Read Lezgi New Testament – ЦӀийи Икьрар Ягья 1 Bible Online

Ягья 1 - Lezgi New Testament – ЦӀийи Икьрар bible

Ягья 1

¹Сифтени-сифте авайди Гаф тир. Гаф Аллагьдив гвай. Гаф Аллагь тир.

²Гаф сифтедилай Аллагьдив гвай.

³Аллагьди вири Гафунин куьмекдалди халкь авуна; Гаф галачиз халкь хьайи са затӀни авайди туш.

⁴Гафуни уьмуьр гузвай, уьмуьрни инсанар патал экв тир.

⁵Экуьни мичӀивиле экв гузвай. МичӀивиливай Экв кьаз хьанач.

⁶Аллагьди ракъурнавай Ягья лугьудай са кас авай.

⁷Ам, вири инсанри Экуьнихъ иман авун патал, Экуьникай шагьидвал ийиз атана.

⁸Ам Экуьникай хабар гуз ракъурнавайди тир, амма ам вич Экв тушир.

⁹Гьар са инсандин руьгь экуь ийидай халисан Экв, лагьайтӀа, дуьньядиз атана.

¹⁰Экв дуьньяда хьана, амма гьа Экуьнин куьмекдалди халкь хьайи дуьньядиз Ам чир хьанач.

¹¹Ам Вичинбурун патав атана, амма абуру Ам кьабулнач.

¹²Вичихъ иман ийизвайбуруз, Вич кьабулайбуруз Ада Аллагьдин патай тирбур жедай, яни адетдин дидейри хазвай аялар ваъ, Аллагьдилай жезвай аялар хьунин ихтияр гана.

¹³

¹⁴Гаф инсандиз элкъвена, ада чахъ галаз санал уьмуьр тухвана. Ам берекатдив ва гьакъикъатдив ацӀанвай, Ам Бубадихъ авай са Хва тир, Адал Бубадал алай хьтин баркалла алай, чазни Адал алай баркалла акуна.

¹⁵Адакай Ягьяди инсанриз шагьидвал ийиз ван ацалтна лугьузвай: — Ингье за квез вичикай ихтилат авур а Кас. Ам залай гуьгъуьниз къведайди, залай артухди тирди за квез лагьанай, вучиз лагьайтӀа Ам залай вилик авай.

¹⁶Адан ацӀай берекатдикай сад-садан гуьгъуьналлаз чал паяр гьалтна.

¹⁷Аллагьди чаз Къанун Мусадин куьмекдалди гана, берекатни гьакъикъат — Иса Месигьдин куьмекдалди.

¹⁸Садазни садрани Аллагь акурди туш, амма Адан авай-авачир са Хци Ам чаз чирна. Адан авай-авачир са Хва Вич Аллагь я, Ам Аллагьдихъ галаз ава.

¹⁹Чувудрин кьиле авайбуру Ярусалимдай адан патав хахамарни левияр ракъурай чӀавуз Ягьяди ихьтин шагьидвални авуна. Абуру адавай «Вун вуж я?» — лагьана хабар кьурла,

²⁰Ада чин кьун тавуна, ачухдиз жаваб гана: — Зун Месигь туш.

²¹— АкӀ хьайила, бес вун вуж я? Ильяс яни? — хабар кьуна абуру. — Ваъ, — лагьана ада. — Вун чна вилив хуьзвай пайгъамбар яни? — Ваъ, — жаваб гана ада.

²²— Бес Вун Вуж я? — жузуна абуру. — Чун ракъурайбуруз чна вуч жаваб гун лазим я: Вуна жува жувакай вуч лугьуда?

²³Ягьяди Яшай пайгъамбардин гафаралди лагьана: «Зун кьурумда гьарайзавайдан ван я: „Ребби къведай рехъ дуьзди ая“».

²⁴Ягьядин патав фенвайбур фарисейри ракъурнавайбур тир.

²⁵Абуру адавай хабар кьуна: — Вун я Месигь, я Ильяс, я гьа пайгъамбар тахьайла, вучиз вуна инсанрив цик акахьун къачуз тазва?

²⁶Ягьяди жаваб яз лагьана: — За инсанрив цик акахьун къачуз тазва, амма куь арада квез течир са Кас ава:

²⁷зи гуьгъуьнилай Къведайди Гьам я; зун Адан кӀвачин къапарин чӀулар ахъайизни лайих туш.

²⁸И крар Бетанда, Ягьяди халкьдив цик акахьун къачуз тазвай Ярдан вацӀун рагъэкъечӀдай пата хьана.

²⁹Пакагьан юкъуз Ягьядиз вичин патав къвезвай Иса акуна: — Ингье, — лагьана ада, — им Аллагьдин КӀел я, Ада вири дуьньядин гунагьар вичин хиве твада.

³⁰«Зи гуьгъуьнлай Къведайди, зун жедалди Авайди яз, залай артухди я» за гьа идакай лугьузвай.

³¹Заз Ам вуж ятӀа чизвачир, амма за, иниз атана, вири Исраилдиз Ам чир хьун патал, квев цик акахьун къачуз тазва.

³²Ягьяди Исадикай шагьидвал авун давамарна: — Заз лифрен шикилда аваз Руьгь цаварай Адал эвичӀайвал ва Адал аламукьайвал акуна.

³³Акьван чӀавалди заз Ам чидачир. Амма, инсанрив цик акахьун къачуз тун патал, зун куь патав Ракъурайда заз лагьанай: «Ваз са нел ятӀани Пак Руьгь эвичӀдайвал ва адал аламукьдайвал акуртӀа, ваз чир хьухь хьи, а Кас инсанрив Пак Руьгьдик акахьун къачуз Тадайди я».

³⁴Заз и кар жуван вилералди акуна ва за шагьидди хьиз лугьузва: Ам Аллагьдин Хва я.

³⁵Пакагьан юкъузни Ягья гьанал вичин кьве тилмизни галаз акъвазнавай.

³⁶Патавай физвай Иса акурла, Ягьяди Адакай лагьана: — Ингье Аллагьдин КӀел.

³⁷И гафарин ван хьайила, кьве тилмизни Исадин гуьгъуьна аваз фена.

³⁸Исади элкъвена, Вичин гуьгъуьна аваз къвезвайбур акурла, абуруз лагьана: — Квез вуч кӀанзава? — Рабби, — лагьана абуру, — Ви кӀвал-югъ гьина ава? («Рабби» муаллим лагьай чӀал я.)

³⁹Исади лагьана: — Захъ галаз ша, квез аквада. Абур фена ва абуруз Адан кӀвал-югъ акуна, амай югъ абуру гьана акъудна. Сятдин кьудар жезвай.

⁴⁰Ягьяди Исадикай авур ихтилатрин ван хьана Исадин гуьгъуьна аваз фейибурукай сад Симун-Петрудин стха Эндирей тир.

⁴¹Ада сифте вичин стха Симун жагъурна ва адаз лагьана: — Чаз Месигь жагъана (Месигь — ГуьцӀуьр Алайди лагьай чӀал я).

⁴²Эндирея Симун Исадин патав гъана. Исади, адаз килигна, лагьана: — Вун Ягьядин хва Симун я, ви тӀвар Кифа жеда (Кифа, яни Петру — им къван лагьай чӀал я).

⁴³Пакагьан юкъуз Исади Галилейдиз фин къетӀ авуна. Исадал ФилипӀ гьалтна. — Зи гуьгъуьна аваз ша, — лагьана Исади адаз.

⁴⁴ФилипӀ, Эндирейни Петру хьиз, Бетсаид лугьудай шегьердай тир.

⁴⁵ФилипӀа Натанаил жагъурна, адаз лагьана: — Чаз Вичикай Мусадин Къанундани пайгъамбаррин ктабра кхьенвай Месигь жагъана. Ам Назаретдай тир Юсуфан хва Иса я.

⁴⁶— Назаретдай рябет квай са затӀ акъатда жал? — лагьана Натанаила. — Фена жув килиг, — лагьана ФилипӀа.

⁴⁷Исади, Вичин патав къвезвай Натанаил акурла, адакай лагьана: — Ингье, фендигарвал квачир халисан исраилви.

⁴⁸— Ваз зун гьинай чида? — хабар кьуна Натанаила. — Ваз ФилипӀа эвердалди, Заз вун инжил таран кӀаник акунай, — жаваб гана Исади.

⁴⁹— Я Муаллим! — лагьана Натанаила. — Вун Аллагьдин Хва я, Вун Исраилдин Пачагь я.

⁵⁰Исади жаваб гана: — За ваз «Заз вун инжил таран кӀаник акуна», — лагьана лугьуз, вун Зи чӀалахъ жезва. Ваз идалайни чӀехи керемат-ишараяр аквада.

⁵¹Ада давамарна: — За квез лап рикӀивай лугьузва хьи, квез ахъа хьанвай цаварай Аллагьдин малаикар Инсандин Хцин патав эвичӀиз-хкаж хъжедайвал аквада.