Ада. — Къарагъ, куьн темягьра гьат тавурай лугьуз дуьаяр ая.

⁴⁷Гаф мецел аламаз, гзаф инсанар атана акъатна, кӀвенкӀве Адан цӀикьвед илчидикай сад тир Ягьуд авай. Ам темен гуз Исадиз мукьва хьана.

⁴⁸— Эй, Ягьуд! — хабар кьуна Исади. — Вуна Инсандин Хва темендалди маса гузвани?

⁴⁹Инал жедай кардин кьил акурла, Исадихъ галайбуру Адаз лагьана: — Я Агъа! Турар кардик кутадани?

⁵⁰Абурукай сада кьилин хахамдин вач-хъшадин эрчӀи яб яна галудна.

⁵¹Инал Исади лагьана: — Бес я, акъваз! Адан япук гъил кяна, ам сагъар хъувуна.

⁵²Вичиз акси экъечӀнавай чӀехи хахамриз, агъсакъалриз ва Аллагьдин КӀвалин къаравулрин кьиле авайбуруз Исади лагьана: — Куьн Зи винел турарни вагьрамар гваз атанва, на лугьуди, Зун са къачагъ я!

⁵³Зун квехъ галаз гьар юкъуз Аллагьдин КӀвале жезвай, куьне Зал гъил хкажначир. Амма гила куь девран алукьнава, мичӀивилин девран гъалиб хьанва.

⁵⁴Иса кьуна кьилин хахамдин дараматдиз тухвана. Петруни яргъай хьиз абурун гуьгъуьна аваз физвай.

⁵⁵Иса кьурбуру гьаятдин юкьвал цӀай авуна. Вири санал ацукьайла, атана абурун арада Петруни ацукьна.

⁵⁶Ам цӀун патав ацукьнаваз акур са къаравушди, адаз мукьуфдалди килигна, лагьана: — Имни Гьадахъ галайди тир.

⁵⁷Амма Петруди вич Исадихъ галайди инкар авуна, а папаз лагьана: — Ам Заз чидай кас туш.

⁵⁸Са герендилай ам акур са масадани лагьана: — Вунни гьабурукай я. Амма Петруди лагьана: — Туш.

⁵⁹Са сят кьван алатайла, мадни сада вичел чӀалахъ яз лагьана: — РикӀивайни, имни Гьадахъ галай, гьа имни галилейви я.

⁶⁰— Вун квекай рахазватӀа, зун гъавурда гьатзавач, — лагьана Петруди. Ада икӀ лугьузвайла, кӀекре гьарайна.

⁶¹Гьа вядеда Ребби элкъвена Петрудиз килигна; Петрудин рикӀел Реббиди лагьай «Къе кӀекре гьарайдалди вуна Закай пудра кьил къакъудда» гафар хтана.

⁶²Варарай экъечӀна, ам къагьардалди шехьна.

⁶³Иса кьунвай инсанри, Адакай рахшандар ийиз, Ам гатазвай.

⁶⁴Исадин вилер кутӀунна, Адан чин ягъиз, Адавай хабар кьазвай: — Вун пайгъамбар ятӀа, вун ни янатӀа, лагь кван!

⁶⁵Абуру Адак хкуьрдай маса гафарни лугьузвай.

⁶⁶Югъ малум хьайила, чувудрин агъсакъалар, чӀехи хахамар ва тавратдарар кӀватӀ хьана. Абуру Иса чпин Меслягьатдиз тухвана

⁶⁷ва хабар кьуна: — Лагь кван чаз, Месигь Вун яни? — За квез лагьайтӀа, куьн Зи чӀалахъ жедач — лагьана Исади.

⁶⁸Квевай За хабар кьуртӀа, куьне Заз жавабни гудач.

⁶⁹Къенин йикъалай Инсандин Хва къудрат авай Аллагьдин эрчӀи патавай ацукьда.

⁷⁰Гьа чӀавуз вирида лагьана: — АкӀ хьайила Вун Аллагьдин Хва я ман? — Куьне Зун я лугьузва хьи, — жаваб гана Ада.

⁷¹— Мад чаз шагьидвал герек яни? — лагьана абуру. — Чаз вири Адан Вичин сивяй ван хьана.