Read Lezgi New Testament – ЦӀийи Икьрар ЛукӀа 7 Bible Online

ЛукӀа 7 - Lezgi New Testament – ЦӀийи Икьрар bible

ЛукӀа 7

¹Яб гузвай халкьдиз лугьудай гафар рахана куьтягьна, Иса Кефернагьумдиз фена.

²Римдин аскеррин кьиле авай садан рикӀ алай вач-хъша начагъ хьана рекьидай гьалда авай.

³Адаз Исадикай ван хьайила, атана вичин вач-хъша сагъар хъия лугьуз, ада чувудрин агъсакъалар Исадин кьилив ракъурна.

⁴Исадин патав атана, абуру Адавай кӀевелай тӀалабна: — И инсан Вуна куьмек авуниз лайих авай кас я.

⁵Адаз чи халкь кӀанда ва ада чаз синагуг эцигна.

⁶Иса абурухъ галаз фена, амма Ам кӀвализ мукьва хьайила, аскеррин кьиле авайда Адан патав вичин дустар ракъурна ва Адаз икӀ ая лагьана: — Икрагь жемир, зи Агъа, Вун зи кьилив зи кӀвализ атуниз зун лайих туш.

⁷Я Ви патавни зун атанач, вучиз лагьайтӀа Ви вилик экъечӀизни зун лайих авай кас туш. ЯтӀани зи вач-хъша сагъ хъийидай са гаф лагь.

⁸Зун масадан гъилик квай инсан ятӀани, захъ жуваз табий аскерарни ава; абурукай садаз за «Алад» лагьайтӀа, ам фида; муькуьдаз «Инал ша» лагьайтӀа, ам къведа; зи вач-хъшадиз «И кар ая» лагьайтӀа, ада ам гьасятда ийида.

⁹И гафар ван хьайи Иса мягьтел хьана ва элкъвена Вичихъ галаз къвезвай инсанрин кӀеретӀдиз лагьана: — За квез лугьузва хьи, Исраилдани заз икьван Захъ иман ийизвай са касни акунач.

¹⁰Исадин патав ракъурнавайбур кӀвализ хтайла, абуруз азарди кьунвайди сагъ хъхьанваз жагъана.

¹¹Са кьадар йикъарилай Иса Наин шегьердиз фидайла, Адахъ галаз Адан тилмизар ва инсанрин зурба са кӀеретӀни рекье гьатна.

¹²Ам шегьердин варарин мукьув агакьайла, са хендедадин авай-авачир хва магьфедал алаз тухузвай; дидедихъ гзаф шегьерэгьлияр галай.

¹³Диде акурла, Реббидиз адан язух атана. — Шехьмир, — лагьана Ада.

¹⁴Исади фена магьфедик гъил кяна; магьфе тухузвайбур акъвазна. — Эй, жегьил, — лагьана Исади, — За ваз къарагъ лугьузва.

¹⁵Кьенвайди хкаж хьана ацукьна ва рахаз эгечӀна. Исади ам вичин дидедив вахгана.

¹⁶Виридак кичӀ акатна; инсанри Аллагьдиз шукурар ийиз, лугьуз хьана: — Чи арада чӀехи пайгъамбар пайда хьанва. Аллагь Вичин халкьдиз куьмек ийиз эгечӀнава.

¹⁷Ихьтин гафар-чӀалар Адакай Ягьудатда ва патав гвай вири чкайрани чкӀана.

¹⁸Исадин крарикай Ягьядин тилмизри хтана чпин муаллимдал хабар агакьарна.

¹⁹Ягьяди вичин тилмизрикай кьведаз эверна, абур Исадивай: «Атана кӀанзавай Месигь Вун яни, я тахьайтӀа чна масад вилив хуьдани?» — лагьана хабар кьаз ракъурна.

²⁰Исадин кьилив атана, абуру лагьана: — Чун Ягья пайгъамбарди Ви патав ракъурнавайбур я. Ада Вавай: «Атана кӀанзавай Месигь Вун яни, я тахьайтӀа чна масад вилив хуьдани?» — лугьуз хабар кьазва.

²¹И чӀавуз Исади азаррикайни маса тӀалрикай гзафбур сагъар хъийизвай, гзафбурукай жинерар хкуднавай, гзаф буьркьуьбуруз экуь дуьнья къалур хъийизвай.

²²— Ягьядин патав хъфена, квез акурдакайни ван хьайидакай лагь, — жаваб гана тилмизриз Исади, — буьркьуьбуруз цӀийи кьилелай аквазва, кьецӀибур кӀвачел ахкьалтзава, жузам азар квайбур михьи хъжезва, бишибуруз ван хквезва, кьейибурал чан хквезва; саилризни Шад Хабардин ван къвезва.

²³Зал шак тегъизвай кас бахтавар я.

²⁴Ягьяди ракъурай ксар хъфейдалай кьулухъ, Иса Ягья дикай халкьдиз ихтилатар ийиз эгечӀна: — Куьн кьурумдиз куьз тамашиз фенвай? Гару юзурзавай нацӀариз килигиз фейиди яз тахьуй гьа?

²⁵ГьакӀ туштӀа, бес куьн куьз килигиз фенвай? Багьа пекер алукӀнавай инсандиз килигиз фенвайни? ЧӀагай пекер алукӀна, кеф чӀугваз уьмуьр гьалзавайбур пачагьрин кӀвалера жеда.

²⁶АкӀ хьайила, куьн куьз килигиз фенвайбур тир? Пайгъамбардиз? Эхь, лугьузва за квез. Ам пайгъамбардилайни виневайди я.

²⁷Адакай Каламдани икӀ кхьенва: «Килиг, Валай вилик За Зи чархачи ракъурзава, Ада Ви вилик Ви рехъ гьазурда».

²⁸За квез лугьузва: папа ханвайбурун арада Ягьядилай зурбади авач; амма Аллагьдин Пачагьлугъда авай виридалайни агъада авай кас гьа Ягьядилайни вине жеда.

²⁹Ягьядиз яб гайи вири халкьди ва харж кӀватӀзавайбуру Аллагьдин ниятар дуьзбур яз гьисабна ва абур Ягьядин патав цик акахьун къачуз атана.

³⁰Амма фарисейрини тавратдарри Ягьядин жуьреда цик акахьун къачун кваз кьунач ва гьадалди абуру Аллагьдин чпиз талукь къастарни негь авуна.

³¹— Чи девирдин инсанар За нив гекъигда? Яраб абур низ ухшар ятӀа? — давамарна Исади. —

³²Абур аялриз ухшар я. Аялри, базардин майдандал къугъвадайла, сада садаз лугьуда: «Чна квез кфилдай макьамар ягъайла, куьне кьуьлерначир, чна кьейибурухъ лугьунар авурла, куьн шехьначир». И девирдин инсанарни гьакӀ я.

³³Ягья пайгъамбар атанва, ада я фу незвач, я чехир хъвазвач, амма инсанри: «Адак чӀуру жин ква», — лугьузва.

³⁴Инсандин Хва атанва — Ада ненни ийизва, хъунни. Ам акур инсанрини лугьузва: «ХупӀ тӀуьнрални хъунрал рикӀ алай кас тушни, Вични харж кӀватӀдайбурунни гунагькаррин тай-туьш хьанва».

³⁵Аллагьдин Камал кӀандай ксари Ам гьахъ-михьиди тирди краралди къалурзава.

³⁶Фарисейрикай сада Исадиз вичихъ галаз фу нез ша лагьана. Ада фена фарисейдин кӀвале суфрадихъ чка кьуна.

³⁷Гьа вахтунда а шегьерда авай гунагькар са папаз, Иса фарисейдин кӀвале авайдакай хабар хьайила, ада гьаниз хъенчӀин къапуна аваз атирдин ни галай гъери гъана.

³⁸Ам Исадин кьулухъай акъвазна, шехьна, Адан кӀвачерилай накъвар авадариз, кӀвачер вичин чӀараралди михьиз, Адан кӀвачериз теменар гана ва чӀем гуьцӀна.

³⁹И кар акур ва Иса илифарнавай кӀвалин иесиди фикирна: «Ам пайгъамбар тиртӀа, Адаз Вичик гьихьтин папа гъил кязаватӀа чир жедай. И паб гунагькар я эхир».

⁴⁰Амма Исади, адахъ элкъвена, лагьана: — Симун! Захъ ваз лугьудай са гаф ава. — Лагь, Муаллим, — лагьана ада.

⁴¹— Буржуна пулар вугудай са касдик кьве касдин бурж квай, — лагьана Исади, — са касдин — вад виш динар, муькуьданни — яхцӀурни цӀуд.

⁴²Абурухъ буржар вахгудай мумкинвал тахьуниз килигна, ада кьведазни а пулар гьалална. Лагь кван садра, абурукай ам гьидаз гзаф кӀан жеда?

⁴³— Заз чиз, чӀехи бурж алайдаз, — жаваб гана Симуна. — Вуна дуьз фикирна, — лагьана Исади.

⁴⁴Папахъ элкъвена, Исади Симуназ лагьана: — Ваз и паб аквазвани? Зун ви кӀвализ атайла, вуна Заз кӀвачер чуьхуьдай яд гъваш лагьана эмирнач; и папа вичин накъваралди Зи кӀвачер чуьхвена, абур ада вичин кьилин чӀараралди кьурурна.

⁴⁵Вуна Зун теменралди кьабулнач, амма ада, Зун атайдалай кьулухъ акъваз тавуна, Зи кӀвачериз теменар гузва.

⁴⁶Вуна, кӀвалин иесидиз адет хьанвайвал, Зи кьиливай зейтундин чӀем хьайитӀани гуьцӀнач, амма ада Зи кӀвачеривни кваз лап багьа гъери гуьцӀна.

⁴⁷ГьакӀ хьайила, За ваз лугьузва: адан пара кьадар гунагьрилай гъил къахчурвиляй адахъ гзаф муьгьуьббат ава. Нин гунагьрилай тӀимил гъил къахчунватӀа, гьадахъ кӀанивални гьакьван жеда.

⁴⁸А папазни Исади лагьана: — Ви гунагьрилай гъил къахчунва.

⁴⁹Исадихъ галаз суфрадихъ галайбуру чпи чпикди лугьуз хьана: — Гунагьрилайни гъил къахчудай ихьтинди Им вуж хьурай?

⁵⁰Исадини и папаз лагьана: — Ви иманди вун хиласна; алад, саламат хьурай вун.