Read Lezgi New Testament – ЦӀийи Икьрар ЛукӀа 8 Bible Online

ЛукӀа 8 - Lezgi New Testament – ЦӀийи Икьрар bible

ЛукӀа 8

¹Гуьгъуьнлай Иса, Аллагьдин Пачагьлугъдикай Шад Хабар агакьариз ва вязер ийиз, шегьеррани хуьрера къекъвез хьана. Адахъ галаз Вичин цӀикьвед илчи,

²Вичи чӀуру жинеррикайни тӀалрикай сагъар хъувур са шумуд паб, вичикай ирид жин хкатай Маждалдай тир Майрам,

³Гьирудан гъилибан Хузан паб Ягьна, Сусанна ва гзаф масабур авай. Абуру чпин такьатралди Исадизни тилмизриз куьмекар гузвай.

⁴Садра Исадин патав гзаф чкайрай инсанар атана кӀватӀ хьана, Иса абуруз кьиса ахъайиз эгечӀна:

⁵— Са гъилера лежбер никӀиз тум вегьиз фена: вегьей са бязи тварар рекьин къерехдиз аватна, абур рекье авайбурун кӀвачерикни акатна, къушарини тӀуьна.

⁶Са бязи тварар къван квай чкайриз аватна, экъечӀна алакьдалди кьурана, абуруз кьеж бес хьанач.

⁷Са бязибур къалгъанрин арайриз аватна. Къалгъанар чӀехи хьана, абуру акьалтзавай къацар пӀуьрчӀуькьарна.

⁸Са бязибур мублагь чилел аватна. ЭкъечӀайла, абуру вишра артух майваяр гъана. Ахпа Исади ван алаз давамарна: — Нихъ ван къведай япар аватӀа, гьадаз ван атурай!

⁹Исадин тилмизри Адавай хабар кьуна: — И кьисадин мана вуч хьурай?

¹⁰— Аллагьдин пачагьвилин сирерай кьил акъуддай алакьунар квез ганва, — жаваб гана Исади, — амайбуруз ибур мана авачир кьисаяр яз амукьзава, вучиз лагьайтӀа абур килигзава — аквазвач, яб гузва — ван къвезвач.

¹¹Гила кьиса куькай ятӀа килиг: тумунин твар — Аллагьдин Гаф я.

¹²Рекьин къерехдиз аватай тварар — гаф ван хьайибур я. Ахпа абурун патав атана иблисди, абур имандал татун ва хилас тахьун патал, абурун рикӀяй а гаф акъудзава.

¹³Къван квай чкайриз аватай тварар — гаф ван хьанмазни шадвилелди кьабулдай, амма чпихъ дувул авачирбур я: гьавиляй са кьадар вахтуналди Аллагьдихъ иман ийида, амма синагъдин йикъара абур кьулухъ жеда.

¹⁴Цацарин арайриз аватай тварар — абур гафуниз яб гудай, амма къвердавай чеб, эчӀелри хьиз, къайгъуйри, девлетрини лезетри буьркьуь авуна, цӀир гъана куьтягь тахьанмаз, Аллагьдин Гаф рикӀелай алуддайбур я. Абуру бегьерни гъидач.

¹⁵Миян чилел аватай тварар — абур ван хьайи гаф милайим ва михьи рикӀе хуьзвай ксар я. Бегьерни абуру сабур хуьналди гъида.

¹⁶Гьич садани, шем куькӀуьрна, адан винел къаб гьалддач, я тахьайтӀа, ам чарпайдин кӀаник эцигдач; кӀвализ гьахьзавайбуруз экв акун патал, ам шемерганда твада.

¹⁷Я винел акъат тийидай сирни авайди туш, я малум тахьана амукьдай чинебан карни.

¹⁸Гьа икӀ, куьне хъсандиз яб це: нихъ аватӀа, адаз хгунни хъийида; вичихъ са вуч ятӀани авайди хьиз жезвайдавай гьа авайдини къахкъудда.

¹⁹Садра Исадин патав Адан дидени стхаяр атана; абурувай, кӀвале гзаф инсанар хьуниз килигна, Адан мукьув къвез жезвачир.

²⁰Исадиз: «Ви дидени стхаяр Вун акваз кӀанз къецел акъвазнава», — лагьана, хабар гана.

²¹— Зи дидени стхаяр-вахар Аллагьдин Гафуниз яб гузвай ва а Гафунал амал ийизвайбур я, — жаваб яз лагьана Ада.

²²Са юкъуз Иса Вичин тилмизарни галаз луьткведа акьахайла, Ада абуруз лагьана: — Ша чун вирин а патаз экъечӀин. Абуру луьткве гьална.

²³Рекье Иса ахварал фена. Вирел къати гар акьалтна, луьткве цяй ацӀуз эгечӀна. Абур кӀеве гьатна.

²⁴Тилмизри Иса ахварай авудна, лагьана: — Устаз! Устаз! Чун цин кӀаниз язава. Ада къарагъна гарни гур лепеяр секинарна. ТӀурфан акъвазна, кьуд пата секинвал гьатна.

²⁵— Куь иман гьиниз фена? — хабар кьуна Ада. КичӀевал акатнавай ва мягьтел хьанвай тилмизри чпи чпиз лагьана: — Гарни яд Вичиз кӀандайвал муьтӀуьгъарзавай Им Вуж хьурай?

²⁶Исани тилмизар Галилейдин къаншарда авай Герасин вилаятдиз атана акъатна.

²⁷Иса вирин къерехдал эвичӀайла, Адан вилик фадлай жинерар квай, пекерни алукӀ тийизвай, вични кӀвале ваъ, кьейибур твадай кьветӀера уьмуьр тухузвай са инсан экъечӀна.

²⁸Иса акурла, ам Адан вилик ярх хьана ва ван алаз гьарайна: — Ваз завай вуч кӀанзава, я виридалайни виневай Аллагьдин Хва Иса? Ваз минет хьурай, Вуна зун азабрик кутамир!

²⁹Ада акӀ лугьунин метлеб ам тир хьи, Исади чӀуру жинжиз и инсандикай хкечӀун эмирнай. Жинжи са шумудра и инсан кьуна чандивай авурди тир. Шумудни садра ам зунжурралди кутӀунна хуьз хьанатӀани, абур кьатӀ-кьатӀ ийиз, жинжин таъсирдик кваз, ам кьурумриз катдай.

³⁰Исади адавай жузуна: — Ви тӀвар вуж я? — Кьушун я, — жаваб гана касди, вучиз лагьайтӀа адак гзаф жинерар квай.

³¹Жинерри Исадиз, чеб гургусдиз[3] ракъурмир лугьуз, минетна.

³²Патав гвай пелел вакӀарин са чӀехи суьруь алай. Жинерри вакӀарик акахьдай ихтияр це лугьуз Исадиз дад-бидадна. Ада абуруз ихтияр гана.

³³Жинерар инсандикай хкатна вакӀарик акахьна; вакӀарини чукурна фена са чархалай вириз хкадарна ва ана абур вири цин кӀаниз яна.

³⁴Хьайи кар акур вакӀарбанри, чукурна фена, чпиз акурдакай шегьеррани хуьрера ахъайна.

³⁵Инсанар вуч хьанватӀа килигиз рекье гьатна. Исадин патав атайла, абуруз жинерар хкатнавай кас вич вичел хтанваз, пекерни алаз Исадин патав ацукьнаваз акуна; абурук кичӀ акатна.

³⁶И крар акурбуру жинерар квайди гьикӀ сагъарнатӀа, атайбуруз ахъайна.

³⁷Герасин вилаятда авай халкьди Исадивай чпин сергьятрай хъфин тӀалабна, абурук лап зурба кичӀ акатнавай. Исани луьткведа акьахна Галилейдиз хъфена.

³⁸Жинерар хкатай касдини, Исадихъ галаз амукьиз кӀанз, Адаз минетна, амма Исади лагьана:

³⁹— Жуван кӀвализ ахлад. Аллагьди ваз авур зурба куьмекдикай вун хъфена виридахъ галаз рахух. Адани Исади вичиз авурдакай фена шегьер тирвал ихтилат ийиз хьана.

⁴⁰Иса элкъвена Галилейдиз хтана. Халкьди Ам шадвилелди кьабулна, вучиз лагьайтӀа Адал виридан вил алай.

⁴¹Ингье, синагугдин кьиле авай Яир лугьудай кас атана Исадин кӀвачерик ярх хьана. Ада Исадиз вичин кӀвализ ша лагьана, минетна:

⁴²адан цӀикьвед йис хьанвай авай-авачир са руш рекьидай гьалдал атанвай. Иса аниз рекье гьатна, инсанри гьар патахъай Ам юкьва туна.

⁴³Абурухъ цӀикьвед йисуз къеняй иви физ азиятдик квай са пабни галай. Вичихъ авай-авачир вири эменни лукьманриз серфнатӀани, садавайни ам сагъариз хъхьаначир.

⁴⁴И папа, кьулухъай атана, Исадин парталдин ценцик гъил кяна. А папай физвай иви гьасятда акъваз хьана.

⁴⁵— Зак ни гъил кяна? — жузуна Исади. Садани хиве кьун тавурла, адахъ галайбуру ва Петруди лагьана: — Устаз, халкьди Вун элкъуьрна юкьва тунва.

⁴⁶Амма Исади лагьана: — Са ни ятӀани Зак гъил кяна. За Жувай къуват фейиди гьисс авуна.

⁴⁷А паб, вичи авур кар чуьнуьхиз тахьана, зурзун кваз атана, Исадин кӀвачерик ярх хьана. Исадик гъил кягъуникди вичиз регьят хьайиди ада вири халкьдиз малумарна.

⁴⁸Исади адаз лагьана: — Чан руш! Ви иманди вун хиласна! Ахлад, саламат хьурай вун.

⁴⁹Адан гаф мецел аламаз синагугдин кьиле авайдаз атана сада лагьана: — Ви руш кьена, вуна мад Муаллим икрагь хъийимир.

⁵⁰И гафар ван хьайила, Исади Яираз лагьана: — КичӀе жемир, анжах Зи чӀалахъ хьухь. Ви руш хилас жеда.

⁵¹Петрудилай, Ягьядилай, Якьубалай ва рушан диде-бубадилай гъейри, Ада садазни руш авай кӀвализ гьахьдай ихтияр ганач.

⁵²А рушахъ вири шехьзавай. Амма Исади лагьана: — Шехьмир, руш кьенвач, ам ксанва.

⁵³Анал алай инсанар адал хъуьрена, абуруз руш кьенвайди чизвай.

⁵⁴Исади, рушан гъил кьуна, гьарайна: — Къарагъ, я руш!

⁵⁵Рушал гьасятда чан ахкьалтна, ам къарагъна. Исади рушаз тӀуьн гун эмирна.

⁵⁶Рушан диде-буба мягьтел хьана амукьна. Исади абуруз хьайи кардикай садазни талгьун эмирна.