Read Lezgi New Testament – ЦӀийи Икьрар Ягья 11 Bible Online

Ягья 11 - Lezgi New Testament – ЦӀийи Икьрар bible

Ягья 11

¹Бетан лугьудай хуьре Майрамани адан вах Мартади уьмуьр тухузвай. Садра са папа, Реббидин кӀвачеривай атир галай гъери гуьцӀна, вичин чӀараривди михьнай. Гьа паб и кьве вахакай сад — Майрам — тир. Абурун стха Лазар азарди кьунвай.

³Вахари Исадин патав «Я Агъа, Ви рикӀ алайди азарди кьунва» лугьуз сад ракъурнай.

⁴А хабар агакьайла, Исади лагьанай: — А азарди адаз ажал гъидач, Лазар азарди кьуни Аллагьдал ва Адан Хцел баркалла гъида.

⁵Исадиз Марта, Майрам ва Лазар кӀандай.

⁶Лазар азарди кьунвайди я лагьана хабар фад агакьнайтӀани, Иса Вич авай чкада мадни кьве юкъуз амукьна.

⁷Идалай кьулухъ Ада Вичин тилмизриз лагьана: — Ша чун мад Ягьудатдиз фин.

⁸— Я Муаллим! — лагьана тилмизри. — Гьа и йикъара чувудриз Ваз къван гуз кӀанзавай, амма Вун мад гьаниз физва.

⁹— Йикъа цӀикьвед сят авачни? — жаваб гана Исади. — Инсан рекьяй юкъуз физваз хьайитӀа, ам кӀвач галкӀана ярх жедач, адаз и дуьнья экуь яз аквазва.

¹⁰Йифиз физвайдан кӀвач адав экв гвачирвиляй са затӀунихъ галкӀида.

¹¹И гафар лагьана, Ада давамар хъувуна: — Чи дуст Лазар ахварал фенва, Зун ам ахварай авудиз физва.

¹²Адан тилмизри лагьана: — Я Агъа! Ам ахвариз фенватӀа, сагъ хъжеда.

¹³Иса ам кьенвайдакай рахазвай, амма тилмизриз Ам гьакӀан ахварикай рахазвайди хьиз жезвай.

¹⁴Инал Исади ачухдиз лагьана: — Лазар кьенва.

¹⁵Куьн имандал гъидай хьтин са кар авунин фикир авайвиляй, Зун икьван чӀавалди аниз фенвачир. Зун и кардал шад я. Гила ша чун адан патав фин.

¹⁶Кьветхвер лакӀаб алай ТӀумая тилмизриз лагьана: — Ша чунни Муаллимдихъ галаз фин, Адахъ галаз санал рекьин.

¹⁷Иса Бетандиз атайла, Адаз Лазаран мейит кьуд йикъан вилик кьветӀе динжарнавайди чир хьана.

¹⁸Бетандилай Ярусалимдал кьван зур сятдин рехъ авай.

¹⁹Майраман ва Мартадин патав кьенвай стхадин башсагълугъвал гуз гзаф чувудар атанвай.

²⁰Иса къвезвайдакай хабар хьайила, Марта Адан вилик экъечӀна; Майрам кӀвале амай.

²¹Мартади Исадиз лагьана: — Я Агъа! Вун ина авайтӀа, зи стха рекьидачир.

²²Амма заз чизва, исятдани вуч Вуна Аллагьдивай тӀалабайтӀа, гьам Ада Ваз гуда.

²³— Ви стхадал чан хкведа, — лагьана Исади.

²⁴— Къияматдин юкъуз адал чан хкведайди заз чизва, — лагьана Мартади.

²⁵— Уьмуьр гузвайдини, кьейила чан хкизвайдини Зун я, — лагьана Исади. — Захъ иман ийизвайди кьейитӀани, адал чан хкведа.

²⁶Захъ иман ийиз уьмуьр тухузвайди са чӀавузни рекьидач. Вун и кардин чӀалахъ яни?

²⁷— Эхь, Агъа! — лагьана Мартади. — Вун Аллагьдин Хва я, Вун и дуьньядиз атана кӀанзавай Месигь тирдахъ зун агъазва.

²⁸И гафар лагьана, Марта вичин вах Майраман патав хъфена. Ада Майрамаз чинеба эверна, лагьана: — Муаллим ина ава, Ада ваз эверзава.

²⁹И гафар ван хьанмазни Майрам тадиз къарагъна, Исадин патав фена.

³⁰Иса хуьруьз гьахьнавачир, Ам Мартадал гьалтай чкадал аламай.

³¹Майрамахъ галаз кӀвале ацукьна башсагълугъвал гузвай чувудар, Майрам тади кваз кӀваляй экъечӀуниз килигна, адан гуьгъуьна гьатна фена. Абуруз Майрама, кьейи стха динжарнавай кьветӀен патав фена, ишел ийизвай хьиз хьанай.

³²Майрам Иса алай чкадал атана. Ам акурла, Майрам Адан кӀвачерик ярх хьана. — Я Агъа! — лагьана ада. — Вун ина авайтӀа, рекьидачир зи стха.

³³Майрам ва адахъ галаз атай чувудар шехьзаваз акурла, Исадиз Вичизни гьайифар хьана.

³⁴Ада гъалаба кваз хабар кьуна: — Куьне ам гьина эцигнава? — Фена Жув килиг, я Агъа! — жаваб гана абуру.

³⁵Исадик шел акатна.

³⁶Гьанал чувудри лагьана: — Аквазвани Адаз Лазар гьикьван кӀанзавайтӀа!

³⁷Амма абурукай са бязибуру лагьана: — Адавай буьркьуьбурун вилериз экв хкиз жезва, бес Адавай Лазар кьиникьикай хуьз жедачирни?

³⁸Иса, гьайифди куз, мейит авай кьветӀин патав атана. КьветӀин сивел къван алай.

³⁹Исади лагьана: — Анлай къван алуд. Рагьметдиз фенвайдан ваха, Мартади, Адаз лагьана: — Я Агъа! Адак ни акатнава; ам ина аваз кьуд югъ я.

⁴⁰— За ваз лагьаначирни, иман ийизватӀа, Аллагьдин баркалла аквада? — лагьана Исади.

⁴¹Кьейиди авай кьветӀелай къван алудна. Исади кьил виниз хкажна, лагьана: — Шукур хьуй Ваз, Буба, Ваз Зи ван атана.

⁴²Зи ван Ваз датӀана къведайди Заз чизва, амма и гафар За инал алай халкь патал лугьузвайбур я. Къуй абур Зун Вуна ракъурнавайдан чӀалахъ хьурай.

⁴³И гафарилай гуьгъуьниз Ада ван алаз гьарайна: — Лазар, экъечӀ анай!

⁴⁴Кьейиди анай къецел экъечӀна. Адал гъилерни кӀвачер кутӀуннавай кафанар аламай, адан чинни ягълухдал кутӀуннавай. Анал алайбуруз Исади лагьана: — Адан гъилерни кӀвачер ахъая, адавай къекъвез хьурай.

⁴⁵Майрамаз башсагълугъвал гуз атай чувудриз Исадин керемат-ишара акурла, гзафбур Адахъ ийизвай имандал атана.

⁴⁶Абурукай са бязибур фарисейрин патав фена, Исади авурдакай абуруз ахъайна.

⁴⁷Гьа чӀавуз чӀехи хахамарни фарисеяр Меслягьатдиз кӀватӀ хьана: — Чна вуч авун лазим я? А касди гзаф керемат-ишараяр къалурзава;

⁴⁸Ам чна гьакӀ туртӀа, Адахъ вири халкьди иман ийида, гьаниз килигна, римвийрини атана чи Аллагьдин КӀвал барбатӀда ва чи халкь тергда.

⁴⁹Абурукай гьа йисуз кьилин хахамдин везифа хиве авай Каяф тӀвар алай касди лагьана: — Квез са затӀни чизвач.

⁵⁰Битав са халкь рекьидалди, са кас рекьин хъсан я. Гьа и кар куь кьиле гьатзавачни бес?

⁵¹И гафар Каяфади вичи вичелай лагьай гафар тушир. Ам гьа йисуз кьилин хахамвиле авайвиляй, халкь хилас авун патал Иса рекьидайдакай Ада пайгъамбардиз хас саягъда лагьанай.

⁵²Амма Иса тек са чувуд халкь патал рекьин лазим тушир. Ада дуьньядиз чкӀанвай Аллагьдин вири веледрикай Вичин кьиникьалди са халкь авунни лазим тир.

⁵³Гьа йикъалай чувудрин кьиле авайбуру Иса яна кьин меслят авуна.

⁵⁴ГьакӀ хьайила Иса мад чувудриз аквадай чкайриз хъфенач, Ам кьурумдин патав гвай Ифраим лугьудай шегьердиз фена. Ана Ам Вичин тилмизарни галаз акъвазна.

⁵⁵Чувудрин Песагь сувар мукьва жезвай. Ярусалимдиз вири уьлкведай, Песагь суварилай вилик авуна кӀандай михьивилер авун патал, гзаф инсанар атанвай.

⁵⁶Гьа вахтунда чувудар Исадихъ къекъвез хьанай. Абуру Аллагьдин КӀвале сада садавай хабар кьазвай: — Ваз чиз, Ам Песагь суварик къведани?

⁵⁷ЧӀехи хахамрини фарисейри, чпивай Иса кьаз жедайвал, Ам авай чкадикай чпиз хабар ая лагьана виридаз тагькимнай.