Read Lezgi New Testament – ЦӀийи Икьрар Ягья 14 Bible Online

Ягья 14 - Lezgi New Testament – ЦӀийи Икьрар bible

Ягья 14

¹Исади лагьана: — Куьне рикӀи рикӀ немир. Аллагьдихъ иман ая, Захъни иман ая.

²Зи Бубадин кӀвалера гзаф утагъар ава. АвачиртӀа, За квез лугьудайни: Зун квез чкаяр гьазуриз физва?

³Фена чкаяр гьазурайла, куьнни Зун авай чкада хьун патал, За хтана куьнни хутахда.

⁴Зун физвай чкадин рехъ квез чида.

⁵ТӀумая лагьана: — Я Агъа! Вун гьиниз физватӀа, чаз чизвач. Чаз рехъ гьикӀ чир хьурай?

⁶Исади лагьана: — Рехъни Гьакъикъатни Уьмуьрни — Зун я; Зун арада авачиз Бубадин патав садавайни физ жедач.

⁷Квез Зун чир хьанайтӀа, квез Зи Бубани чир жедай. Къедлай кьулухъ квез Ам чизва ва квез Ам акунай.

⁸— Я Агъа! — лагьана ФилипӀа. — Вуна чаз Буба къалура, чаз Ам акун бес жеда.

⁹— Зун квехъ галаз икьван вахт хьанватӀани, ваз Зун чир хьаначни, ФилипӀ? — лагьана Исади. — Зун акурдаз Бубани акунва; идалай гуьгъуьниз «Вуна Чаз Буба къалура» лугьудай гафар вуч лагьай чӀал я?

¹⁰Зун Бубада, Бубани За авайдахъ вун чӀалахъ жезвачни? Квез лугьузвай гафар За Жува Жувакай туькӀуьрна лугьузвайбур туш. Зунни Вич сад хьанвай Буба я Вичин крар ийизвайди.

¹¹Буба За ава, Зун Бубада ава лугьудай зи гафарин чӀалахъ хьухь. Куьн зи гафарин чӀалахъ жезвачтӀа, гьич тахьайтӀа За ийизвай крарихъ хьайитӀани агъугъ.

¹²За квез лап рикӀивай лугьузва: Зун Зи Бубадин патав хъфизва, гьавиляй Захъ иман ийизвайда За вуч авуртӀа гьам ийида, гьатта За авурдалай артухни ийида.

¹³Куьне Заз Зи ТӀварцӀелай ая лагьай вуч хьайитӀани За ийида. Гьа икӀ Хци Бубадин баркалла къалурда.

¹⁴Зи ТӀвар кьуна куьне вуч тӀалабайтӀа, За гьам кьилиз акъудда.

¹⁵Квез Зун кӀан ятӀа, куьне Зи тагькимар кьилиз акъудда.

¹⁶За Бубадиз минетда, Адани квез цӀийи Несигьатдар гуда. Ам даим квехъ галаз амукьда.

¹⁷А Несигьатдар Гьакъикъатдин Руьгь я. Дуьньядиз Ам акунач ва чидач, гьавиляй дуьньядивай Ам кьабулизни жедач. Квез Ам чизва, вучиз лагьайтӀа Ам квехъ галаз амукьзава ва Ам квек кваз жеда.

¹⁸За куьн етимвиле тадач, Зун элкъвена куь патав хкведа.

¹⁹Са кьадар вахтундилай Зун дуьньядиз ахквадач, амма квез Зун ахквада, вучиз лагьайтӀа Зал чан ала, квелни чан ала.

²⁰Гьа юкъуз квез чир жеда: Зун Зи Бубада, куьн За, Зунни кве ава.

²¹Низ Зун кӀанзаватӀа, ада Зи тагькимар кьилиз акъудда. Зун кӀандайди Зи Бубадизни кӀан жеда. Зазни кӀан жеда ва За Жув адаз ачухарда.

²²Искарият тушир Ягьуда Адавай хабар кьуна: — Я Агъа! Вучиз Ваз Вун дуьньядиз ваъ, тек са чаз къалуриз кӀанзава? Бес Вун вири дуьньядин вилик атун лазим тушни?

²³— Низ Зун кӀандатӀа, гьада Зи гаф кьилиз акъудда, — жаваб гана Исади. — Зи Бубадизни гьам кӀан жеда; гьа чӀавуз Чун а касдин патав къведа ва адахъ галаз амукьда.

²⁴Зун кӀан тийизвайда За лагьайвал ийизвач. За квез лугьузвай гафар Зибур ваъ, Зун ракъурнавай Зи Бубадинбур я.

²⁵Ибур За квез Зун куь арада амаз лугьузвайди я.

²⁶Зи ТӀварцӀелай Бубади куь патав ракъурдай Несигьатдарди, яни Пак Руьгьди, лагьайтӀа, квез вири чирда ва За квез лагьайбур вири куь рикӀел хкида.

²⁷За квез секинвал тазва, Зи секинвал гузва За квез. И дуьньяди тагудай хьтин саягъда гузва. РикӀик кьамир! КичӀе жемир!

²⁸За лагьайди квез ван хьанани? Зун куь патавай хъфизва, ва мад элкъвена хкведа. Зи Буба Залай артух я, гьавиляй квез Зун кӀандайтӀа, Зун Бубадин патав хъфизва лагьай гафуни куьн шадардай.

²⁹И кар арадал атайла куьне иман авун патал, За квез виликамаз лугьузва.

³⁰Ина квехъ галаз ихтилатар ийидай вахт Захъ амач, и дуьньядал агъавалзавай бег Заз акси яз экъечӀзава. Адаз Зал агъавалдай са ихтиярни авач.

³¹Амма дуьньядиз Заз Зи Буба кӀанзавайди ва Зи Бубади Зал тапшуругъ авунвай крар ийизвайди чир хьун лазим я. Къарагъ, чун инлай хъфин.