Read Lezgi New Testament – ЦӀийи Икьрар ЛукӀа 3 Bible Online

ЛукӀа 3 - Lezgi New Testament – ЦӀийи Икьрар bible

ЛукӀа 3

¹Тибера Римда пачагьвал ийизвай цӀувад лагьай йисуз ПунтӀи ПилатӀа Ягьудатда сердервал, Гьируда Галилейда гьакимвал, адан стха ФилипӀа Итуратда ва Тарахан вилаятда гьакимвал, Луьсанани Абилинейда гьакимвал ийизвай.

²Гьа и береда Гьайнас ва Каяф кьилин хахамар тир. Гьа чӀавуз Зекеридин хва Ягья кьурумда авай. Ана адаз Аллагь вичихъ галаз рахай ван хьана.

³Ярдан вацӀун патарив гвай чилера къекъвез, ада инсанриз куьн Аллагьдин рекьел ша, и кар кьиле тухунин лишан яз цик акахьун къачу ва гьа чӀавуз Аллагьди квелай гъил къахчуда лугьуз вязер-несигьатар гузвай.

⁴ГьакӀ хьайила, Яшай пайгъамбардин ктабда икӀ кхьенвай: «Кьурумда гьарайзавайдан ван чкӀида: „Реббидиз рехъ гьазура, Адан рехъ дуьзди ая.

⁵Гьар са дере ацӀур хъия, дагъни тепе дуьзен ая. Патахъ рекьер дуьзар хъия, ханвай рекьер цӀалцӀам хъия.

⁶Гьа чӀавуз чан алай гьар садаз Аллагьди гудай хиласвал аквада“» .

⁷Цик акахьун къачун патал вичин патав атайбуруз Ягьяди лугьудай: — Эй гъуьлягъдин къеняй акъатайбур! Аллагьди, хъиляй ацӀана, квез гудай жазадикай квевай катиз жеда лагьай фикир куь кьилера ни туна?

⁸Къуй куь хъсан крарин майвайри куьн Аллагьдин рекьел атанвайди къалуррай! «Чи буба Ибрагьим я», — лугьуз ацукьмир; за квез лугьузва хьи, Аллагьдивай и къванерни Ибрагьиман веледриз элкъуьриз жеда.

⁹ЯкӀвни датӀана тарарин пунарив гьазур я: хъсан майваяр тегъидай гьар са тар атӀана цӀуз гадарда.

¹⁰Халкьди Ягьядивай хабар кьаз хьана: — Бес чна вуч авун лазим я?

¹¹— Нихъ кьве къат перем аватӀа, авачирдаз це, — жаваб гуз хьана ада, — нихъ недайди аватӀа, авачирдаз це.

¹²Харж кӀватӀдайбуруни, цик акахьун къачун патал атана, адавай жузуна: — Муаллим, чна вуч авуна кӀанда?

¹³— Тайинарнавайдалай артух харж тӀалабмир, — жаваб гана Ягьяди.

¹⁴Адавай аскеррини хабар кьаз хьана: — Бес чна́ вуч ийида? — Халкьдивай тарашмир, садални буьгьтен вегьимир, жуваз гайи гьакъидал рази хьухь, — жаваб гана ада.

¹⁵Халкь важиб тир са квел ятӀани вил алаз акъвазнавай, абуру, им Ягья Месигь ятӀа лугьуз, хиялар ийизвай.

¹⁶Ягьяди, виридахъ элкъвена, лагьана: — За квев цик акахьун къачуз тада. Амма залай гзаф къудрат авайди къведа. Зун Адан кӀвачин къапарин чӀулар ахъайизни лайих туш. Ада квев Пак Руьгьдик ва цӀук акахьун къачуз тада.

¹⁷Адан йирф Вичин гъиле ава, Ада Вичин рат михьда, гатай къуьл Вичин бегьер хуьдай чкадиз кӀватӀда, нагъварни хкахь тийидай цӀал куда.

¹⁸Гьа ихьтин гзаф гафаралди ада Шад Хабар инсанрал агакьарзавай ва гьакӀни абур чӀалахъарзавай.

¹⁹Гьируд бегди вичин стхадин паб Гьирудат вичиз гъуниз килигна, Ягьяди ам халкьдин вилик беябурна. Адалайни гъейри, Гьируд бегди авур амай чӀуру кӀвалахарни Ягьяди винел акъудиз хьана. Виликдай вичи авур кьван чӀуру крар бес тахьана, Гьируда Ягьяни къазаматда тваз туна.

²¹Вири халкьди цик акахьун къачурдалай кьулухъ Исадини цик акахьун къачунай. Ада дуьаяр ийизвайла, цавар ахъа хьана.

²²Лифрен шикилда аваз Пак Руьгь Исадал эвичӀна. Цаварай: «Вун Зи рикӀ алай Хва я, Зи шадвал Валди я!» — лугьудай сес чкӀана.

²³Вичин хиве авай кардив эгечӀдайла, Исадин къанни цӀуд йис кьван тир. Халкьди Ам Элидин хва Юсуфан велед тирди фикирзавай. Амайбур Адан бан-бубаяр тир:

²⁴МататӀ, Леви, Мелгьи, Янай, Юсуф,

²⁵МатӀатӀи, Амус, Нагьум, Гьесли, Нагъай,

²⁶МагьатӀ, МатӀатӀи, Шими, Юсех, Ягьад,

²⁷Югьнан, Риза, Зарубабел, Шалатил, Нери,

²⁸Мелгьи, Ади, КӀусам, Элмадам, Эр,

²⁹Иса, Элигьезер, Ярим, МататӀ, Леви,

³⁰Шимун, Ягьуд, Юсуф, Янам, Элиаким,

³¹Мелей, Менан, МатӀатӀ, Натан, Давуд,

³²Ишай, Абид, Багьас, Салман, Нагьшун,

³³Аминадаб, Арам, Гьесран, ПерецӀ, Ягьуд,

³⁴Якьуб, Исакь, Ибрагьим, Терагь, Нахар,

³⁵Серуг, Регу, Пелег, Эбер, Шалагь,

³⁶Къенан, Арбахшад, Шам, Нуьгь, Ламех,

³⁷Метушелагь, Гьенух, Яред, Магьалал, Къенан,

³⁸Энаш, ШетӀ, Адам, Аллагь.