Read Lezgi New Testament – ЦӀийи Икьрар Ягья 10 Bible Online

Ягья 10 - Lezgi New Testament – ЦӀийи Икьрар bible

Ягья 10

¹Исади лагьана: — За квез лап рикӀивай лугьузва: вуж хиперин парахдиз ракӀарай ваъ, маса чкадай — жугъундилай акьахна гьахьзаватӀа, гьам угъри ва чапхундайди я.

²РакӀарай гьахьдайди хипер хуьдай чубан я.

³Адаз ракӀарал алайда рак ахъайда, хиперни адаз муьтӀуьгъ жеда. Ада вичин хипер тӀварар кьаз эвериз парахдай акъудда.

⁴Вичин хипер парахдай акъудайла, ам абурун кӀвенкӀве аваз фида; адан ван чиз хиперни адан гуьгъуьна гьатна фида.

⁵Абур чарадан гуьгъуьна аваз фидач. Чарадакай абур катда, абуруз чарадан ван таниш туш.

⁶Амма фарисеяр Исади ахъаяй кьисадин гъавурда гьатнач.

⁷Исади давамар хъувуна: — За квез лап рикӀивай лугьузва хьи, Зун хипер физ-хкведай рак я.

⁸Залай вилик атай кьванбур вири угъриярни чапхундайбур тир, амма хипер абуруз муьтӀуьгъ хьанач.

⁹Зун рак я. Вуж Зай фейитӀа, гьам хилас жеда. Зай физ-хтайдаз хъсан яйлахни жагъида.

¹⁰Угъри анжах чуьнуьхиз, яна рекьиз ва тергиз къвезвайди я. Зун уьмуьр гун патал атанвайди я. За ам алахьна ацӀайди ийида.

¹¹Зун хъсан чубан я. Хъсан чубанди вичин хипер патал чанни гуда.

¹²Киридихъ кьунвайдакай хиперин иеси хьтин чубан жедач. Жанавур акурла, ам хиперни туна катда. Жанавурри хиперал вегьена абур кьуд патахъ чукӀурда, хипер гьар сад санихъ чкӀида.

¹³Киридихъ кьунвай чубан катда, ада хиперин аявалдач.

¹⁴Зун хъсан чубан я, Заз Зи хипер гьикӀ чидатӀа, Зунни Зи хипериз гьикӀ чидатӀа,

¹⁵гьакӀ Зи Бубадизни Зун чида ва Зазни Зи Буба гьакӀ чида. Зани Зи чан хипер патал гуда.

¹⁶Захъ и парахда авачир маса хиперни ава, гьабурни За санал кӀватӀна кӀанзава. Гьабурузни Зи ван чида. Зи хиперикай кьиле са чубан авай са суьруь жеда.

¹⁷За Зи уьмуьр Заз цӀийи кьилелай мад уьмуьр хъхьун паталай гузва, гьа и кардиз килигна Зун Зи Бубадиз кӀанни ийида.

¹⁸Садани Завай Зи чан къачузвач, амма За адалай Жуван хушуналди гъил къачузва. Захъ Жуван чан гудай ва ам мад къахчудай ихтияр ава. И тагьким Заз Зи Бубади гана.

¹⁹И гафари чувудрин кьиле авайбурун арада мад гьуьжетар туна.

²⁰Абурукай гзафбуру лугьузвай: — Ам жин акатна пехъи хьанва. Чна Адаз вучиз яб гузва?

²¹— А гафар жин квайданбур туш, — лугьузвай муькуьбуру. — Жинживай буьркьуьдан вилер ахъайиз жеда жал?

²²ХъуьтӀуьн вахт тир. Ярусалимда Аллагьдин КӀвал ЦӀийи хъувунин сувар[2] алукьнавай.

²³Иса Аллагьдин КӀвалин гьаятда Сулейманан ширасдик квай.

²⁴Инал чувудар Исадал алтӀушна ва лагьана: — Вуна чун кьве рикӀин яз гьикьван гагьда тада? Вун Месигь ятӀа, чаз ачухдиз лагь.

²⁵— За квез лагьанай, амма куьн Зи чӀалахъ хьанач, — жаваб гана Исади. — За Зи Бубадин ТӀварцӀелай ийизвай крари Закай шагьидвал ийизва.

²⁶Амма куьне Захъ иман ийизвач, куьн Зи хипер туш эхир.

²⁷Зи хипер Заз муьтӀуьгъ жеда, Зазни гьабур чида, абур Зи гуьгъуьна гьатна жеда.

²⁸За абуруз эбеди уьмуьр гузва. Гьич са чӀавузни абур я рекьидач, я Зи Гъиляй абур садани акъуддач.

²⁹Абур вири Заз гайи Зи Буба виридалайни вине я, Зи Бубадин гъиляй садавайни са затӀни акъудиз жедач.

³⁰Зунни Буба сад я.

³¹Инал чувудри, Адал гьалчун патал, мад къванер гъилера хкьуна.

³²— Зи Бубадин куьмекдалди За квез гзаф хъсанвилер авуна, — лагьана Исади. — За авунвай гьи хъсанвиляй квез Зун къванцин хура тваз кӀанзава?

³³— Вуна, Вун инсан яз, Жув Аллагьдиз барабар яз кьазва, — жаваб яз лагьана чувудри. — Вуна авур хъсан крарай ваъ, ви асивилиз килигна, чаз Ваз къван гуз кӀанзава.

³⁴— Куь Къанунда «Аллагьди лагьана: куьн аллагьар я» лагьай гафар кхьенвачни мегер? — жаваб гана Исади. —

³⁵Каламда кхьенвайбур чӀуриз жедач. Аллагьди Вичин Гафунин ван къвезвайбуруз аллагьар лугьузва.

³⁶Бубади Хкянавай ва дуьньядиз Ракъурнавай За Зун Аллагьдин Хва я лагьайла, вучиз куьне, Зун аси хьанва лугьузва?

³⁷За ийизвай крар Зи Бубадин крар туштӀа, Зи чӀалахъ жемир.

³⁸Куьн Зи чӀалахъ жезвачтӀа, За ийизвай Зи Бубадин крарин хьайитӀани чӀалахъ хьухь. Зи крарихъ куьн чӀалахъ хьайитӀа, квез Зун Зи Бубада, Бубани За авайди чир жеда.

³⁹Гьа чӀавуз чувудрин кьиле авайбуруз мад Ам кьаз кӀан хъхьана, амма Иса абурун гъиляй акъатна.

⁴⁰Иса мад Ярдан вацӀун а патаз хъфена, виликдай Ягьяди инсанрив цик акахьун къачуз тазвай чкадиз атана ва гьана амукьна.

⁴¹Гзафбуру атана лугьузвай: — Ягьяди авур са ахьтин керемат-ишара авач, амма ада Исадикай авур ихтилатар гьакъикъибур тир.

⁴²Ана авай гзаф инсанар Исадихъ ийизвай имандал атана.