Read Lezgi New Testament – ЦӀийи Икьрар ЛукӀа 5 Bible Online

ЛукӀа 5 - Lezgi New Testament – ЦӀийи Икьрар bible

ЛукӀа 5

¹Садра Иса Генисарат вирин къерехдал алайла, Аллагьдилай атай гафарихъ яб акализ Адал халкь алтӀуш хьанвай.

²Исадиз вирин къерехдал кьве луьткве акуна; гъетягъри луьтквейрай эвичӀна чилер чуьхуьзвай.

³Иса и луьтквейрикай Симунан луьткведа акьахна, адавай вирин къерехдивай са тӀимил анихъ гьалун тӀалабна; Ада луьткведа ацукьна халкьдиз чирвилер гана.

⁴Чирвилер гана куьтягьайла, Ада Симуназ лагьана: — Луьткве дерин чкадал гьала ва чил вегь.

⁵— Устаз, — жаваб гана Симуна, — чун йифди алахъна, амма чаз гьатай затӀни хьанач. Амма гьа Вуна лагьайвал чна чил вегьида.

⁶ГьакӀ авурла, абуруз гзаф гъетер гьатна, чил са тӀимил пад хьанвай.

⁷Чпиз куьмек гун патал, абуру ишарайралди муькуь луьткведа авай юлдашризни эверна. Абур атана, кьве луьтквени гъетерив акӀ ацӀурнай хьи, луьтквеяр цин кӀаниз ягъиз са тӀимил амай.

⁸Симун-Петрудиз и кар акурла, ам Исадин кӀвачерик ярх хьана ва лагьана: — Закай яргъаз хьухь, зи Агъа! Зун гунагьар квай инсан я!

⁹Ада икӀ авиляй лагьанай хьи, адазни адахъ галаз гъетер кьазвайбуруз кьунвай кьван гъетерин булвал акурла, хаф янавай.

¹⁰Симун-Петруди юлдашризни — Зебедеян рухваяр тир Якьубазни Ягьядизни — кичӀе хьанвай. — КичӀе жемир, — лагьана Исади, — къенин йикъалай вакай инсанар кьадай гъетягъ жеда.

¹¹Кьве луьтквени къерехдиз акъудна, алай-алайвал туна, абур Исадихъ галаз фена.

¹²Садра Иса са шегьерда авайла, Адан патав жузам азарди кьунвай са кас атана. Ам Исадин вилик ярх хьана, Адаз минетна: — Я Агъа! Ваз кӀан хьайитӀа, Вавай зун сагъар хъийиз жеда эхир!

¹³— КӀанзава Заз, сагъ хъхьухь! — адак гъил кяна лагьана Исади. Адакай гьасятда жузам хкатна.

¹⁴— Килиг, — лагьана Исади, — гьич садазни чуькьмир, амма, хахамдин патав фена, жува жув гьадаз къалура. Ви азар хкатунин сагълугъдай Мусадин Къанундив кьадайвал, къурбандни гъваш. Гьа идалди вун дири хъхьанвайди чир хьурай.

¹⁵ЯтӀани, къвердавай Исадикай ван-сес гегьеншдиз чкӀана. Гзаф кьадар инсанар, Адаз яб гуз ва чпик квай азарар хкудун патал, Адан патав къвез хьана.

¹⁶Амма Ам дуьаяр авун патал кьурумдиз фидай.

¹⁷Исади чирвилер гузвай са юкъуз Галилейдинни, Ягьудатдин вири хуьрерай ва Ярусалимдай атанвай фарисеярни Къанундин муаллимар Адан патав ацукьнавай. Реббиди Адаз инсанар сагъар хъийидай къуватни ганвай.

¹⁸Гьа чӀавуз са шумуд касди фалужди янавай инсан занбурагдал алаз гъана. Ам абуруз кӀвализ тухвана Исадин вилик эцигиз кӀан хьана.

¹⁹Гзаф инсанар хьуниз килигна, чпивай ам кӀвализ тухуз тахьайла, къавал акьахна, абуру чепейрин арадай ам месел алаз кӀвалин юкьвал Исадин вилик авудна.

²⁰Абурун иман акурла, Исади а касдиз лагьана: — Эй инсан, ви гунагьрилай гъил къахчунва.

²¹Тавратдаррини фарисейри чпин арада лугьуз хьана: — Ихьтин аси ихтилатар ийиз им вуж хьурай? Тек са Аллагьдилай гъейри, гунагьрилай нивай гъил къахчуз жеда?

²²Исадиз абурун фикир чир хьайила, Ада абуруз жаваб яз лагьана: — Вучиз куьне куь рикӀера ихьтин фикирар тунва?

²³Вуч лугьун регьят я: «Ви гунагьрилай гъил къахчунва», я тахьайтӀа: «Къарагъ, ахлад?»

²⁴Амма Инсандин Хцихъ виридан гунагьрилай гъил къахчудай ихтияр авайди квез чир хьун патал За и фалужди янавайдаз лугьузва: «Къарагъ, жуван месни къахчуна кӀвализ ахлад!»

²⁵Амни гьасятда къарагъна, вич алаз гъайи шалтани къахчуна, Аллагьдиз шукур ийиз-ийиз, виридан виликай тӀуз вичин кӀвализ хъфена.

²⁶Анал алайбур гзаф мягьтел хьана. Абуру кичӀела Аллагьдиз шукурар ийиз лагьана: — Къе чаз аламатдин крар акуна.

²⁷Инлай Иса къарагъна хъфидайла, Адаз харж кӀватӀдай чкадал ацукьнавай Леви акуна. — Зи гуьгъуьна аваз ша, — лагьана адаз Исади.

²⁸Амни, вири алай-алайвал туна, къарагъна Исадин гуьгъуьна аваз фена.

²⁹Левиди вичин кӀвале Адаз хъсан тӀуьн-хъун гьазурна. Ана харж кӀватӀдайбур ва абурухъ галаз жуьреба-жуьре инсанарни атана ацукьнавай.

³⁰Тавратдаррини фарисейри наразивал ийиз, Адан тилмизриз лагьана: — Куьне вучиз харж кӀватӀдайбурухъни гунагькаррихъ галаз санал ацукьна тӀуьнар-хъунар ийизва?

³¹Исади абуруз жаваб яз лагьана: — Жерягь сагъбуруз ваъ, начагъбуруз герек я;

³²Зун гьахъ-михьибуруз ваъ, гунагькарриз «Аллагьдин рекьел ша» лугьуз атанвайди я.

³³Тавратдаррини фарисейри Исадиз лагьана: — Ягьядин ва гьакӀни чи тилмизри мукьвал-мукьвал сив хуьз дуьаяр ийизва, бес вучиз Ви тилмизар нез-хъваз гьатнава?

³⁴— Чам галай мехъерин мугьманрив сив хуьз тун мумкин яни? — лагьана Исади. —

³⁵Амма са чӀав атана, чпивай чам къакъуддайла, абуру сив хуьда.

³⁶Инал Ада абуруз са кьиса ахъайна: — ЦӀийи пекиникай атӀана цӀуру пекиниз пине садани ядач, цӀийидини къазунда, цӀийидакай атӀанвай пине цӀуру пекинихъ галаз кьадач.

³⁷Гьич садани цӀийи чехир куьгьне целериз цадач; чехирди куьгьне цел хъиткьинарда — чехирни авахьда, целни барбатӀ жеда.

³⁸Амма цӀийи чехир цӀийи целце цун лазим я.

³⁹Куьгьне чехир хъваз вердиш хьанвай са касдизни цӀийиди хъваз кӀан жедач, абуру лугьуда: «Гена куьгьнеди хъсан я».