Read Lezgi New Testament – ЦӀийи Икьрар Ягья 12 Bible Online

Ягья 12 - Lezgi New Testament – ЦӀийи Икьрар bible

Ягья 12

¹Песагь суварилай ругуд югъ вилик, Иса Бетандиз атана. Ана кьейидалай кьулухъ вичел Ада чан хкай Лазара уьмуьр тухузвай.

²Ана Адаз нянин суфра ахъайна. Марта абурун кьилел-кӀвачел элкъвезвай. Адахъ галаз суфрадихъ ацукьнавайбурук Лазарни квай.

³Майрама атирдин ни галай багьа гъери къачуна, са гирванка кьван Исадин кӀвачеривай гуьцӀна ва вичин чӀараралди Адан кӀвачер михьна. КӀвале атирдин хуш ни гьатна.

⁴Исадин тилмизрикай сад тир, гележегда Ам маса гудай Искарият Ягьуда лагьана:

⁵— Атирдин ни галай гъери пуд виш динардихъ вучиз маса ганач? А пул кесибриз гуз жедай эхир!

⁶Ибур ада кесибрихъ рикӀ кузвайвиляй ваъ, вич угъри тирвиляй лагьай гафар тир: тилмизрин уртах пул хуьдай затӀ адав жедайди тир, ада мукьвал-мукьвал а пулуникай чуьнуьхдай.

⁷— Майрам секиндиз тур, — лагьана Исади. — А гъери ада Зун сура динжардай югъ паталди хвенва.

⁸Кесибар датӀана квехъ гала, амма Зун — датӀана жедач.

⁹Чувудрикай гзафбуруз Иса Бетанда авайдакай хабар хьана. Гьавиляй абур, тек са Иса ваъ, гьакӀ кьейидалай кьулухъ Ада чан хкай Лазарни акун патал, гьаниз фена.

¹⁰Исадин патав атай гзаф чувудар, Лазар себеб яз, Исадихъ ийизвай имандал атанай. Гьавиляй чӀехи хахамри Лазарни яна рекьин кьетӀна.

¹¹

¹²Гуьгъуьнин юкъуз Ярусалимдиз суварик атай гзаф инсанриз аниз Исани къвезва лугьудай ван хьана.

¹³Абур гъилера хурмадин тарцин хилер аваз Адан вилик экъечӀна ва гьарайиз хьана: — Гьасанна! Реббидин ТӀварцӀелай Къвезвайдаз шукур хьурай! Исраилдин Пачагьдиз шукур хьурай!

¹⁴Иса, жегьил лам жагъурна, гьадал акьахна. И кар Каламда кхьенвайвал хьана:

¹⁵«КичӀе жемир, Сигьандин руш Ярусалим, шаркӀунтӀдаллаз ингье къвезва ви Пачагь!»

¹⁶И кар хьайи чӀавуз Адан тилмизар Каламда кхьенвай гафар кьилиз акъатзавайдан гъавурда акьуначир. Амма гуьгъуьнлай, Исадал баркалла атайдалай кьулухъ, Каламда кхьенвай гафар кьилиз акъатайди абуруз чир хьана.

¹⁷Ана Исади Лазарал чан хкайвал акур инсанар авай. Абуру Лазар Исадин эвердал кьветӀяй эхкъечӀайдакай вирибуруз суьгьбетна.

¹⁸Исади авур керемат-ишарадин кардикай хабар хьайивиляй халкь Адан вилик экъечӀна.

¹⁹Фарисейри чпи чпик лугьуз хьана: — Аквазвани, квевай Адаз са затӀни ийиз жезвач. Дуьнья вири Гьадан гуьгъуьна гьатнава.

²⁰Икрам ийиз сувариз атанвайбурун арада чувудар туширбурукайни са кьадар авай.

²¹Абуру, Галилейда авай Бетсаиддай тир ФилипӀан патав атана, адаз лагьанай: — Агъа! Чаз Иса акваз кӀанзава.

²²ФилипӀа, фена и гафар Эндиреяз лагьана, Эндиреяни ФилипӀа фена Исадиз хълагьна.

²³Исади жаваб яз лагьана: — Инсандин Хцел баркалла къведай вахт атанва.

²⁴За квез лап рикӀивай лугьузва: къуьлуьн твар чилел аватна пуч тахьайтӀа, ам твар яз амукьда, амма ам чилел аватна терг хьайитӀа, адалай гзаф тварар арадиз къведа.

²⁵Жуван чан кӀандайди чандикай магьрум жеда, и дуьньяда жуван чан такӀанда вичин чан эбеди уьмуьр патал хуьда.

²⁶Ни Заз къуллугъзаватӀа, гьам Зи гуьгъуьна аваз атун лазим я. Зун гьина хьайитӀа, Зи къуллугъзавайдини гьана хьун лазим я. Ни Заз къуллугъ авуртӀа, Зи Бубадини гьадаз хатур-гьуьрмет ийида.

²⁷Зи рикӀи рикӀ незва; За гьикӀ лугьун: «Буба, Зи кьилел къведайдакай Зун хуьх». Зун гьа и кар паталди атанва.

²⁸Буба, Ви баркалла къалура! Гьа чӀавуз цаварилай ван атана: — За квез Зи баркалла къалурнай ва мадни къалурда.

²⁹И ван хьайи инал алай халкьди лагьана: — Ибур цавун къукърумар я. Муькуьбуру лагьана: — Адахъ галаз малаик рахана.

³⁰Адан гьакъиндай Исади лагьана: — Цаварилай а ван Зун патал ваъ, куьн патал атанвайди я.

³¹Гила и дуьньядин дуван ийидай вахт хьанва; и дуьньядал агъавалзавай бег гила-мад чукурда.

³²Зун чилелай хкаж авурла, За вири Жувал желб ийида.

³³И гафар лугьуналди Ада Вич гьихьтин ажалдалди рекьидатӀа къалурзавай.

³⁴Халкьди Адаз лагьана: — Чаз Къанундай чизва хьи, Месигь атайла, ам эбеди яз чи патав гумукьда. Амма Вуна Инсандин Хва цавуз хкаж хъжеда лугьузва. А Инсандин Хва Вич вуж я?

³⁵— Са тӀимил вахтунда квехъ галаз Экв амукьда, — жаваб гана Исади. — Экв амай кьван гагьда куьн, мичӀера гьат тийидайвал, куь рехъди алад. МичӀерай физвайдаз вич гьиниз физватӀа чир жедач.

³⁶Квекай Экуьнин веледар хьун патал Экв квехъ галаз амай кьван гагьда Экуьнихъ иман ая. И гафар лагьана куьтягь хьайила, Иса абурукай къакъатна чуьнуьх хьана.

³⁷Исади инсанрин вилик икьван керемат-ишараяр авунатӀани, абуру Адахъ иман ийизвачир.

³⁸Гьа икӀ Яшай пайгъамбардин гафар кьилиз акъатнай. А гафар ихьтинбур я: «Я Ребби, чна лагьай гафарин вуж чӀалахъ хьанай кьван? Реббидин къуват низ акунай кьван?»

³⁹Вичин ктабда маса чкадал Яшая инсанривай вучиз иман ийиз жезвачтӀа мад лагьанай:

⁴⁰«Ада абурун вилер буьркьуь, рикӀерни кӀеви авуна. Ада и кар, абуруз вилералди затӀни такун патал ва рикӀералди затӀни кьатӀун тавун патал, авуна. Гьавиляй абурувай Аллагьдихъ элкъвена чеб сагъар хъия лугьуз жезвач».

⁴¹Ибур Яшая Исадин баркалла гьихьтинди жедатӀа аян тирвиляй лагьай гафар тир.

⁴²Гьакимрикайни гзафбур Исадихъ ийизвай имандал атанай, амма чеб фарисейри синагугдай чукуриз кичӀела, абуру а кар ачухдиз хиве кьазвачир.

⁴³Абуруз чпин тариф Аллагьди ийизвайдалай гзаф инсанри авуна кӀанзавай.

⁴⁴Исади ван алаз лагьана: — Захъ иман ийизвайда тек са Захъ ваъ, гьакӀни Зун Ракъурнавайдахъ иман ийизва.

⁴⁵Зун аквазвайдаз Зун Ракъурнавайдини аквазва.

⁴⁶Захъ иман авурбур мичӀе амукь тавун патал, Зун Экв яз дуьньядиз атана.

⁴⁷Зи гафар ван хьайи, амма За лагьайвал тавурбурун дуван За ийидач. Зун дуьньядин дуван ийиз ваъ, дуьнья хиласиз атанвайди я.

⁴⁸Зун негь ийизвайдаз ва Зи гафар кьабул тийизвайдаз дуванбег ава, Зи гафари адан дуван Къияматдин юкъуз ийида.

⁴⁹Зи гафар За Жува Жувакай туькӀуьрна лугьузвайбур туш. Вуч ва гьикӀ лагьана кӀандатӀа, Зун ракъурнавай Зи Бубади Заз тагькимнава.

⁵⁰Адан тагькимди эбеди уьмуьрдал гъидайди Заз чизва. Гьа икӀ, Заз Бубади вуч лагьанатӀа, Зани гьам лугьун хъийизва.