Read Lezgi New Testament – ЦӀийи Икьрар ЛукӀа 9 Bible Online

ЛукӀа 9 - Lezgi New Testament – ЦӀийи Икьрар bible

ЛукӀа 9

¹Исади Вичин цӀикьвед илчидиз эверна, абуруз жинерар хкуддай ихтияр ва азарар сагъар хъийидай къуват гана.

²Ада абур Аллагьдин пачагьвиликай хабар гуз ва азарри кьунвайбур сагъар хъийиз ракъурна.

³— Фидай рекьиз гьич са затӀни кьамир: я аса, я гьебе, я фу, я пул, я дегишдай пекерни, — лагьана Исади. —

⁴Гьи кӀвализ куьн фейитӀа, шегьердай хъфидалди, гьана акъваз.

⁵Са гьина ятӀани куьн мугьманвиле кьабул тавуртӀа, анай экъечӀна хъфидайла, виридаз аквадайвал куь кӀвачерал ацукьай ругни югъур хъувуна ахлад. Къуй им абуруз гудай жазадикай виликамаз хабардарвал хьурай.

⁶Абур Шад Хабар чукӀуриз ва инсанар сагъар хъийиз хуьрер тирвал къекъвена.

⁷Исадин крарикай Гьируд бегдиз хабар хьана. Адан кьил акъатзавачир: садбуру Иса кьена чан хтанвай Ягья я,

⁸муькуьбуру Ам хтанвай Ильяс я, са бязибуруни Ам цӀийиз чан хтанвай дегь чӀаварин пайгъамбар я лугьузвай.

⁹— Ягьядин кьил за атӀана, — лагьана Гьируда. — Амма, заз ван жезвай, чеб тежедай хьтин крар ийизвай Ам вуж хьурай? Адаз Иса акваз кӀан хьана.

¹⁰Илчияр элкъвена хтайла, чпи кьилиз акъудай крарикай абуру Исадиз ахъайна. Ахпа Иса, гьабурухъ галаз кьилди амукьун патал, Бетсаид лугьудай шегьердин патав гвай са хелвет чкадиз фена.

¹¹Иса аниз финикай хабар хьайила, халкьни Адан гуьгъуьна гьатна гьаниз атана. Адани халкь кьабулна ва Аллагьдин пачагьвиликай абуруз ихтилатар ийиз, сагъарна кӀанзавайбур дири хъийиз хьана.

¹²Югъ атана нянихъ элкъвенвай. ЦӀикьвед илчиди, Адан патав атана, лагьана: — Вуна халкь ахъая, абур патарив гвай хуьрериз чпиз илифдай чка ва недай затӀ жагъуриз фирай. Инаг хелвет чка я, абуруз инай недай затӀ жагъидач.

¹³— Куьне халкьдиз тӀуьн це, — лагьана Исади. — Чав гвайди анжах вад фуни кьве гъед я, — лагьана абуру. — Белки, чна и инсанриз виридаз недай затӀар къачун?

¹⁴(Папарни аялар квачиз, вад агъзур кьван итим авай.) Исади Вичин тилмизриз лагьана: — ЯхцӀурни цӀуд-яхцӀурни цӀуд кас жерге-жерге ацукьра.

¹⁵Абуру Ада лагьайвал халкь ацукьарна.

¹⁶Исади вад фу ва кьве гъед къачуна, кьил цавуз хкажна, хийир-дуьа ийиз-ийиз, фу кӀус-кӀус авуна, а кӀусар, халкьдин арада паюн патал, тилмизрив вугана.

¹⁷Фу тӀуьна вири тух хьана; тилмизри цӀикьвед зимбил ацӀудай кьван фан кӀусар кӀватӀ хъувуна.

¹⁸Садра хелвет чкада Исади Вичин тилмизарни галаз дуьаяр ийизвай. — Халкьди Зун няй кьазва? — абурувай хабар кьуна Ада.

¹⁹— Садбуру Ягья пайгъамбардай, — жаваб гана абуру, — садбуру — Ильясай; масадбуру Вун цӀийиз чан хтанвай дегь чӀаварин пайгъамбардай кьазва.

²⁰Адани абурувай хабар кьуна: — Бес куьне Зун няй кьазва? — Аллагьдин Месигьдай — жаваб гана Петруди.

²¹Амма и кардикай садазни талгьун патал, Исади абуруз кӀевелай тагькимарна.

²²— Инсандин Хци гзаф азаб-азият чӀугун лазим я, — лагьана Исади. — Ам агъсакъалри, чӀехи хахамри ва тавратдарри кьабулнач. Ам абуру рекьида ва пуд лагьай юкъуз Адал чан хкведа.

²³Виридахъ элкъвена, Исади давамарна: — Низ Захъ галаз къвез кӀанзаватӀа, ам чандилайни гъил къачуна, гьар юкъуз вичин азабрин хашни кӀулаз яна Захъ галаз атурай.

²⁴Низ вичин чан хуьз кӀанзаватӀа, а касдивай чан къакъатда. Зун патал ни вичин чан эцигайтӀа, адан чан сагъни жеда.

²⁵Вичин чан пучна вири дуьнья къачуникай инсандиз вуч хийир ава?

²⁶Инсандин Хва Вичин ва Вичин Бубадин, гьакӀни пак малаикрин баркалла алаз къведа. Амма низ Зун ва Зи Гафар кьабулиз регъуь хьайитӀа, Инсандин Хцизни, Вич атайла, гьа кас кьабулиз регъуь жеда.

²⁷За квез рикӀивай лугьузва: инал акъвазнавай са бязибуруз Аллагьди пачагьвал ийидай вахт акун тавунмаз, гьич ажални аквадач.

²⁸И гафар лагьана са гьафте кьван алатайла, Петру, Ягья ва Якьуб галаз Иса дуьаяр ийиз дагъдиз хкаж хьана.

²⁹Ада дуьа ийидайла, Адан къамат дегиш хьана, Адан пекерни лацу хьана цӀарцӀар гуз акъвазна.

³⁰Гьа вахтунда Адахъ галаз кьве касди суьгьбет ийизвай: сад Муса тир, муькуьдини — Ильяс.

³¹Баркалла алаз атанвай абур Иса Ярусалимда рекьидайдакай рахазвай.

³²Абуру ихтилатар ийизвай чӀавуз Петру ва адахъ галайбур ахвариз фенвай. Ахварай аватайла, абуруз Исадин баркаллади гузвай рапрап ва Исадихъ галаз акъвазнавай кьве итим акуна.

³³А итимар Исадин патавай хъфидайла, Петруди, вичи вуч лугьузватӀа течиз, Исадиз лагьана: — Устаз! Чун ина аваз хъсан хьана. Ша чна ина пуд кума эцигин: сад Ваз, сад Мусадиз, садни Ильясаз.

³⁴Ада и гафар лугьудайла, тилмизар цифедин хъендик акатна. Чеб цифедик акатайла, тилмизриз кичӀе хьана.

³⁵Цифедай рахадай ван акъатна: — Ам Зи хкянавай Хва я, Адан чӀалаз килиг.

³⁶А ван атӀайла, Иса анал мад текдиз аламай. Чпиз акурдакай Петруди ва адахъ галай тилмизри а вахтунда садазни лагьанач.

³⁷Исани пуд тилмиз пакагьан юкъуз дагъдай хтайла, абурун вилик гзаф халкь экъечӀна.

³⁸Садлагьана халкьдин арадай са итимди гьарайна: — Муаллим! Ваз минет хьурай, зи хциз килиг. Ам захъ авай-авачир сад я.

³⁹Ам чӀуру жинжи кьаз, адай гьараяр акъудзава. Адан сивяй каф чкӀидалди жинжи адал таб акъалдарзава; вичиз кӀандай кьван азабар гайидалай кьулухъ ам адалай алатзава.

⁴⁰За Ви тилмизривай адакай чӀуру жин хкудун тӀалабнай, амма абурулай алакьнач.

⁴¹— Эй, рекьяй акъатнавай, иман гвачир инсанар! — жаваб гана Исади. — Гьикьван гагьди Зун квехъ галамукьрай? Гьикьван чӀавалди За куьн эхрай? Гъваш иниз жуван хва.

⁴²Гада Исадин патав агатзавайла, жинжи ам чилел ярхарна, гада вич вичелай ракъурна. Амма Исади чӀуру жин акъвазарна. Гада сагъар хъувуна, ам вичин бубадив вахгана.

⁴³Вири Аллагьдин гьайбатди мягьтеларна. Инсанар Исади авур кардал мягьтел хьана амайла, Ада тилмизриз лагьана:

⁴⁴— И гафар куьне рикӀел хуьх: Инсандин Хва инсанрин гъиле тун лазим я.

⁴⁵Амма абур Ада лагьай гафарин гъавурда гьатнач. Абур гъавурда гьат тежедай жуьреда кьасухдай лагьай гафар тир. Абурун манани Адавай хабар кьаз абуруз кичӀезвай.

⁴⁶Тилмизрин арада абурукай вуж артух я лугьуз, гьуьжет гьатна.

⁴⁷Абурун рикӀе авай фикир чир хьайила, Исади аял къачуна Вичин вилик акъвазарна.

⁴⁸— И аял Зи хатурдай ни кьабулайтӀа, гьада Зунни кьабулзава, — лагьана Ада, — ни Зун кьабулайтӀа, гьада Зун Ракъурайдини кьабулзава. Квекай виридалайни агъада вуж аватӀа, гьам виридалайни вине жеда.

⁴⁹Инал Ягьяди лагьана: — Я Устаз! Чаз Ви ТӀварцӀелай инсанрикай жинерар хкудзавай са кас акунай. Ам чи арадай тахьуниз килигна, чна адаз а кар ийиз къадагъа авуна.

⁵⁰— Къадагъа ийимир, — лагьана Исади, — вуж квез акси туштӀа, гьам куь патал ала.

⁵¹Иса цаварал хутахдай йикъар мукьвал хьайила, Ада кӀевелай Ярусалимдиз фин кьетӀна.

⁵²Ярусалимдиз Самариятдай яна фена кӀанзавай. Аниз Ада Вичелай вилик сифте Вичин инсанар ракъурна. Ам къведалди гьазурвилер авун патал, абур Самариятдин са хуьруьз фена.

⁵³Амма Иса Ярусалимдиз физва лугьуз, ана абур садани илифарнач.

⁵⁴А кар акур Адан тилмизар тир Якьубани Ягьяди лагьана: — Я Агъа! Ша чна цавай цӀуз эверна, абур тергин.

⁵⁵Исади абуруз и кар къадагъа авуна.

⁵⁶А вахтунда абур элкъвена маса хуьруьз фена.

⁵⁷Абур рекье авайла, са ни ятӀани Адаз лагьана: — Я Агъа! Вун гьиниз фейитӀани, зунни Ви гуьгъуьна аваз къведа.

⁵⁸— СикӀерихъ кьветӀер жеда, — жаваб гана Исади, — цавун къушарихъни — мукар, амма Инсандин Хцихъ кьил эцигдай са чка авач.

⁵⁹Муькуьдаз лагьана: — Зи гуьгъуьна аваз ша. — Я Агъа! — лагьана ада. — Вуна заз фена эвел зи буба кучукдай ихтияр це.

⁶⁰Амма Исади лагьана: — Кьейибур къуй чан алай мейитри кучукрай, жува фена Аллагьдин пачагьвиликай муштулухар це.

⁶¹Са масадани лагьана: — Зун Вахъ галаз къведа, я Агъа, амма сифте Вуна заз фена жуван хизандиз сагърай лугьудай ихтияр це.

⁶²Амма Исади адаз лагьана: — Ни вичин гъил куьтендин хилел эцигиз, вил кьулухъ ягъиз хьайитӀа, гьадакай Аллагьдин Пачагьлугъ патал гьич са хийирни жедач.