Read Lezgi New Testament – ЦӀийи Икьрар ЛукӀа 6 Bible Online

ЛукӀа 6 - Lezgi New Testament – ЦӀийи Икьрар bible

ЛукӀа 6

¹Са Киш юкъуз Иса Вичин тилмизарни галаз къуьлер цанвай никӀяй тӀуз физвай. Адан тилмизри, кьилер атӀуз, абур капалай ийиз, тварар незвай.

²Фарисейрикай садбуру Адаз лагьана: — Куьне Киш юкъуз къадагъа кар вучиз ийизва?

³Исади жаваб гана: — Давуд пачагьдиз ва адахъ галайбуруз гишин хьанвайла, абуру вуч авунатӀа куьне Каламдай кӀелначни мегер?

⁴Давуда Аллагьдин КӀвализ гьахьна, хахамрилай гъейри садазни недай ихтияр авачир, Реббидин вилик жедай фар къачуна вичини тӀуьна, галайбурузни гана.

⁵Ада давамар хъувуна: — Инсандин Хва Киш йикъанни Агъа я.

⁶Гуьгъуьнин Киш юкъузни Иса синагугдиз фена, чирвилер гана. Ана эрчӀи гъил члахъ хьанвай са итим авай.

⁷Фарисеярни тавратдарар вилер атӀумна, Исадиз килигзавай. Ада Киш юкъуз инсанар сагъар хъувунайтӀа, абуруз Адак тахсир кутадай са багьна жагъидай.

⁸Амма Исади, абурун ният чизваз, члахъ гъил галай касдиз лагьана: — Виридаз аквадайвал юкьвал акъваз. Амни къарагъна юкьвал атана.

⁹Ахпа Исади амайбуруз лагьана: — За квевай хабар кьазва: Киш юкъуз хъсанвал авун лазим яни, тахьайтӀа — писвал? Уьмуьр хуьдани, тахьайтӀа ам пучдани?

¹⁰Абуруз виридаз вил яна, Исади гъил члахъ касдиз лагьана: — Ви гъил инихъ ая. Ада вичиз лагьайвал авуна. Адан гъил, муькуь гъил хьиз, сагъ хъхьана.

¹¹Исадикай хъел акатай душманар къапарай акъатна. Исадиз вуч ийин лугьуз, абуру чпин арада меслятар авуна.

¹²Садра Иса дуьаяр ийиз пелел хкаж хьана ва йифди Аллагьдиз дуьаяр ийиз гьана амукьна.

¹³Югъ алукьайла, Ада Вичин тилмизар кӀватӀна, абурукай цӀикьвед хкяна ва абуруз илчияр тӀвар гана:

¹⁴Симун-Петрудизни адан стха Эндиреяз, Якьубазни Ягьядиз, ФилипӀазни БартӀаламаяз,

¹⁵МатӀаязни ТӀумаяз, Гьалфеян хва Якьубазни Миллетбаз лакӀаб алай Симуназ,

¹⁶Якьубан хва Ягьудазни, гьакӀни Ам маса гайи Искарият Ягьудаз.

¹⁷Иса абурухъ галаз пелелай эвичӀна, са дуьзен чкадал акъвазна. Адан патав тилмизар ва вири Ягьудат тирвал, Ярусалимдай, гьуьлуьн къерехда авай Туьрсдайни Сидундай атанвай гзаф кьадар инсанар акъвазнавай.

¹⁸Абур Адахъ яб акализ ва чпик квай азарар хкудиз, чӀуру жинерар квайбурни чпик квай жинерар хкудиз атанвайбур тир; абур сагъни хъжезвай.

¹⁹Исадик гъил кягъиз вири алахънавай, Адакай къвезвай къудратди Адак гъил кягъайди гьар са тӀалдикай сагъар хъийизвай.

²⁰Исади тилмизриз вил яна лагьана: — Бахтавар я куьн, затӀни авачирбур, Аллагьдин пачагьвал куьди я!

²¹Бахтавар я куьнни, къе каш чӀугвазвайбур, пака куьн тух жеда! Бахтавар я куьнни, къе шехьзавайбур, пака куьн хъуьреда!

²²Бахтавар я куьнни — Инсандин Хциз килигна, инсанри куьн чпив агуд тийидай чӀавуз, куьн абуру чукурдай чӀавуз, квез чпин такӀанвал къалурдай чӀавуз, куь тӀварар кьацӀурдай чӀавуз!

²³Гьахьтин югъ алукьайтӀа, куьне куь рикӀер аладра ва шадвилер ая, вучиз лагьайтӀа цаварал квез Аллагьди зурба савкьват гьазурнава. Куьн хурук кутадайбурун бубаярни алатай девирда пайгъамбаррихъ галаз гьакӀ хьайибур я.

²⁴Амма гуж я квез жедайди, девлет авайбур! Квел куь бахтар чилелламаз агакьнава.

²⁵Гуж я квез жедайди, исятда тухбур! Куьн каша гьатда. Гуж я квез жедайди, и заманада хъуьрезвайбур! Яс авайла хьиз, куьн шехьдай вахт къведа.

²⁶Гуж я квез жедайди, вири инсанар квекай хъсандиз рахаз хьайитӀа: ахьтинбурун бубаярни тапан пайгъамбаррикай гьакӀ рахадай.

²⁷Амма яб гузвай квез За лугьузва: жуван душманар кӀан хьухь, куьн такӀанбуруз хъсанвал ая,

²⁸квез лянет ийизвайбуруз хийир-дуьа ая ва куь кефи хазвайбур патал Аллагьдиз дуьаяр ая.

²⁹Ви хъвехъ ягъайдахъ муькуь хъвехъни элкъуьра; винелай алукӀнавай ви пекер къакъудзавайдаз ви перемни хтӀуниз манийвал ийимир.

³⁰Вавай тӀалабзавай гьар садаз це, вавай къачунвайди элкъвена тӀалаб хъийимир.

³¹Инсанри куьн патал вуч авуна кӀанзаватӀа, куьнени гьабуруз гьам ая.

³²Куьн кӀандайбур квезни кӀандатӀа, идакай квез вуч суваб жеда? Гунагькарризни чеб кӀандайди кӀан жеда.

³³Куьне квез хъсанвал ийизвайбуруз хъсанвал ийизватӀа, идакай квез вуч суваб жеда? Гунагькаррини гьакӀ ийида.

³⁴Куьне бурж ихтибар алайдав вугузватӀа, идакай квез вуч суваб жеда? Гунагькаррини гунагькаррив буржуна вугуда, ахпа абурувай гьакьванди вахчун патал.

³⁵Амма квез жуван душманар кӀан хьухь, абуруз вири хъсанвилер ая. Элкъвена вахгудай умуд авачтӀани, бурж гице; гьакӀ хьайитӀа, квез къвезвай пишкешни зурбади жеда ва куьнни Цавараллайдан аялар тирди чир жеда. Чпиз авур хъсанвал чир тежедайбур патални, чӀуру ксар патални Цавараллайдахъ мергьемет ава.

³⁶Куь Бубадихъ гьикӀ мергьемет аватӀа, квехъни гьакӀ мергьемет хьухь.

³⁷Куьне масадан дуван аквамир, Аллагьди куь дуванни аквадач; куьне айибар кутун тавуртӀа, Аллагьди квекни айибар кутадач; куьне гъил къахчуртӀа, Аллагьдини квелай гъил къахчуда.

³⁸Куьнени це, Аллагьди квезни гуда, артухни алаз, ацӀай киледалди гуда; куь гин ацӀурайдалай гуьгъуьниз гъил илис хъувуна къваларилай алахьдайвал мад алава хъийида; куьне гьихьтин уьлчмедалди алцумайтӀа, квезни гьахьтин уьлчмедалди алцумда.

³⁹Исади абуруз са кьиса ахъайна: — Буьркьуьдавай буьркьуьдаз рехъ къалуриз жедани? Абур кьведни фуруз аватдачни?

⁴⁰Тилмиз вичин муаллимдилай вине хьун мумкин туш. Амма чирвилер кьилиз акъудай гьар са кас вичин муаллимдин дережадив агакьда.

⁴¹Жуван виле авай чукьван такваз, вучиз ваз ви стхадин виле авай кьал аквада?

⁴²Я тахьайтӀа, жуван виле авай чукьван такваз, вавай ви стхадиз къала за ви виле авай кьал акъудда лугьуз жедани? Кьве чин алайди! Сифте жуван виле авай чукьван акъуд, ахпа ваз, жуван стхадин виле авай кьал гьикӀ акъуддатӀа, гьам аквада.

⁴³ЧӀуру майва гъидай хъсан тар тежервал, чӀуру таравай хъсан майвани гъиз жедач.

⁴⁴Гьар са тар вичин майвадилай чир жеда. Къукъвадин валалай инжил атӀудач, къаратикендилайни — ципицӀ.

⁴⁵Хъсан инсанди хъсанвал вичин рикӀин хазинадай къачуна ийида, пис инсанди писвал — вичин пис рикӀяй. РикӀе авайди мецел жеда.

⁴⁶За лугьузвайди куьне тийиз хьайила, вучиз куьне Заз «Я Агъа! Я Ребби!» лугьузва?

⁴⁷Зи патав къвезвай гьар сад, Зи Гафариз яб гузвай ва абур кьилиз акъудзавай гьар са кас низ ухшар ятӀа, За квез лугьузва:

⁴⁸ам, кӀвал эцигдайла хандакӀар дериндиз яна, кӀвалин бине къванцел эцигай инсандиз ухшар я. Атана селди басрухайла, гьа кӀвализ зиян гуз хьанач, вучиз лагьайтӀа ам хъсандиз эцигнавай.

⁴⁹Амма гафариз яб гуз, абур кьилиз акъуд тийизвайди хандакӀ авачиз кӀвал чилелай эцигнавай касдиз ухшар я. Ци басрухнамазни адан кӀвал гьасятда чкӀана. КӀваликай анжах харапӀаяр амукьна.