Read Lezgi New Testament – ЦӀийи Икьрар Ягья 13 Bible Online

Ягья 13 - Lezgi New Testament – ЦӀийи Икьрар bible

Ягья 13

¹Песагь суварин вахт мукьва жезвай. Исадиз Вич и дуьньядай Бубадин патав хъфидай вахт атанвайди чизвай. И дуьньяда Вичихъ галаз санал хьайибур Вичиз гьикьван пара кӀан ятӀа, Ада эхирдалди къалурна.

²Вири нянин суфрадихъ ацукьнавай. Исадиз хаинвал авунин фикир иблисди Искарият Симунан хва Ягьудан рикӀе тунвай.

³Исадиз Вич Аллагьдин патавай атанвайди ва Аллагьдин патав хъфидайди чизвай. ГьакӀни Адаз Аллагьди вири Вичин ихтиярда тунвайдини чизвай.

⁴Ам суфрадихъай къарагъна, Ада винелай алукӀнавай парталар хтӀунна, юкьва дасмал туна.

⁵Ахпа Ада лигенда яд цана, Вичин тилмизрин кӀвачер чуьхуьз, юкьва авай дасмалдалди михьи ийиз эгечӀна.

⁶Гьа икӀ нубат Симун-Петрудал агакьна. — Я Агъа! — лагьана Исадиз Петруди. — Ваз рикӀивайни зи кӀвачер чуьхуьз кӀанзавани?

⁷— За ийизвай кардин гъавурда вун исятда ваъ, адан гъавурда вун геж акьада, — жаваб гана Исади.

⁸— Вуна зи кӀвачер гьич са чӀавузни чуьхуьз тахьуй, — лагьана Петруди. — За абур чуьхуьн тавуртӀа, вун Заз талукь жедач, — лагьана Исади.

⁹— Я Агъа! — лагьана Симун-Петруди. — АкӀ ятӀа, са кӀвачер ваъ, гъилерни, кьилни чуьхуьх.

¹⁰— Вири беден чуьхвенвайда тек са кӀвачер чуьхуьн лазим я, — лагьана Исади, — вучиз лагьайтӀа адан беден михьи я; куьнни михьи я, амма вири — ваъ.

¹¹Вич ни маса гудатӀа Адаз чизвай, гьакӀ хьайила Ада «Куьн вири михьи туш» лагьанай.

¹²Тилмизрин кӀвачер чуьхвена, Вичин пекер ахлукӀайла, Ада хтана суфрадихъ ацукьна, абуруз лагьана: — За авурдан гъавурда куьн гьатнани?

¹³Куьне Заз «Я Агъа», «Муаллим» лугьузва. ГьакӀ лугьунал куьн гьахъ я, Зун куьне лугьузвайди я.

¹⁴За, куь Муаллимди ва Агъади, куь кӀвачер чуьхвенатӀа, куьнени сада садан кӀвачер чуьхуьн лазим я:

¹⁵За квез чешне къалурнава, За квез авурвал куьнени ая.

¹⁶За квез лап рикӀивай лугьузва: нуькер вичин иесидилай артух туш, илчини вич ракъурайдалай артух туш.

¹⁷Гила квез и кар чизва, куьне гьакӀ ийиз хьайитӀа, куьн бахтавар жеда.

¹⁸Зун квекай виридакай рахазвач. За хкянавайбур Заз чизватӀани, Каламда кхьенвай ихьтин гафарни кьилиз акъатун лазим я: «Захъ галаз фу тӀуьрди Заз акси хьана».

¹⁹И кӀвалахар кьиле фидай чӀавуз куьне Зун гьакъикъатда Вуж ятӀа Гьам Тирдан чӀалахъ хьун патал, За квез и гафар исятда виликамаз лугьузва.

²⁰За квез лап рикӀивай лугьузва: За ракъурай кас кьабулдайда Зунни кьабулда ва Зун кьабулдай касди Зун Ракъурайдини кьабулда.

²¹Ахпа Исади чӀехи гъалаба кваз лагьана: — За квез лап рикӀивай лугьузва: квекай сада Зун хаинвилелди маса гуда.

²²Ам никай рахазватӀа тийижиз, Адан тилмизар сад садаз килигиз амукьна.

²³Исадин рикӀ алай са тилмиз Адав агатна ацукьнавай.

²⁴Симун-Петруди адаз, Исадивай хаин вуж ятӀа чирун патал, ишара авуна.

²⁵Ада, Исадихъ алгъана[3], «Ам вуж хьуй, я Агъа?» лагьана Адавай жузуна.

²⁶— Ам, куруна авай хуьрекдик фан кӀус кяна За низ гайитӀа, гьам я, — жаваб гана Исади. КӀус кяна, Ада ам Искарият Симунан хва Ягьудав вугана.

²⁷Фан а кӀус къачурдалай кьулухъ, Ягьудак гьасятда иблис акатна. Гьа чӀавуз Исади лагьана: — Вуна ийидай кар фадамаз ая.

²⁸И гафар Исади адаз вучиз лагьанатӀа, ацукьнавайбурукай касни гъавурда гьатнач.

²⁹Абуруз Ягьудав чпин уртах пул хьуниз килигна, Исади адаз сувариз чпиз герек затӀар къачу, я тахьайтӀа кесибриз затӀ-матӀ це лагьайди хьиз хьана.

³⁰Ам фан кӀус къачуна гьасятда кӀваляй экъечӀна. Йиф тир.

³¹Ягьуд экъечӀайла, Исади лагьана: — Инсандин Хци Вичин баркалла къалурдай вахт алукьнава. Гьа идалди Аллагьди Вичин баркаллани къалурда.

³²Инсандин Хци Аллагьдин баркалла къалурзава, Аллагьдини Вичин баркалла Инсандин Хциз багъишда. И кар лап мукьвара жеда.

³³Чан балаяр! Квехъ галаз Зун яргъалди амукьдач: Куьн Захъ къекъвез жеда. За виликдай чувудрин кьиле авайбуруз лагьанай: «Зун физвай чкадиз квевай къвез жедач». Гьа и гафар гила За квезни лугьузва.

³⁴За квез цӀийи тагьким ийизва: садаз сад кӀан хьухь. Заз куьн гьикӀ кӀандайтӀа, квезни куьн гьакӀ кӀан хьун лазим я.

³⁵Квез садаз сад кӀан хьайила, гьар са касдиз куьн Зи тилмизар тирди чир жеда.

³⁶Симун-Петруди Исадиз лагьана: — Я Агъа! Вун гьиниз физва? — Зун гьиниз физватӀа, вавай Захъ галаз исятда къвез жедач, амма ахпа Зи гуьгъуьна аваз вунни къведа, — жаваб гана Исади.

³⁷— Я Агъа! — хабар кьуна Петруди. — Вучиз завай Вахъ галаз исятда къвез жедач? Вун патал за зи чанни гуда.

³⁸— Вуна Зун патал чан гуда лугьузвани? — жаваб гана Исади. — За ваз лап рикӀивай лугьузва: кӀекре гьарайдалди вуна пудра Закай кьил къакъудда.